USE MBETI SO PAUL ATOKUA NA TIMOTHÉE

1 Mbi Paul, bazengele ti Christ Jésus na lege ti ye so bê ti Nzapa aye nga alingbi na zendo ti fini so aga na lege ti Christ Jésus,+ 2 mbi tokua mbeti so na mo Timothée, molenge ti mbi so mbi ye mo mingi:+

Zia kota nzobe, nzoni bê na siriri so alondo na Nzapa Babâ ni nga so alondo na Christ Jésus Seigneur ti e aduti na mo.

3 Mbi kiri singila mingi na Nzapa, lo so mbi yeke sara kua na lo na nzoni conscience tongana ti so akotara ti mbi asara ândö. Mbi zia lâ oko pëpe ti dabe ti mbi na mo na ngoi so mbi yeke voro terê ti mbi na Nzapa, bï na lâ. 4 So mbi yeke dabe ti mbi na ngu ti lê ti mo, mbi ye mingi ti bâ mo si ngia asi bê ti mbi. 5 Mbi dabe ti mbi na mabe ti mo so ayeke ti handango lê ti zo oko pëpe,+ mabe so ayeke kozo na âta ti mo ti wali Loïs nga na mama ti mo Eunice, na so mbi hinga mbi tene a yeke na mo nga kue.

6 Ndali ti tënë so, mbi kiri mbi dabe ti mo ti sara si matabisi ti Nzapa so ayeke na mo angbâ gï ti za tongana wâ, matabisi so mo wara ni na lege so mbi zia maboko ti mbi na ndö ti mo.+ 7 Biani, Nzapa amû na e yingo ti zo ti mbeto pëpe,+ me yingo ti ngangu,+ ti ndoye nga na ti batango bibe ti e nzoni. 8 Tongaso, mo sara kamene pëpe ti fa tënë na ndö ti Seigneur ti e.+ Mo sara kamene ti mbi pëpe, mbi so mbi sara kanga ndali ti iri ti Seigneur, me mo kue mo duti nduru ti bâ pasi+ ndali ti nzoni tënë nga mo zia bê ti mo na ndö ti ngangu ti Nzapa.+ 9 Lo sö e na lo iri e alingbi na iringo ndo so ayeke nzoni-kue.+ A yeke pëpe ndali ti akusala so e sara la si lo iri e, me ndali ti ye so lo wani lo leke na bê ti lo ti sara nga ndali ti kota nzobe ti lo.+ Lo mû na e kota nzobe so ndali ti Christ Jésus ngbene ye ândö giriri. 10 Me fadeso, a fa kota nzobe so polele awe tongana Sauveur ti e Christ Jésus+ afa terê ti lo na gigi, lo so lo lungula kuâ biaku biaku+ nga na lege ti nzoni tënë+ lo za lumière na ndö ti fini+ nga na ndö ti tënë ti terê so alingbi ti buba pëpe;+ 11 nzoni tënë so, a zia mbi ti duti wafango tënë, bazengele nga wafango ye ndali ni.+

12 A yeke ndali ti ye so la si mbi yeke bâ apasi so kue,+ me kamene asara mbi pëpe.+ Biani, mbi hinga lo so mbi mä na bê na lo nga mbi hinga na bê ti mbi kue so lo lingbi ti bata ye so mbi zia na maboko ti lo ti bata juska ti si na lango ni so.+ 13 Mo ngbâ ti bata anzoni tënë+ so a zia ni tongana tapande, anzoni tënë so mo mä ni na mbage ti mbi; mo ngbâ ti bata ni na mabe nga na ndoye so aga na lege ti dutingo beoko na Christ Jésus. 14 Pendere ye so a zia na maboko ti mo ti bata ni so, mo bata ni na lege ti yingo vulu so aduti na yâ ti e.+

15 Mo hinga tënë so, so azo kue so ayeke na yâ ti kodro-komanda ti Asie+ atourné peko ti ala na mbi. Phygèle na Hermogène ayeke na popo ti azo so. 16 Zia Seigneur asara nzoni bê na azo ti da ti Onésiphore,+ ndali ti so fani mingi lo dë bê ti mbi, na lo sara kamene ti achaîne so mbi yeke na yâ ni so pëpe. 17 Me, tongana lo si lani na Rome, lo gi mbi ngangu juska lo wara mbi. 18 Zia Seigneur asara si lo wara nzoni bê so alondo na Jéhovah* na lango ni so. Akua so kue lo sara na Éphèse, mo hinga tënë ni nzoni awe.

2 Tongaso, molenge ti mbi,+ mo ngbâ ti wara ngangu na yâ ti kota nzobe so ague oko na Christ Jésus, 2 nga aye so mo mä ni na yanga ti mbi, na so atémoin ni ayeke mingi,+ mo zia ni na maboko ti azo so ayeke be-ta-zo, so ala nga na pekoni ayeke lingbi ande biani ti fa ni na ambeni zo. 3 Mo kue mo duti nduru ti bâ pasi+ tongana mbeni nzoni turugu+ ti Christ Jésus. 4 Mbeni zo so ayeke sara kua ti turugu ayeke bi terê ti lo pëpe na yâ ti dengo buze* ti gigi so, tongaso si lo nzere na lê ti zo so amû lo na kua ti turugu ni. 5 Nga, tongana mbeni zo ayeke sara mandako na yâ ti angia ti wanguru, lo yeke wara couronne ni gï tongana lo sara mandako ni alingbi na andia ni si.+ 6 A lingbi zo ti fango yaka so asara kua ngangu aduti kozo zo ti tengo lê ti kobe ni. 7 Mo gbu li ti mo lakue na ndö ti tënë so mbi yeke tene; Seigneur ayeke mû ande na mo hingango ndo ti mä yâ ti aye kue nzoni.*

8 Dabe ti mo so a zingo lani Jésus Christ na kuâ+ na lo yeke ti hale ti David,*+ a lingbi na nzoni tënë so mbi fa;+ 9 ti gue oko na nzoni tënë so, mbi ngbâ ti kanga bê ti mbi na yâ ti pasi juska ti duti na yâ ti chaîne tongana mbeni sioni zo.+ Ye oko, a kanga tënë ti Nzapa pëpe.+ 10 Ndali ti tënë so, mbi ngbâ ti gbu ngangu na yâ ti aye kue ndali ti ala so Nzapa asoro ala,+ si ala nga ala lingbi ti wara salut so ayeke na lege ti Christ Jésus nga ti wara gloire ti lakue lakue. 11 Tënë so, zo alingbi ti zia bê ti lo na ndö ni: Biani tongana e kui legeoko na lo, e yeke duti ande na fini legeoko na lo nga;+ 12 tongana e ngbâ ti gbu ngangu, e yeke komande ande legeoko na lo nga tongana agbia;+ tongana e bere tënë ti lo, lo nga kue lo yeke bere tënë ti e;+ 13 tongana e yeke abe-ta-zo pëpe, lo yeke ngbâ ti lo be-ta-zo ndali ti so lo lingbi pëpe ti bere tënë ti lo wani.

14 Mo ngbâ ti dabe ti ala na aye so, mo fa ye* na ala na gbele Nzapa ti tene ala tiri ndali ti atënë pëpe; a yeke ye so ayeke senge senge ngbanga ti so a yeke sara sioni* na ala so ayeke mä ni. 15 Mo sara ngangu kue ti duti mbeni zo so anzere na lê ti Nzapa, mbeni wakua so mbeni ye ti sara kamene na lo ayeke dä pëpe, wakua so ahinga ti sara kusala na lege ni na tënë so ayeke tâ tënë.+ 16 Me mo ke asenge senge tënë so abuba nengo ti ye so ayeke nzoni-kue;+ ndali ti so ala yeke gue na zo ti sara mara ti aye nde nde kue so afa so zo akpe Nzapa pëpe ti gue gï na ni, 17 na atënë ti yanga ti azo ni so ayeke mû gï ndo ti gue na ni tongana kä so ayeke te ti mû terê ti zo kue. Hyménée na Philète ayeke na popo ti azo so.+ 18 Akoli so ahon yongoro na tâ tënë awe, ala yeke tene so zingongo ti akuâ ahon awe,+ si ala yeke kinda mabe ti ambeni zo. 19 Me, ngangu gere ti ye so Nzapa azia angbâ ti luti, na tënë so a sû na terê ni ayeke so: “Jéhovah* ahinga ala so ayeke ti lo,”+ nga: “Zia zo kue so adi iri Jéhovah*+ adö lege ti ye ti kirikiri azia.”

20 Na yâ ti mbeni kota da, a yeke wara gï ata so a sara ni na lor nga na argent pëpe, me a yeke wara nga ata so a sara ni na keke nga so a sara ni na sese. Ambeni ta ni ayeke ti sara na kota kua, me ambeni ayeke ti sara na senge kua. 21 Ni la, tongana mbeni zo aduti yongoro na ata so a yeke sara na senge kua so, lo yeke duti ande mbeni ta so ayeke ti sara na kota kua, ta so a zia ni nde, ta so wa ti lo ayeke sara na kua, ta so a leke ni ndali ti anzoni kua kue. 22 Tongaso, mo kpe yongoro na anzara ti bê so ayeke gbu ka amaseka, me mo tomba peko ti mbilimbili, ti mabe, ti ndoye, ti siriri, legeoko na ala so ayeke iri ndo na Seigneur na vuru bê.

23 Me, mo ke apikango patara ti buba nga ti senge senge,+ hinga so a yeke dü tiri. 24 Ndali ti so ngbâa ti Seigneur ayeke tiri pëpe, me lo duti zo so asara ye na ngangu pëpe* na azo kue,+ zo so ahinga ti fa ye nzoni na azo, lo hinga ti kanga bê ti lo na ngoi so mbeni zo asara ye na lo na lege ni pëpe,+ 25 lo yeke fa ye na ngangu pëpe na azo so aye ti mä wango pëpe.+ Hinga ape Nzapa asara si ala changé bê ti ala si ala wara tâ hingango ye na ndö ti tâ tënë,+ 26 si li ti ala akiri dä si ala zi terê ti ala na yâ ti kûkû ti Zabolo, ndali ti so lo gbu ala awe na fini lê ti ala ti sara ye so bê ti lo aye.+

3 Me a yeke nzoni mo hinga tënë so, na lâ ti nda ni,+ angoi ti akpale so ayeke ngangu na zo ti kanga bê na yâ ni ayeke duti dä, 2 ngbanga ti so azo ayeke duti ande azo so andoye gï terê ti ala wani, azo so andoye nginza, azo so abâ terê ti ala kota na ndö ti amba ti ala, azo ti baba, azo ti zongango Nzapa nga na azo, azo so ake yanga ti ababâ na amama ti ala, azo so ahinga ti kiri singila pëpe, azo so ayeke abe-ta-zo pëpe, 3 azo so aye amba ti ala zo pëpe, azo so aye ti mä terê na amba ti ala pëpe, azo ti pango amba ti ala, azo so akanga nzara ti bê ti ala pëpe, azo so ayeke asioni zo, azo so andoye nzoni ye pëpe, 4 azo ti kango amba ti ala, azo so li ti ala akpengba, azo so wuma ti ala ahon ndö ni, azo so andoye ngia ahon ti ndoye Nzapa, 5 ala yeke sara ye mo bâ mo tene ala voro Nzapa na bê ti ala kue, me ala ke ngangu so vorongo Nzapa na bê kue ayeke sara na ndö ti zo;+ mo tourné peko ti mo na azo so. 6 Biani, a yeke na popo ti ala si ambeni zo ayeke londo, azo so ayeke gue na mayele na yâ ti da ti azo ti handa ala na ti gbu na ngbâa awali so awoko awe so asiokpari ane ala, awali so anzara nde nde ti bê ti ala ayeke fa lege na ala, 7 so ala yeke manda ye lakue, me ala lingbi lâ oko pëpe ti wara tâ hingango ye na ndö ti tâ tënë.

8 Gï tongana ti so Jannès na Jambrès ake lani tënë ti Moïse, azo so nga kue angbâ ti ke tâ tënë. Mara ti azo tongaso li ti ala abuba kue awe, na tongana a ndu tënë ti mabe, Nzapa ake ala awe. 9 Ye oko, ala yeke ngbâ ande gï ti maï pëpe, ndali ti so azo kue ayeke hinga ande tënë ti ye so asara li ti ala so, tongana ti so azo ahinga lani tënë ti ye so asara li ti Jannès na Jambrès so.+ 10 Me ti mo, mo mû lani tâ gï peko ti fango ye ti mbi, ti dutingo ti mbi,+ ti ye so mbi ye ti sara, ti mabe ti mbi, ti kangango bê ti mbi ti ku ye, ti ndoye so mbi yeke na ni nga ti gbungo ngangu so mbi gbu, 11 ti aye ti ngangu so a sara na mbi, ti apasi so mbi bâ, ti mara ti aye nde nde so asi na mbi na Antioche,+ na Iconium+ nga na Lystres.+ Mbi kanga bê lani na yâ ti aye ti ngangu so na Seigneur azi mbi na yâ ti aye so kue.+ 12 Tâ tënë, azo kue so aye ti voro Nzapa na bê ti ala kue na yâ ti gigi ti ala na dutingo beoko na Christ Jésus, a yeke sara ande aye ti ngangu na ala nga.+ 13 Me azo ti sioni na azo ti handango azo ayeke ngbâ gï ti sara sioni ahon ti kozo ti gue na ni, ala yeke handa azo na azo ayeke handa ala.+

14 Me ti mo, mo ngbâ na yâ ti aye so mo manda lani na so a ga na mo ti ye peko ni,+ ndali ti so mo hinga azo so mo manda ye ni na mbage ti ala, 15 nga so ngbene ye so mo de foroto,+ mo hinga awe atënë ti Nzapa so a sû na mbeti,+ so alingbi ti sara si mo wara ndara ti wara na salut na lege ti mabe na Christ Jésus.+ 16 Atënë kue ti yâ ti Mbeti ti Nzapa, a sû ni na gbe ti yingo ti Nzapa,+ na a yeke nzoni ti fa na ye na zo,+ ti suku na zo, ti kiri na aye na nzoni lege, ti fa na zo ti sara ye so ayeke mbilimbili,+ 17 si zo ti Nzapa alingbi na yâ ti ye kue, lo wara aye kue so lo yeke na bezoin ni ti sara na nzoni kusala kue.

4 Na lê ti Nzapa nga na ti Christ Jésus, lo so ayeke fâ ande ngbanga ti ala+ so ayeke na fini nga na ti akuâ,+ na lege ti fango terê ti lo na gigi+ nga na lege ti Royaume ti lo,+ mbi mû yanga na mo: 2 Mo fa tënë ti Nzapa,+ mo fa ni na bibe ti sarango ye hio atâa a yeke na ngoi so aye atambela nzoni wala na ngoi ti wusuwusu; mo suku na zo,+ mo kiri zo na nzoni lege, mo wa zo, mo sara ni na kangango bê kue ti ku nga na kode ti fa ye na zo.+ 3 Biani, mbeni ngoi ayeke ga so ala yeke kanga bê gbä na nzoni fango ye ni,+ me ti lingbi na anzara ti bê ti ala wani, ala yeke soro gbâ ti awafango ye ti fa na ala atënë so anzere na mê ti ala.*+ 4 Ala yeke kanga ande mê ti ala na tâ tënë, ti mä gï ambaï ti mvene. 5 Me ti mo, bata bibe ti mo na yâ ti aye kue, kanga bê ti mo na yâ ti pasi,+ sara kusala ti wafango nzoni tënë,* sara kusala ti mo ni kue.+

6 Biani, a yeke tuku mbi fadeso tongana sandaga ti sämba,+ nga ngoi so a fa ni ti zi mbi+ aga nduru ti si awe. 7 Mbi tiri pendere bira ni awe,+ mbi kpe loro ni ahunzi awe,+ mbi sara ye alingbi na tënë ti mabe awe. 8 Ti fadeso, a bata na mbi couronne ti mbilimbili,+ couronne so Seigneur, juge so ayeke mbilimbili,+ ayeke mû na mbi na lango ni so tongana futa ti mbi;+ lo yeke mû ande ni gï na mbi oko pëpe, me lo yeke mû ni nga na ala kue so aye mingi ti bâ lo na ngoi so lo yeke fa terê ti lo na gigi.

9 Mo sara kue ti si na mbi ge hio si. 10 Ndali ti so Démas+ adö mbi azia awe ngbanga ti so lo ndoye aye ti ngoi so,* na lo gue na Thessalonique, Crescens ague na Galatie, na Tite ague na Dalmatie. 11 Gï Luc oko la si ayeke na terê ti mbi. Mo mû Marc na terê ti mo, mo ga na lo, ndali ti so lo lingbi ti mû na mbi maboko na yâ ti kua ni. 12 Me mbi tokua Tychique+ na Éphèse. 13 Na gango ti mo, mo mû kota bongo ti dê so mbi zia ni na tïtî Carpus na kodro ti Troas so, mo mû nga arouleau, mbilimbili ati so a sara ni na poro ti nyama so.

14 Alexandre, zo ti lekengo aye na cuivre so, asara lani sioni na mbi mingi. Me, Jéhovah* ayeke kiri ande futa ni na lo alingbi na aye so lo sara.+ 15 Mo nga kue mo sara hange na lo, ndali ti so lo dë kite lani ngangu mingi na atënë ti e.

16 Na ngoi ti kozo gbungo koko ti mbi na gbele ngbanga, zo oko aga na terê ti mbi pëpe, ala kue azia mbi ahon, zia Nzapa akiri peko ni na ala pëpe. 17 Me Seigneur aluti na terê ti mbi na lo mû ngangu na mbi, si na lege ti mbi, a fa tënë ni kue si azo ti amara kue amä ni,+ na a zi mbi na yanga ti bamara.+ 18 Seigneur ayeke zi mbi ande na yâ ti asioni kusala kue na lo yeke sö mbi ndali ti Royaume ti lo ti yayu.+ Zia a mû gloire na lo lakue lakue nga kpu na kpu. Amen.

19 Mo bara na mbi Prisca na Aquila+ nga na azo ti da ti Onésiphore.+

20 Éraste+ angbâ na Corinthe, me mbi zia Trophime+ na kobela na Milet. 21 Mo sara kue ti si kozo si ngoi ti dê alingbi.

Eubule atokua bara na mo, Pudens, Linus, Claudia nga na aita kue abara mo.

22 Zia Seigneur aduti na bibe so mo yeke na ni so. Zia kota nzobe ti lo aduti na ala.