KOZO MBETI SO PAUL ATOKUA NA TIMOTHÉE

1 Paul, bazengele ti Christ Jésus na lege ti yanga so Nzapa Sauveur ti e amû nga na ti Christ Jésus, beku ti e,+ 2 atokua mbeti so na Timothée,*+ tâ molenge ti mbi+ na yâ ti mabe:

Zia kota nzobe, nzoni bê na siriri so alondo na Nzapa Babâ ni nga so alondo na Christ Jésus Seigneur ti e aduti na mo.

3 Gï tongana ti so mbi wa mo lani ti ngbâ na Éphèse na ngoi so lani mbi ga nduru ti gue na Macédoine, mbi wa mo nga fadeso ti ngbâ kâ, tongaso si mo mû yanga na ambeni zo ti fa ambeni tënë nde pëpe, 4 ti dengi mê pëpe na ambaï ti mvene+ nga na dikongo molongo ti iri ti akotara, so na nda ni mbeni ye ayeke na pekoni pëpe,+ me so a dü gï atënë ahon ti mû na zo mbeni ye so alondo na Nzapa nga so akpengba mabe ti zo. 5 Biani, ndani so mbi mû yanga so ayeke ti tene e duti na ndoye+ so alondo na vuru bê, na nzoni conscience nga na mabe+ so ayeke ti handango lê ti zo pëpe. 6 Ndali ti so ambeni zo ague nde na aye so, a sara si ala dö lege ni azia ti gue na peko ti asenge senge tënë.+ 7 Ala ye ti ga azo ti fango ndia,+ me aye so ala yeke tene nga so ala yeke luti na ndö ni ngangu so, ala mä yâ ni pëpe.

8 E hinga so Ndia ayeke nzoni mingi gï tongana a sara kua na ni tongana ti so a hunda* 9 na hingango ye so: A sigi na ndia pëpe ndali ti zo so ayeke mbilimbili, me ndali ti azo so akpe ndia pëpe+ na azo ti ngangu-li, azo so akpe Nzapa pëpe na awasiokpari, azo so ayeke abe-ta-zo pëpe,* azo so ayeke buba nengo ti ye so ayeke nzoni-kue, azo so afâ babâ ti ala na azo so afâ mama ti ala, azo ti fango zo, 10 azo ti sarango lango-sioni,* akoli so alango na amba ti ala koli, azo ti nzingo zo ti hon na ni, azo ti mvene, azo so adeba yanga ti ala na mvene nga aye kue so ague nde na nzoni fango ye+ 11 so alingbi na pendere nzoni tënë ti Nzapa so ayeke na ngia, nzoni tënë so a zia na maboko ti mbi.+

12 Mbi kiri singila na Christ Jésus, Seigneur ti e, lo so amû na mbi ngangu, ngbanga ti so lo bâ mbi tongana zo so ayeke be-ta-zo na lege so lo soro mbi ndali ti mbeni kusala,+ 13 atâa so kozo mbi yeke mbeni zo ti zongango ndo, zo ti sarango ye ti ngangu na azo ti lo nga zo ti sioni yanga.+ Ye oko, a sara nzoni bê na mbi ngbanga ti so ye so mbi sara lani, mbi hinga ni pëpe nga mbi yeke na mabe pëpe. 14 Me kota nzobe ti Seigneur ti e awu mingi mingi legeoko na mabe nga na ndoye so ayeke na yâ ti Christ Jésus. 15 Tënë so, zo alingbi ti zia bê ti lo na ndö ni nga a lingbi ti tene zo ayeda na ni na bê ti lo kue: Christ Jésus aga na dunia so ti sö awasiokpari.+ Mbi la mbi yeke kota wasiokpari ni na popo ti ala.+ 16 Ye oko, ndani so si a sara nzoni bê na mbi ayeke ti tene na lege ti mbi, so mbi yeke kota wasiokpari ni, Christ Jésus afa kangango bê ti lo kue ti ku si mbi duti tapande ndali ti ala so ayeke mä na bê ande na lo ti tene ala wara fini ti lakue lakue.+

17 Lo so ayeke Gbia ti lakue lakue,+ so terê ti lo alingbi ti buba pëpe,+ so lê abâ lo pëpe,+ lo so gï lo oko ayeke Nzapa,+ zia a mû na lo gonda na gloire lakue lakue nga kpu na kpu. Amen.

18 Molenge ti mbi Timothée, mbi mû na mo yanga so, so ague oko na aprophétie so a tene lani so andu tâ gï mo, si na lege ni mo ngbâ ti tiri pendere bira,+ 19 na batango mabe nga na nzoni conscience,+ so ambeni zo adö lege ni azia na yâ ti mabe ti ala afâ tongana ti so yâ ti bateau afâ. 20 Hyménée+ na Alexandre ayeke na popo ti azo so, na mbi zia ala na maboko ti Satan+ tongaso si a se ala ti fa na ala ti zonga Nzapa pëpe.

2 Tongaso, mbi wa ala kozoni kue ti voro terê ti ala na Nzapa, ti sambela, ti sambela ndali ti ambeni zo, ti kiri singila na Nzapa, ti hunda Nzapa ndali ti mara ti azo nde nde kue, 2 ndali ti agbia nga na azo kue so ayeke na kota ndo,*+ tongaso si e ngbâ ti duti kpô nga na siriri na vorongo Nzapa na bê ti e kue nga na sarango ye na bê kue.+ 3 Sarango tongaso ayeke nzoni mingi nga anzere na lê ti Nzapa, Sauveur ti e,+ 4 lo so aye si mara ti azo nde nde kue asö fini ti ala+ nga ala wara tâ hingango ye na ndö ti tâ tënë. 5 Nzapa ayeke gï oko,+ na walekengo-songo+ na popo ti Nzapa na azo+ ayeke oko, mbeni koli, Christ Jésus,+ 6 lo so amû terê ti lo tongana mbeni ye so alingbi na ni so a futa ti zi azo kue.*+ A yeke ye so a yeke sara ande biani tënë na ndö ni tongana ngoi ni alingbi. 7 A yeke ndali ti fango tënë ni so+ la si a zia mbi wafango tënë nga bazengele+ (mbi yeke tene tâ tënë, mbi yeke tene mvene pëpe), wafango ye na azo ti amara+ na ndö ti tënë ti mabe nga na tâ tënë.

8 Ni la, mbi ye si na ndo kue akoli angbâ ti sambela, na yorongo maboko ti ala na nduzu tongana abe-ta-zo,+ ala sara ni na ngonzo pëpe+ nga na dengo gaba pëpe.+ 9 Legeoko nga, mbi ye si awali asara pendere ti ala na yungo bongo so ayeke nzoni, na sarango ye ahon ndö ni pëpe nga na hange. Ala sara pendere ni na sarango li ti ala na kode ahon ndö ni pëpe, na yungo lor wala aperle wala abongo ti kota nginza pëpe,+ 10 me na mbeni lege so alingbi na awali so a tene ala yeke voro Nzapa,+ so ti tene na lege ti anzoni kusala.

11 Zia wali aduti kpô si lo manda ye na wokongo terê kue na gbe ti akoli.+ 12 Mbi mû lege pëpe na wali ti fa ye wala ti komande koli, me a lingbi lo duti kpô.+ 13 Ndali ti so a sara Adam kozo, si na pekoni a sara Ève.+ 14 Nga, a handa lani Adam pëpe, me a handa Ève+ biani si lo ga zo so ake ndia. 15 Ye oko, na lege ti gango mama si a yeke bata ande awali,+ gï tongana ala ngbâ na yâ ti mabe na ndoye nga ala ngbâ ti duti nzoni-kue na batango bibe ti ala nzoni.+

3 Tënë so, zo alingbi ti zia bê ti lo na ndö ni: Tongana mbeni zo agi ti ga zo ti bango ndo na ndö ti congrégation,+ lo sara nzara ti mbeni kusala so ayeke nzoni mingi. 2 A yeke nzoni zo ti bango ndo na ndö ti congrégation aduti zo so tënë ayeke na li ti lo pëpe, koli ti wali oko, sarango ye ti terê ti lo ayeke lakue nzoni, lo bata bibe ti lo nzoni,+ lo sara ye kirikiri pëpe, lo yeke zo ti yambango agene nzoni,+ lo yeke zo so ahinga ti fa ye nzoni,+ 3 lo yeke ngbâa ti sämba pëpe,+ lo yeke zo ti sarango ye na zo na ngangu pëpe,* me lo yeke zo so asara ye na lege ni,*+ lo yeke zo so aye tiri pëpe,+ lo yeke zo ti yengo nginza pëpe,+ 4 lo yeke fa lege nzoni mingi na azo ti da ti lo,* amolenge ti lo ayeke woko terê na gbe ti lo na bê ti ala kue,+ 5 (ndali ti so tongana mbeni zo ahinga ti fa lege nzoni na azo ti da ti lo wani pëpe,* lo yeke bata ande congrégation ti Nzapa ni tongana nyen?), 6 lo yeke mbeni fini zo na yâ ti mabe pëpe,+ si baba ahon ndö ti lo pëpe na lo tï pëpe na gbe ti ngbanga so a dë na li ti Zabolo. 7 Nga, a yeke nzoni azo ti gigi asara nzoni tënë ti lo,+ si azo atene sioni tënë na ndö ti lo pëpe na lo tï pëpe na yâ ti kûkû ti Zabolo.

8 A yeke nzoni awakua ti mungo maboko aduti azo so ane terê ti ala, yanga ti ala ayeke use use pëpe,* ala yeke azo so abi terê ti ala na yâ ti nyongo vin pëpe, ala sara bê ti warango ye na lege ti likisi pëpe,+ 9 nga tënë ti mabe so Nzapa ahonde ndani, ala bata ni na nzoni conscience.+

10 Nga, zia a tara ala kozoni ti bâ wala ala lingbi na kua ni, zia ala sara kua tongana awakua tongana tënë ayeke na li ti ala pëpe.+

11 Legeoko nga, a yeke nzoni awali aduti azo so ane terê ti ala, ala duti azo ti pango zo pëpe,+ sarango ye ti terê ti ala ayeke lakue nzoni, ala yeke be-ta-zo na yâ ti aye kue.+

12 Zia awakua ti mungo maboko aduti akoli so ayeke gï na wali oko, ala fa lege nzoni na amolenge ti ala nga na azo ti da ti ala. 13 Akoli so ayeke sara kua pendere mingi, ala yeke wara nzoni iri nga ala lingbi ti sara tënë ti mabe na Christ Jésus na kamene oko pëpe.

14 Atâa so mbi yeke na beku ti si na mo kâ fafadeso, mbi yeke sû mbeti so na mo, 15 si tongana mbi si hio pëpe, mo hinga tongana nyen ti sara ye na popo ti azo ti da ti Nzapa,+ so ti tene congrégation ti Nzapa so ayeke na fini, pilier nga na gere ti tâ tënë. 16 Biani, tënë so Nzapa ahonde ndani, so ti tene tënë ti vorongo Nzapa na bê kue so, ayeke kota tënë mingi: ‘A fa lo na gigi na yâ ti mitele,+ a diko lo tongana zo ti mbilimbili na yâ ti yingo,+ lo si na a-ange,+ a fa tënë na ndö ti lo na popo ti amara,+ a mä na bê na lo na yâ ti dunia so,+ a mû lo na nduzu na yâ ti gloire.’

4 Me, tënë so alondo na yingo vulu atene biani so na yâ ti angoi so ayeke ga ande, ambeni zo ayeke dö lege ti mabe azia ndali ti so ala dengi mê na atënë ti handango zo so alondo na ayingo,+ nga na afango ye ti asioni yingo. 2 Ala dö lege ti mabe ni azia ngbanga ti sarango ye ti azo so ayeke tene mvene si ayeke sara ye ti handa lê ti azo,+ ala so conscience ti ala amü mo bâ mo tene a zö ni na wen so a yôro na yâ ti wâ si abe. 3 Ala ke na azo ti sara mariage+ nga ala mû yanga na azo ti gbanzi terê ti ala na akobe+ so Nzapa aleke+ ti tene azo so ayeke na mabe+ nga so ahinga tâ tënë mbilimbili ate ni na kiringo singila na lo Nzapa. 4 Biani, ye oko oko kue so Nzapa asara ayeke nzoni mingi,+ na mbeni ye ti tene zo ake ni ayeke dä pëpe+ tongana zo ate ni na kiringo singila na Nzapa, 5 ndali ti so na lege ti tënë ti Nzapa nga na lege ti sambela so a sara na ndö ni, kobe ni so aga nzoni-kue awe.

6 Tongana mo yeke mû awango so na aita, mo yeke ga ande tâ nzoni wakua ti Christ Jésus, so kobe ti tengo ti mo ayeke atënë ti mabe nga na nzoni fango ye so mo yeke mû tâ gï peko ni.+ 7 Me, mo ke ambaï ti mvene+ so abuba nengo ti ye so ayeke nzoni-kue, so ambakoro-wali ayeke tene ni. Me mo tara terê ti mo tongana ti mbeni wanguru na ziango na gbele mo ti voro Nzapa na bê ti mo kue. 8 Biani tarango terê na lege ti ngia ti awanguru ayeke sara nzoni na zo gï kete; me vorongo Nzapa na bê kue ayeke sara nzoni na zo na yâ ti aye kue, ndali ti so a yeke na zendo ti fini ti laso nga na ti so ayeke ga.+ 9 Tënë so, zo alingbi ti zia bê ti lo na ndö ni nga a lingbi ti tene zo ayeda na ni kue. 10 Ndali ti tënë so si e yeke sara kua ngangu na e yeke tirika ngangu+ ngbanga ti so e zia beku ti e na ndö ti mbeni Nzapa so ayeke na fini, lo so ayeke Sauveur+ ti mara ti azo nde nde kue,+ na mbilimbili, ti azo so ayeke be-ta-zo.

11 Ngbâ ti mû yanga na azo na ndö ti aye so nga ngbâ ti fa ni. 12 Zia lege oko pëpe na mbeni zo ti bâ mo tongana mbumbuse zo ndali ti so mo de maseka. Me mo ga mbeni tapande ndali ti azo so ayeke be-ta-zo, na lege ti tënë ti yanga ti mo, sarango ye ti mo, ndoye so mo yeke na ni, na lege ti mabe nga na dutingo so ayeke na sioni oko pëpe. 13 Ti ku na singo ti mbi, mo ngbâ ti mû bê ti mo kue na dikongo mbeti na gbele azo,+ na mungo wango na ala nga na fango ye na ala. 14 Mo sara mbana pëpe na matabisi so a mû na mo na lege ti tënë ti prophétie na ngoi so bungbi ti a-ancien azia maboko ti ala na ndö ti mo.+ 15 Mo gbu li ti mo na ndö ti aye so, mo bi terê ti mo kue na yâ ni, si azo kue abâ polele maïngo ti mo. 16 Mo sara hange lakue na aye so abâ mo nga na fango ye ti mo.+ Mo ngbâ gï dä, ndali ti so na sarango tongaso mo yeke sö ande mo wani nga na ala so ayeke mä mo.+

5 Mo suku ngangu mingi pëpe na mbeni mbakoro-koli.+ Me, mo voro yanga na lo tongana babâ ti mo; mo voro yanga na amaseka-koli tongana aita ti mo ti koli, 2 mo voro yanga na ambakoro-wali tongana amama ti mo; mo voro yanga na amaseka-wali tongana aita ti mo ti wali, mo sara ni na bê so ayeke tâ nzoni-kue.

3 Mo ne awali-mua so ayeke awali-mua biani.*+ 4 Me tongana mbeni wali-mua ayeke na amolenge wala na atarä, zia ala manda kozoni kue ti voro Nzapa na bê ti ala kue na lege so ala yeke bâ lege ti azo ti da ti ala,+ nga ala kiri peko ti anzoni ye so ababâ na amama ti ala nga na a-âta ti ala asara ândö na ala,+ ndali ti so ye so ayeke nzoni na lê ti Nzapa.+ 5 Wali so ayeke wali-mua biani nga so lo yeke na mbeni ye pëpe azia beku ti lo na ndö ti Nzapa,+ na lo ngbâ lakue ti voro terê na Nzapa nga ti sambela lo bï na lâ.+ 6 Me ti wali-mua so amû terê ti lo na yâ ti ngia ti wara nzerengo terê, lo kui awe atâa so lo yeke na fini. 7 Tongaso, ngbâ ti fa ye* na ala na ndö ti aye so, si ala duti na tënë na li ti ala pëpe. 8 Ti tâ tënë ni, tongana mbeni zo abata azo ti lo pëpe, mbilimbili azo ti da ti lo, lo dö lege ti mabe lo zia awe, na sioni ti lo ahon ti zo so amä na bê pëpe.+

9 Ti diko mbeni wali-mua na popo ti ala so ayeke awali-mua biani, a lingbi a diko lo so ngu ti lo ayeke na gbe ti ngu 60 pëpe nga lo yeke ândö wali ti koli oko, 10 a sara nzoni tënë ti lo ndali ti apendere kua so lo sara,+ tongana lani lo bata amolenge,+ lo yamba agene,+ lo sukula gere ti azo ti be-vulu,+ lo dë bê ti azo so ayeke na yâ ti ye ti vundu,+ lo sara nzoni kusala kue na bê ti lo kue.

11 Me ti awali-mua so ade maseka, mo diko ala pëpe, ndali ti so tongana nzara ti terê ti ala aga aluti na popo ti ala na Christ, ala ye ti sara mariage. 12 Nga, ala yeke iri ande ngbanga na ndö ti ala ndali ti so ala bâ na nene ni pëpe kozo yanga so ala mû na lege ti mabe.* 13 Na oko ngoi ni, ala manda ti duti senge senge, ti tambela na yanga-da ti azo. Na ndö ti so ala ye ti duti gï senge senge so, ala yeke diko kpere-kpere na ala yeke yôro yanga ti ala na yâ ti atënë ti azo,+ nga ala yeke sara tënë ti aye so a lingbi ala tene ni pëpe. 14 Ni la, mbi ye si awali-mua so ade maseka asara mariage,+ ala dü amolenge,+ ala fa lege na azo ti da ti ala nga ala mû lege pëpe na wato ti tene sioni tënë na ndö ti e. 15 Biani, ambeni adö lege ti tâ tënë azia awe ti mû peko ti Satan. 16 Tongana mbeni wali so amä na bê ayeke na awali-mua na yâ ti sewa ti lo, zia lo wani lo mû maboko na ala, si kungba ni aduti na ndö ti congrégation pëpe. Tongaso, congrégation ayeke wara lege ti mû maboko na ala so ayeke awali-mua biani.*+

17 A-ancien so ayeke fa lege nzoni,+ zia a bâ ala tongana azo so alingbi ti wara gonda fani use,+ mbilimbili ala so ayeke sara kua ngangu na lege ti tënë ti yanga ti ala nga na lege ti fango ye ti ala.+ 18 Ndali ti so Mbeti ti Nzapa atene: “A yeke nzoni mo kanga yanga ti bagara pëpe na ngoi so lo yeke sara kua na ndo so a yeke pika alê ti kobe dä.”+ Nga a tene: “Zo ti kua alingbi na futa ti lo.”+ 19 Yeda pëpe na tënë so a bi na li ti mbeni ancien, me mo yeda na ni gï tongana atémoin use wala ota ti tënë ni ayeke dä.+ 20 Ala so angbâ na yâ ti siokpari,+ mo suku na ala+ na lê ti azo kue, si tanga ti azo ni nga asara mbeto. 21 Mbi wa mo mingi na lê ti Nzapa, na lê ti Christ Jésus nga na lê ti a-ange so Nzapa asoro ala, ti sara aye so mbi fa so, mo fâ ngbanga na ndö ni na yâ ti bê ti mo kozoni pëpe, mo bâ yâ ti azo bango pëpe si mo sara ye na ala.+

22 Mo zia maboko ti mo hio na li ti mbeni zo pëpe.*+ Mo yô mbage ti siokpari ti mbeni zo pëpe. Bata terê ti mo nzoni-kue.

23 Mo nyon ngu mbeni pëpe,* me mo nyon vin kete ndali ti yâ ti mo nga ndali ti kobela so ayeke sara mo lakue so.

24 Asiokpari ti ambeni zo ayeke sigi polele na gbele azo, na a yeke gue hio na ngbanga; me ti ambeni zo, asiokpari ti ala nga ayeke sigi polele na pekoni ande.+ 25 Legeoko nga, anzoni kusala ayeke sigi polele na gbele azo,+ nga ti anzoni kusala so a bâ ni pëpe, a lingbi ti ngbâ ande gï na hondengo ni pëpe.+

6 Zia azo kue so ayeke na gbe ti joug ti ngbâa angbâ ti bâ awa ti ala tongana azo so alingbi na gonda kue,+ si a tene sioni tënë ti iri ti Nzapa nga na ti fango ye ni lâ oko pëpe.+ 2 Nga, zia ala so awa ti ala ayeke azo so amä na bê abâ awa ti ala ni tongana asenge zo pëpe ndali ti so ala yeke aita. Me, zia ala duti nduru ahon ti kozo ti sara kua tongana angbâa, ndali ti so ala so ayeke wara nzoni ye ti peko ti kusala ti ala ayeke azo so amä na bê nga so a ndoye ala mingi.

Ngbâ ti fa aye so na azo nga ti mû awango so na ala. 3 Tongana mbeni zo afa mbeni tënë nde na lo yeda pëpe na anzoni tënë+ so ayeke ti Seigneur ti e Jésus Christ, nga lo yeda pëpe na fango ye so ague oko na vorongo Nzapa na bê kue,+ 4 andâ baba ahon ndö ti lo awe na lo gbu nda ti ye oko pëpe,+ me kobela ti atënë ti dengo kite na ti dengo gaba na ndö ti atënë asara li ti lo awe.+ A yeke aye so la si adü kota bê, tiri, pango zo,* dutingo na asioni bibe na ndö ti zo, 5 angangu papa na ndö ti akete kete ye so alondo na mbage ti azo so bibe ti ala abuba awe+ si tâ tënë ayeke na yâ ti li ti ala pëpe, nga so ala tene na bê ti ala atene vorongo Nzapa na bê kue ayeke mbeni lege ti wara na ye.+ 6 Tâ tënë, vorongo Nzapa na bê kue+ ayeke mbeni lege ti wara kota ye gï tongana zo azia bê ti lo gï na ndö ti ye so lo yeke na ni. 7 Biani, e ga na ye oko pëpe na yâ ti dunia so nga e lingbi ti mû ye oko pëpe ti hon na ni.+ 8 Ni la, tongana e yeke na kobe na bongo,* so alingbi na e awe.+

9 Me ala so aye gï ti ga azo ti mosoro ayeke tï na yâ ti tara, na yâ ti kûkû+ nga na yâ ti abuba nzara nde nde so asara sioni na ala, si a yeke gue na azo ti tene a futi ala na a buba ye ti ala kue.+ 10 Ndali ti so ndoye ti nginza ayeke gunda ti mara ti asioni ye nde nde kue, nga na gingo ti wara mara ti ndoye ni so, ambeni ahon yongoro na mabe na ala kpo terê ti ala na aye ti vundu mingi.+

11 Ti mo so mo yeke zo ti Nzapa, kpe yongoro na aye so kue. Me tomba peko ti mbilimbili, vorongo Nzapa na bê kue, mabe, ndoye, gbungo ngangu nga sarango ye na ngangu pëpe.+ 12 Tiri pendere bira ti mabe, gbu fini ti lakue lakue ngangu, fini so a iri mo ndali ni, so ndali ni mo fa pendere tënë ti mabe ti mo na gbele azo, na lê ti atémoin mingi.

13 Na lê ti Nzapa, lo so abata aye kue na fini, nga na lê ti Christ Jésus, lo so afa lani tënë pendere mingi dandara na gbele Ponce Pilate,+ mbi mû yanga na mo 14 ti tene mo bata commandement so na mbeni lege so ayeke na sioni oko pëpe nga so tënë ayeke na ndö ni pëpe juska na ngoi so Seigneur ti e Jésus Christ ayeke fa terê ti lo na gigi.+ 15 Fango terê ti lo na gigi ni so, oko Kota Mokonzi so ayeke na ngia ayeke fa ni na ngoi ni so a diko ni awe. Lo so ayeke Gbia ti ala so akomande tongana agbia nga Seigneur ti ala so akomande tongana aseigneur,+ 16 lo so gï lo oko ayeke na fini so alingbi ti hinga kuâ pëpe,+ lo so aduti na yâ ti lumière so zo alingbi ti si dä pëpe,+ lo so mbeni zo abâ lo pëpe wala alingbi ti bâ lo pëpe.+ Zia a mû na lo gonda nga na ngangu so angbâ kpu na kpu. Amen.

17 Mo mû yanga na ala so ayeke azo ti mosoro na yâ ti aye ti ngoi so, ti bâ terê ti ala kota pëpe, nga ti zia beku ti ala pëpe na ndö ti amosoro so ayeke ye ti ziango bê dä pëpe so,+ me ti zia beku ti ala na ndö ti Nzapa, lo so amû aye kue mingi mingi na e si e wara ngia dä.+ 18 Mo mû yanga na ala ti sara ye ti nzoni, ti duti azo ti mosoro na lege ti anzoni kusala, ti duti azo so maboko ti ala awoko, ti duti nduru ti kangbi ye na zo,+ 19 si ala ngbâ ti wara mbeni mosoro ndali ti ala wani, mbeni nzoni fondation so ala lingbi ti leke ye na ndö ni kekereke,+ tongaso si ala gbu fini so ayeke tâ fini ni biani.+

20 Ti mo Timothée, mo bata ye so a zia na maboko ti mo ti bata,+ mo tourné peko na asenge senge tënë so abuba nengo ti ye so ayeke nzoni-kue. Mo tourné peko nga na atënë ti kirikiri ti ye so a iri ni a tene a yeke “hingango ye”, andâ a yeke tënë ti mvene.+ 21 Ambeni zo afa baba ti mara ti hingango ye tongaso, ni la si ala hon yongoro na mabe so.

Zia kota nzobe ti Nzapa aduti na ala.