MBETI SO PAUL ATOKUA NA AHÉBREU

1 Ândö Nzapa asara tënë fani mingi nga na alege nde nde na akotara ti e na lege ti aprophète.+ 2 Me na ngoi ti fadeso* lo sara tënë na e na lege ti Molenge ti lo,+ so lo zia lo héritier ti aye kue,+ nga so na lege ti lo Nzapa asara aye ti angoi nde nde.+ 3 Lo yeke zango ti gloire ti Nzapa+ nga tâ image ti Nzapa ni,+ na lo yeke bata aye kue na fini na lege ti ngangu ti tënë ti lo. Na peko ti so lo sara kusala ti zingo siokpari ti e awe,+ lo duti na terê ti Kota Gbia na mbage ti maboko ti lo ti koli, na ndo so ayeke na nduzu mingi.+ 4 Tongaso lo ga nzoni mingi ahon a-ange,+ ndali ti so a mû na lo mbeni iri so ayeke nzoni mingi ahon ti ala.+

5 Na tapande, ange wa la si Nzapa atene na lo tënë so mbeni lâ awe? Lo tene: “Mo yeke molenge ti mbi; laso, mbi ga babâ ti mo,”+ wala: “Mbi yeke ga ande babâ ti lo na lo yeke ga molenge ti mbi.”+ 6 Me na ngoi so lo kiri lo fa Kozo Molenge ti lo+ na gigi na ndö ti sese so azo ayeke dä, lo tene: “Zia a-ange ti Nzapa kue aba li ti ala na gbe ti lo.”*

7 Nga, na sarango tënë ti a-ange, lo tene: “Lo sara a-ange ti lo ayingo, na lo sara si awakua ti lo*+ aga tongana wâ so aza.”+ 8 Me na sarango tënë ti Molenge ni, lo tene: “Nzapa ayeke trône ti mo+ lakue lakue nga kpu na kpu; keke ti komandema ti Royaume ti mo ayeke keke ti komandema ti mbilimbili. 9 Mo ye mbilimbili na mo ke tënë ti kpengo ndia pëpe. Ndani la Nzapa, lo so ayeke Nzapa ti mo, atuku mafuta na li ti mo+ ahon amba ti mo, mafuta so amû na mo ngia mingi.”+ 10 Nga lo tene: “Seigneur, na tongo nda ni, mo zia gere ti sese, na yayu ayeke kusala ti maboko ti mo. 11 Ala yeke futi ande, me mo, mo yeke ngbâ; ala yeke ga gbagbara ni tongana mbeni bongo, 12 na mo yeke roulé ala gï tongana ti so a yeke roulé kota bongo ti dê, tongana bongo; na a yeke changé ande ala, me mo, gï mo la awe, na alango ti mo ayeke hunzi lâ oko pëpe.”+

13 Me ange wa la si na sarango tënë ti lo mbeni lâ, lo tene: “Mo duti na mbage ti maboko ti mbi ti koli, juska mbi zia awato ti mo tongana mbata ti gere ti mo”?+ 14 Ala kue ayeke ayingo so ayeke sara kua so ayeke nzoni-kue?*+ Ayingo so a tokua ala ti sara kua na azo so ayeke wara ande salut.

2 Ndani la, a yeke nzoni mingi ndali ti e ti dengi mê nzoni ahon ti kozo na aye so e mä,+ tongaso si yeke yeke e hon yongoro lâ oko pëpe.+ 2 Ndali ti so tongana gere ti tënë so a tene na lege ti a-ange+ aluti ngangu, nga tongana kengo ndia kue nga na sarango ye kue so afa so zo ake yanga awara futa ti peko ni alingbi na fango ngbanga ti mbilimbili,+ 3 e yeke kpe ande fango ngbanga ni tongana nyen?+ Ndali ti so tongana e sara mbana na kota salut tongaso, kota salut so a to nda ti fa tënë ni na lege ti Seigneur ti e+ nga azo so amä lo atene na e so a yeke tâ tënë; 4 na oko ngoi ni nga Nzapa afa so ye ni ayeke tâ tënë na lege ti afä, aye ti kpene, akusala nde nde ti ngangu+ nga na lege ti amatabisi ti yingo vulu so lo kangbi ni alingbi na ye so bê ti lo aye.+

5 Biani sese so azo ayeke duti ande dä si ayeke ga so,+ na so e ngbâ ti sara tënë ni so, Nzapa azia ni na gbe ti a-ange pëpe. 6 Me ândö mbeni témoin ni atene: “Zo ayeke nyen si mo bi bê ti mo na lo? Wala molenge ti zo ayeke nyen si mo bâ lege ti lo?+ 7 Mo kiri na lo kete kamême na gbe ti a-ange. Mo zia couronne ti gloire na ti gonda na li ti lo na mo zia lo na ndö ti akusala ti maboko ti mo. 8 Mo zia aye kue na gbe ti gere ti lo.”+ Ndali ti so Nzapa azia aye kue na gbe ti lo,+ mbeni ye oko tongaso so Nzapa azia na gbe ti lo pëpe ayeke dä pëpe.+ Tâ tënë, e de e bâ pëpe so aye kue ayeke na gbe ti gere ti lo;+ 9 me e bâ Jésus, so Nzapa akiri na lo kete kamême na gbe ti a-ange,+ na lo zia couronne ti gloire na ti gonda na li ti lo ngbanga ti so lo kui,+ si na lege ti kota nzobe ti Nzapa lo bâ pasi juska ti kui ndali ti zo oko oko kue.+

10 A yeke na lege ni ti tene, na mungo amolenge mingi ti lï na ala na yâ ti gloire,+ lo so aye kue ayeke ndali ti lo nga so aye kue aga na lege ti lo asara si Kota Mokonzi ti salut ti ala+ aga mbilimbili-kue na lege ti apasi so lo bâ.+ 11 Ndali ti so, lo so ayeke sara si azo aga nzoni-kue nga ala so a yeke sara ala ti ga nzoni-kue,+ ala kue alondo gï na zo oko;+ ndani la si kamene asara lo pëpe ti iri ala aita ti lo,+ 12 na ngoi so lo tene: “Mbi yeke fa ande iri ti mo na aita ti mbi. Mbi yeke he bia ande ti sepela mo na yâ ti congrégation.”+ 13 Lo tene nga: “Mbi yeke zia ande bê ti mbi na ndö ti lo.”+ Ti mbeni nga, lo tene: “Bâ, mbi na akete molenge so Jéhovah* amû na mbi la.”+

14 Tongaso, ndali ti so “akete molenge” ni ayeke ti mênë na ti mitele, lo nga kue lo ga ti mênë na ti mitele,+ si na lege ti kuâ ti lo, lo neka lo so ayeke na ngangu ti ga na kuâ,+ so ti tene Zabolo,+ 15 nga si lo zi ala kue so, ndali ti mbeto ti kuâ,+ a mû ala na ngbâa na yâ ti gigi ti ala kue. 16 Ti bâ ni nzoni, lo mû maboko na a-ange pëpe, me lo mû maboko na hale* ti Abraham.+ 17 Ndani la si a lingbi lo ga tongana “aita” ti lo na yâ ti aye kue,+ tongaso si lo lingbi ti duti mbeni kota prêtre so ahinga ti sara nzoni bê na zo nga so ayeke be-ta-zo na yâ ti aye so abâ Nzapa, si lo mû sandaga so amû lege ti leke songo na popo ti zo na Nzapa, sandaga+ ndali ti asiokpari ti azo.+ 18 So lo wani lo bâ pasi na ngoi so lo yeke na yâ ti tara so,+ lo lingbi nga ti mû maboko na ala so ayeke na yâ ti tara.+

3 Tongaso, ala aita so ayeke azo ti be-vulu, ala so a iri ala nga ti gue na yayu,+ ala bi bê ti ala nzoni na bazengele nga kota prêtre so e tene e mä na bê na lo: Jésus.+ 2 Lo duti lani be-ta-zo na Nzapa so asara si lo ga tongaso,+ tongana ti so Moïse nga aduti ândö be-ta-zo na yâ ti da ti Nzapa kue.+ 3 Biani, a bâ so Jésus alingbi na gloire mingi+ ahon Moïse, ndali ti so zo so asara da ayeke na gonda mingi ahon da ni wani. 4 Biani, da oko oko kue, mbeni zo la asara ni, me zo so asara aye kue ayeke Nzapa. 5 Moïse aduti be-ta-zo na yâ ti aye kue ti da ti Nzapa tongana zo ti kua. Ye so lo sara afa tënë ti aye so a yeke sara tënë ni gbândä, 6 me Christ aduti be-ta-zo na ndö ti da ti Nzapa tongana Molenge.+ E yeke da ti Nzapa,+ tongana e ngbâ gï na lege so e yeke sara tënë na kamene pëpe nga na lege so e yeke pika kate ti e na ndö ti beku ti e, na e sara tongaso juska na nda ni.

7 Ndani la, gï tongana ti so yingo vulu atene:+ “Laso, tongana ala mä go ti lo, 8 ala kpengba bê ti ala pëpe tongana ti ngoi so akotara ti ala asara si ngonzo agbu mbi ngangu, na lango so ala zia mbi na tara na yâ ti benyama,+ 9 ndo so akotara ti ala atara bê ti mbi dä, atâa so ala bâ lani akusala ti mbi ngu 40.+ 10 Ni la si nzara ti azo ti ngoi ni so asigi na bê ti mbi si mbi tene: ‘Lakue na yâ ti bê ti ala, ala yeke girisa lege nga ala hinga alege ti mbi pëpe.’ 11 Tongaso, na yâ ti ngonzo ti mbi, mbi deba yanga, mbi tene: ‘Ala yeke lï ande na yâ ti wungo terê ti mbi pëpe.’”+

12 Aita, ala sara hange si mbeni sioni bê so mabe amanke ni amaï na yâ ti mbeni zo na popo ti ala pëpe ngbanga ti so lo gue yongoro na Nzapa so ayeke na fini.+ 13 Me ala ngbâ ti wa terê na popo ti ala lâ oko oko, na ngoi kue so a ngbâ ti iri ni “Laso”,+ si bê ti mbeni zo na popo ti ala akpengba pëpe ndali ti ngangu so siokpari ayeke na ni ti handa zo. 14 Biani, e ga azo so awara nga ye so Christ awara gï tongana e ngbâ ti gbu ngangu juska na nda ni beku so e yeke na ni lani na tongo nda ni.+ 15 Tongana ti so a tene: “Laso, tongana ala mä go ti lo, ala kpengba bê ti ala pëpe tongana ti ngoi so akotara ti ala asara si ngonzo agbu mbi ngangu.”+

16 Ala so amä tënë ti lo me ala sara si ngonzo agbu lo ngangu ayeke azo wa? A yeke ala kue so asigi na Égypte na gbe ti Moïse so ape?+ 17 Nga, azo wa la si nzara ti ala asigi na yâ ti bê ti Nzapa ngu 40 so?+ A yeke ala so asara siokpari si kuâ ti ala atï lani na yâ ti benyama so ape?+ 18 Me na azo wa la si lo deba yanga ti lo lani lo tene ala yeke lï na yâ ti wungo terê ti lo ape so? A yeke gï ala so ake yanga so ape? 19 Tongaso, e bâ so azo so alingbi lani pëpe ti lï dä ndali ti so mabe amanke ala.+

4 Tongaso, ndali ti so mbeni zendo ti lingo na yâ ti wungo terê ti lo angbâ, zia e sara hange si mbeni lâ ye ni aduti pëpe mo bâ mo tene mbeni zo na popo ti e awara lege pëpe ti si dä.+ 2 Ndali ti so e nga kue a fa nzoni tënë ni na e,+ tongana ti so a fa ni na ala ândö; me tënë ni so ala mä so asara ye oko na ala pëpe, ngbanga ti so, na lege ti mabe, ala duti lani beoko pëpe na azo so amä ni. 3 E so e yeke na mabe, e lï ti e biani na yâ ti wungo terê ti lo, gï tongana ti so lo tene: “Tongaso, na yâ ti ngonzo ti mbi, mbi deba yanga, mbi tene: ‘Ala yeke lï ande na yâ ti wungo terê ti mbi pëpe,’”+ atâa so akusala ti lo ahunzi lani awe ngbene ye so a zia gere ti dunia.+ 4 Biani, na yâ ti mbeni mbage ti Mbeti ti Nzapa, lo tene tënë so na ndö ti lango mbasambala ni, lo tene: “Nzapa awu terê ti lo na peko ti akusala ti lo kue na lango mbasambala ni,”+ 5 nga na yâ ti mbeni mbage ni so, lo tene: “Ala yeke lï ande na yâ ti wungo terê ti mbi pëpe.”+

6 Ni la, so lege angbâ ti tene ambeni zo alï na yâ ti wungo terê ni, nga ndali ti so ala so a fa nzoni tënë ni kozo na ala alï dä pëpe ndali ti so ala ke yanga,+ 7 angu mingi na pekoni, lo kiri lo fa mbeni lango tongana lo sara kusala na tënë “Laso” na yâ ti psaume ti David; gï tongana ti so a tene ni fade awe, a tene: “Laso, tongana ala mä go ti lo, ala kpengba bê ti ala pëpe.”+ 8 Biani, tongana fade Josué+ ague na ala na mbeni ndo ti wungo terê, ka Nzapa akiri asara tënë ti mbeni lango ni nde na pekoni pëpe. 9 So aye ti tene so mbeni sabbat ti wungo terê angbâ ndali ti azo ti Nzapa.+ 10 Ndali ti so, zo so alï na yâ ti wungo terê ti Nzapa, lo wu terê ti lo nga na akusala ti lo, gï tongana ti so Nzapa nga kue awu lani terê ti lo na akusala ti lo.+

11 Tongaso, zia e sara ngangu kue ti lï na yâ ti wungo terê so, si mbeni zo atï na yâ ti mara ti tapande ti kengo yanga so pëpe.+ 12 Biani, tënë ti Nzapa ayeke na fini na ayeke na ngangu ti sara ye,+ a za ahon épée+ so yanga ni ayeke use na a kpo a lï juska a kangbi popo ti âme* na yingo,* a kangbi nga popo ti ando so abio atingbi terê dä na mafuta ti yâ ti abio ni, na a lingbi ti hinga nda ti abibe ti bê ti zo nga na aye so bê ti zo ni aye ti sara. 13 Mbeni ye so Nzapa asara so ahonde na lê ti lo ayeke dä pëpe,+ me aye kue ayeke na gigi senge nga aluti dandara na lê ti lo so e yeke na tënë ti kiri na ni na lo.+

14 Tongaso, so e yeke na mbeni kota prêtre so ahon atanga ni kue, Jésus Molenge ti Nzapa,+ lo so lo fâ yâ ti yayu si lo hon, zia e ngbâ ti tene dandara so e mä na bê na lo.+ 15 Biani, kota prêtre so e yeke na ni ayeke pëpe zo so alingbi pëpe ti bâ mawa ti e na ando so e woko dä,+ me a yeke mbeni zo so a tara lo na yâ ti aye kue legeoko tongana e, me a wara siokpari na yâ ti terê ti lo pëpe.+ 16 Tongaso, na sarango tënë na kamene pëpe, zia e ga nduru na trône ti kota nzobe ti Nzapa,+ si a lingbi ti sara nzoni bê na e nga a sara kota nzobe na e si amû maboko na e na tâ ngoi ni.

5 Biani kota prêtre kue so a mû lo na popo ti azo, a zia lo ti tene lo sara kua ti Nzapa+ ndali ti ala na ndö ti aye so abâ Nzapa, tongaso si lo lingbi ti mû amatabisi nga na asandaga ndali ti asiokpari ti ala.+ 2 Lo lingbi ti bâ mawa* ti ala so ahinga ye pëpe si agirisa lege, ndali ti so lo nga lo yeke na awokongo ti lo wani, 3 ndani la si a lingbi lo yâa asandaga ndali ti siokpari ti lo wani nga ndali ti siokpari ti azo ti mara ni.+

4 Mbeni zo ayeke wara mara ti gonda tongaso gï na li ti lo wani pëpe, me lo yeke wara ni gï tongana Nzapa la airi lo si, tongana ti so lo iri ândö Aaron.+ 5 Ni la, ti Christ ayeke nga tongaso: lo wani+ la si amû gloire na terê ti lo pëpe na gango kota prêtre, me zo so amû gloire ni na lo ayeke Nzapa so atene tënë so na ndö ti lo, atene: “Mo yeke molenge ti mbi; laso, mbi ga babâ ti mo.”+ 6 Lo tene nga na yâ ti mbeni mbage ti Mbeti ti Nzapa, lo tene: “Mo yeke prêtre kpu na kpu tongana ti Melkisédek.”+

7 Na ngoi so Christ ayeke na fini na sese,* lo voro terê ti lo na yâ ti asambela, lo dekongo ngangu nga lo toto na ngu ti lê+ ti hunda aye so agbu bê ti lo na Nzapa so alingbi ti sö lo na kuâ, a mä lo nzoni ndali ti so lo kpe mbeto ti Nzapa. 8 Atâa so lo yeke molenge ti Nzapa, lo manda mango yanga na lege ti apasi so lo bâ.+ 9 Na peko ti aye so kue, lo ga zo so alingbi biani,+ ye so asara si lo ga zo ti mungo salut ti lakue lakue na ala kue so amä yanga ti lo,+ 10 ngbanga ti so Nzapa azia lo kota prêtre tongana ti Melkisédek.+

11 E yeke na aye mingi ti sara tënë ni na ndö ti lo, me a yeke ngangu ti fa ndani, ndali ti so ala ga azo so ane nengo na mango tënë. 12 Ngoi ahon mingi awe so ala lingbi fade ti ga awafango ye, me ala yeke na bezoin ti tene mbeni zo akiri afa ye na ala, a to nda ni na akozo tënë+ ti atënë so ayeke nzoni-kue, so alondo na yanga ti Nzapa; na ala ga azo so ayeke gï na bezoin ti lait, me ti kpengbango kobe pëpe. 13 Ndali ti so zo so anyon lait ahinga pëpe tënë ti ye so ayeke mbilimbili, ndali ti so lo ngbâ kete molenge.+ 14 Me kpengbango kobe ayeke ti abiazo, azo so, na lege ti sarango kusala na ngangu ti gbungo li ti ala, asara si ngangu ti gbungo li ti ala ni aga nzoni awe ti hinga popo ti ye ti nzoni na ye ti sioni.

6 So e hon akozo fango ye+ na ndö ti Christ awe, zia e sara kue ti ga abiazo,+ na e kiri e zia mbeni fini gere ti ye pëpe, so ti tene: changengo bê ndali ti akusala so ayeke senge senge, tënë ti mango na bê na Nzapa, 2 fango ye na ndö ti abatême na ziango maboko+ na ndö ti azo, tënë ti zingongo ti akuâ+ nga na ti ngbanga ti lakue lakue. 3 A yeke ye so e yeke sara ande tongana Nzapa azia lege na ni biani.

4 Ti azo so ândö lumière ti Nzapa aza na lê ti ala gï fani oko biani biani awe,+ ala so atara matabisi ti yayu so a mû senge senge, ala so awara yingo vulu, 5 ala so atara pendere tënë ti Nzapa nga na angangu ti aye ti ngoi so ayeke ga, 6 tongana ala tï,+ lege ayeke dä pëpe ti kiri na ala na fini ti tene ala changé bê ti ala, ngbanga ti so ala wani ala kiri ala pika Molenge ti Nzapa na pointe na ndö ti keke na ala sara si lo ga ye ti kamene na lê ti azo.+ 7 Biani Nzapa ayeke iri tënë nzoni na ndö ti sese, nga sese ni ayeke nyon ngu-nzapa so ayeke pika fani mingi na ndö ni, si na pekoni alê ti kobe asigi ndali ti ala so a dë yaka ni. 8 Me tongana sese ni so adü akî na asisi, a yeke dö ni a zia na a ngbâ gï ti tene a deba ni, na nda ni a yeke zö ni.

9 Me ti ala so e ndoye ala mingi, atâa so e sara tënë tongaso, e hinga biani e tene ala yeke sara aye so ayeke nzoni mingi nga so ayeke gue na ala ti wara salut. 10 Biani, Nzapa ayeke kirikiri pëpe si lo girisa kusala ti ala nga na ndoye so ala fa ndali ti iri ti lo+ na lege so ala sara kua na azo ti be-vulu na ala ngbâ ti sara kua na ala. 11 Me, e ye si ala oko oko ayapu nga tongaso na sarango kua, tongaso si ala zia bê ti ala kue na ndö ti beku ni+ so juska na nda ni,+ 12 si ala duti azo ti goigoi pëpe,+ me azo so asara ye tongana ti ala so, na lege ti mabe nga na kangango bê ti ku ye, awara azendo so a mû ni.

13 Na ngoi so Nzapa amû lani zendo na Abraham, mbeni zo so ayeke kota ti tene lo deba na iri ti lo ayeke dä pëpe, tongaso Nzapa adeba na iri ti lo wani,+ 14 lo tene: “Ti tâ tënë ni, mbi yeke iri ande tënë nzoni na ndö ti mo; ti tâ tënë ni, mbi yeke sara ande si mo wu mingi.”+ 15 Ndali ti so Abraham afa so lo hinga ti kanga bê ti ku ye, lo wara zendo ni so. 16 Biani, azo ayeke deba na iri ti mbeni zo so ayeke kota ahon ala, deba ti ala ni ahunzi apapa kue, ndali ti so na lê ti ala a yeke mbeni ye so afa biani atene tënë ni ahunzi biaku na popo ti ala awe.+ 17 A yeke nga tongaso, na ngoi so Nzapa aleke ti fa tâ polele na ahéritier ti zendo ni+ so ye so lo leke ni alingbi ti changé pëpe, lo deba yanga ti lo ti fa so ye ni ayeke tâ tënë, 18 si na lege ti aye use so a lingbi ti changé ni pëpe nga so Nzapa alingbi ti tene mvene dä lâ oko pëpe,+ e so e kpe e honde terê ti e na ndo so Nzapa aleke, e wara kpengba wango so apusu e ti gbu beku so a zia na gbele e. 19 Beku so+ e yeke na ni so, a yeke tongana kale ti bateau ndali ti âme* ti e. Beku ni so aluti nzoni nga aluti ngangu, na ahon na yâ ti rideau ni ti lï kâ,+ 20 na ndo so kozo zo ni, so ti tene Jésus,+ alï dä ndali ti e, lo so lo ga kota prêtre kpu na kpu tongana ti Melkisédek.+

7 Melkisédek ni so ayeke gbia ti Salem, lo yeke prêtre ti Nzapa so ayeke na nduzu na ndö ti aye kue, lo la lo tingbi lani na Abraham na ngoi so Abraham ayeke kiri na peko ti fango agbia, si lo iri tënë nzoni na ndö ti Abraham.+ 2 Abraham amû na lo dîme ti aye kue. Kozoni kue, nda ti iri ti Melkisédek ayeke “Gbia ti mbilimbili”, me lo yeke nga gbia ti Salem, so ti tene “Gbia ti siriri.” 3 Lo yeke na babâ pëpe, lo yeke na mama pëpe, molongo ti iri ti akotara ti lo ayeke dä pëpe, tongo nda ti gigi ti lo ayeke dä pëpe na hunzingo ni nga ayeke dä pëpe; me so a sara si lo yeke tongana Molenge ti Nzapa, lo ngbâ prêtre kpu na kpu.+

4 Ala bâ tongana nyen la koli so ayeke kota mingi ma! Koli so Abraham, mokonzi ti sewa, amû na lo dîme ti anzoni ye so lo wara na lege ti bira.+ 5 Tâ tënë, na popo ti amolenge ti Lévi,+ akoli so awara lege ti sara kua ti prêtre, a mû yanga na ala ti ro adîme na maboko ti azo ti mara ni alingbi na ye so Ndia ahunda,+ na ala yeke ro ni na maboko ti aita ti ala, atâa so aita ti ala ni nga kue ayeke ahale ti Abraham. 6 Me koli so asigi na yâ ti mara ti Lévi pëpe so amû dîme na maboko ti Abraham na lo iri tufa na ndö ti Abraham so Nzapa amû na lo lani azendo.+ 7 Kite oko ayeke dä pëpe: zo so ayeke kota mingi la si ayeke iri tufa na ndö ti zo so ayeke kete. 8 Ti kozo tapande ni, a yeke azo so ayeke kui kuingo la si ayeke mû adîme; me ti use tapande ni, a yeke zo so Mbeti ti Nzapa afa atene lo yeke na fini.+ 9 Mbi lingbi ti tene nga so, na lege ti Abraham, même Lévi so a yeke mû ka na lo adîme so, lo mû dîme na Melkisédek, 10 ndali ti so lo ngbâ ândö na yâ ti kotara ti lo Abraham na ngoi so Melkisédek atingbi na Abraham ni.+

11 Tongana biani zo ayeke ga mbilimbili-kue na lege ti kusala ti aprêtre ti mara ti Lévi+ (ndali ti so a zia tënë ti kusala ti aprêtre ti mara ti Lévi na yâ ti Ndia so a mû na mara ni), ngbanga ti nyen a kiri a hunda ti tene mbeni prêtre alondo, so a tene lo yeke londo tongana ti Melkisédek,+ me tongana ti Aaron ape? 12 So a yeke changé lege ti kua ti aprêtre ni, a yeke hunda nga ti tene a changé Ndia ni.+ 13 Biani, zo so a sara atënë so na ndö ti lo so ayeke lani mbeni zo ti mara nde, mbeni mara so zo oko ti yâ ni asara kua ti yango sandaga na ndö ti gbalaka pëpe.+ 14 A yeke polele so Seigneur ti e alondo na yâ ti mara ti Juda,+ mbeni mara so Moïse atene pëpe atene so aprêtre ayeke londo na yâ ni.

15 Na lê ti tënë ni akiri asigi polele mingi na lege so mbeni prêtre+ nde abâ gigi, lo yeke tongana Melkisédek.+ 16 Lo ni so, lo ga prêtre ni pëpe na lege ti commandement ti hale so ayeke ti mitele, me na lege ti ngangu ti mbeni fini so a lingbi ti futi ni pëpe,+ 17 ndali ti so a sara tënë so na ndö ti lo, a tene: “Mo yeke prêtre kpu na kpu tongana ti Melkisédek.”+

18 Biani, a pusu ngbene commandement ni yamba ngbanga ti so ayeke na ngangu pëpe nga alingbi ti sara mbeni ye pëpe.+ 19 Ndia asara pëpe si mbeni ye aga mbilimbili-kue,+ me na ngoi so beku so ayeke nzoni+ asi, beku ni so asara si ye aga mbilimbili-kue. A yeke na lege ti beku ni la e yeke ga nduru na Nzapa.+ 20 Nga, legeoko tongana ti so ye ni asi na lege ti dengo bä ti yanga, 21 (biani ambeni zo aga aprêtre sân dengo bä ti yanga, me ti lo, lo ga ti lo prêtre na lege ti dengo bä ti yanga ti Lo so adeba yanga na ndö ti lo, na lo tene: “Jéhovah* adeba yanga ti lo awe lo yeke changé yanga ti lo pëpe,* lo tene: ‘Mo yeke prêtre kpu na kpu;’”)+ 22 tongaso Jésus aga tongana ye so a mû ni ti fa so mbeni mbele so ayeke nzoni ahon ti kozo ni so ayeke dä biani.+ 23 Nga, azo mingi aga ândö aprêtre na peko ti terê+ ngbanga ti so kuâ akanga lege na ala ti ngbâ ti sara kua ti prêtre, 24 me ti lo, ndali ti so lo yeke ngbâ na fini lakue lakue,+ mbeni zo ti mû kua ti prêtre na peko ti lo ayeke dä pëpe. 25 Ndani la, ala so ayeke ga nduru na Nzapa na lege ti lo, lo lingbi nga ti sö ala biani biani, ngbanga ti so lo yeke lakue na fini ti hunda ye ndali ti ala.+

26 Mara ti kota prêtre tongaso la si alingbi na e: lo yeke be-ta-zo, tënë ayeke na li ti lo pëpe, sioni ye oko ayeke na terê ti lo pëpe,+ kangbi ayeke na popo ti lo na awasiokpari nga a yâa lo na nduzu ahon yayu.+ 27 Lo yeke ti lo nde na akota prêtre so, lo yeke na bezoin pëpe ti mû asandaga lâ na lâ+ ndali ti asiokpari ti lo wani nga ndali ti azo ti mara ni+ tongana ti so akota prêtre ayeke sara ândö, ndali ti so lo sara ye ni so gï fani oko biani biani awe tongana lo mû lani terê ti lo na sandaga.+ 28 Biani, Ndia azia na kua ti kota prêtre azo so ayeke na wokongo,+ me tënë ti dengo bä ti yanga so aga ti lo+ na peko ti Ndia azia na kua ni mbeni Molenge so a sara si lo ga zo so alingbi biani+ kpu na kpu.

8 Âdu ti aye so e yeke sara tënë ni so, kota tënë ni ayeke so: E yeke na mbeni kota prêtre tongaso,+ na lo duti na terê ti trône ti Kota Gbia na yayu na mbage ti koli,+ 2 lo yeke mbeni wakua ndali ti nzoni ti azo na ndo so ayeke nzoni-kue+ nga na yâ ti tâ tente so Jéhovah* si ayâa ni na nduzu, me zo pëpe. 3 A zia kota prêtre oko oko kue na kusala ti mû amatabisi na asandaga na Nzapa; ni la, a hunda ti tene lo so nga kue aduti na mbeni ye ti mû na Nzapa.+ 4 Tongana fade lo ngbâ na ndö ti sese, ka lo duti prêtre pëpe,+ ndali ti so azo ayeke dä awe ti mû amatabisi na Nzapa alingbi na ti so Ndia afa. 5 Me, azo ni so ayeke sara kusala so ayeke nzoni-kue na yâ ti mbeni ye so akpa aye ti yayu ni kpango nga ayeke gbe ti dê+ ti aye ti yayu ni.+ A yeke gï tongana ti so, na ngoi so Moïse ayeke lani nduru ti sara kua ti lekengo tente ni kue, Nzapa amû yanga na lo atene: “Bâ nzoni si mo sara aye ni kue alingbi gï na tapande ti aye so a fa na mo lani na ndö ti hoto so.”+ 6 Me fadeso, kua so a mû na Jésus ti sara ndali ti nzoni ti azo ayeke nzoni mingi ahon ti ala; ndali ti so lo yeke nga walekengo-songo+ ti mbeni mbele+ so ayeke nzoni mingi, so a zia gere ni na sese na lege ti ndia si a luti na ndö ti azendo so ayeke nzoni mingi.+

7 Tongana kozo mbele ni ayeke fade na sioni oko pëpe, ka a yeke na bezoin ti mbeni use mbele pëpe.+ 8 Ndali ti so lo bâ so tënë ayeke na li ti azo ni, ni la si lo tene: “Jéhovah* atene: ‘Bâ, alango ayeke ga so mbi yeke te ande mbeni fini mbele na azo ti da ti Israël nga na azo ti da ti Juda; 9 mbele ni so ayeke duti pëpe tongana ti so mbi te lani na akotara ti ala na lango so mbi gbu maboko ti ala ti sigi na ala na kodro ti Égypte,+ ngbanga ti so akotara ti ala angbâ na yâ ti mbele ti mbi pëpe, ni la si mbi zia ti bâ lege ti ala,’ tënë ti yanga ti Jéhovah* la.”

10 “Jéhovah* atene: ‘Mbele so mbi yeke te ande na azo ti Israël na peko ti alango ni so ayeke duti tongaso: Mbi yeke zia andia ti mbi na yâ ti li ti ala na mbi yeke sû ni na ndö ti bê ti ala.+ Mbi yeke ga Nzapa ti ala, na ala yeke ga azo ti mbi.+

11 “‘Ala yeke fa ande ye encore ape na amba ti ala molenge ti kodro nga na aita ti ala, atene: “Hinga Jéhovah!” Ndali ti so ala kue ayeke hinga ande mbi, ti londo na asenge zo ti si na akota zo na popo ti ala. 12 Ngbanga ti so mbi yeke pardonné ande ala ndali ti aye ti sioni so ala sara, na mbi yeke dabe ti mbi na asiokpari ti ala encore ape.’”+

13 Tongana lo tene tënë ti “mbeni fini mbele”, lo sara si kozo mbele ni aga ngbene ye.+ Ye so lo sara si aga ngbene ye nga gbagbara ye so, a ga nduru ti girisa awe.+

9 Âdu ti ngbene mbele so, lo yeke ândö na andia ti kusala so ayeke nzoni-kue nga na mbeni ndo so ayeke nzoni-kue so ayeke na ndö ti sese.+ 2 Ndali ti so a leke kozo kubu ti tente ni so a yeke wara na yâ ni ye ti yongo lampe,+ table nga na amapa ti ziango ni na gbele Nzapa so ayeke na ndö ni;*+ a iri kubu so Ndo so ayeke nzoni-kue.+ 3 Na peko ti use rideau ni,+ a yeke wara mbeni kubu ti tente ni so a iri ni Ndo so ayeke nzoni kue kue kue.+ 4 Na yâ ni, a yeke wara kete ta ti lor+ ti zongo na dukane nga na sanduku ti mbele+ so terê ni kue ayeke na lor;+ na yâ ti sanduku ni, a yeke wara kete ta ti lor so manne ayeke na yâ ni,+ keke ti Aaron so afleur asigi kete na terê ni+ nga na akete tableau ti tênë+ ti mbele ni. 5 Na ndö ti sanduku ni, a yeke wara achérubin so aza zango na so gbe ti dê ti ala amû ndö ti yanga ti sanduku ni kue.*+ Me so ngoi ti sarango tënë na ndö ti aye so oko na oko la pëpe.

6 Na peko ti so a leke aye so tongaso awe, aprêtre ni ayeke lï lakue na yâ ti kozo kubu ni ti sara akua ti Nzapa.+ 7 Me ti use kubu ni, gï kota prêtre lo oko la si ayeke lï dä fani oko na yâ ti ngu oko;+ lo yeke lï lakue na mênë+ so lo yeke mû ni na sandaga ndali ti lo wani+ nga ndali ti asiokpari so azo ti mara ni+ asara na mbana pëpe. 8 Na sarango tongaso yingo vulu afa polele so ade a zi lani pëpe yanga ti lege ti guengo na ndo so ayeke nzoni-kue na ngoi so kozo tente ni angbâ.+ 9 Tente so ayeke tapande ndali ti ngoi ti fadeso,+ na ti lingbi na tapande ni so, a ngbâ ti mû amatabisi nga na asandaga na Nzapa.+ Me, aye so alingbi pëpe ti sara si conscience ti zo so ayeke sara kua ti Nzapa aga mbilimbili-kue.+ 10 Me aye ni so andu gï tënë ti akobe, aye ti nyongo ni nga na abatême nde nde.+ A yeke aye so ndia ahunda so andu aye ti mitele,+ na a hunda ti sara aye so juska na ngoi so a fa awe, ngoi ti kiri na aye na lege ni.

11 Ye oko, na ngoi so Christ aga lani tongana mbeni kota prêtre ti anzoni ye so asi na ndembe so awe, lo lï na yâ ti tente so ayeke kota mingi nga so ayeke mbilimbili-kue ahon ti kozoni so, tente so maboko ti zo la asara ni pëpe, so ti tene a yeke ti ndö ti sese ge pëpe. 12 Lo lï na ndo so ayeke nzoni-kue, lo lï na mênë ti akoli-ngasa wala ti akete koli-bagara pëpe, me lo lï na mênë ti lo wani+ gï fani oko biani biani awe na lo wara lege ti zi e teti lakue lakue.+ 13 Asingana mênë ti akoli-ngasa+ na ti akoli-bagara nga na mburu ti wâ ti wali-bagara so a fi ni na terê ti azo so aga sioni, a yeke sara si ala ga nzoni-kue so,+ 14 si fade mênë ti Christ+ alingbi ti sukula conscience ti e na azi akusala so ayeke senge senge si e lingbi ti sara kusala so ayeke nzoni-kue na Nzapa so ayeke na fini so ape?+ Christ so, na lege ti yingo so ayeke ngbâ lakue lakue, amû terê ti lo wani na sandaga na Nzapa tongana sandaga so sioni ayeke dä pëpe.+

15 Ndani la lo yeke walekengo-songo ti mbeni fini mbele,+ si ala so a iri ala alingbi ti wara zendo ti aye ti nzoni so angbâ lakue lakue, ngbanga ti so lo kui ti zi ala+ na yâ ti kengo ndia so ala ke na gbe ti ngbene mbele ni, na a zi ala na lege ti ye so a futa ti zi zo.+ 16 Biani tongana a te mbeni mbele, a hunda ti tene zo ti tengo mbele ni akui, 17 ndali ti so mbeni mbele ayeke duti na ngangu gï tongana kuâ ayeke dä, ngbanga ti so a yeke duti na ngangu pëpe na ngoi kue so zo ti tengo mbele ni angbâ na fini. 18 Ndani la si ngbene mbele ni nga awara lani ngangu gï na peko ti so mênë atuku. 19 Tongana Moïse afa lani acommandement kue ti Ndia na azo ti mara ni kue awe, lo mû mênë ti akete koli-bagara na ti akoli-ngasa, ngu, bengba kuä ti terê ti taba nga na keke ti hysope na lo fi ni na terê ti mbeti* ni nga na terê ti azo ti mara ni kue, 20 si lo tene: “So mênë ti mbele so Nzapa amû yanga na ala ti bata ni so la.”+ 21 Lo fi nga mênë ni na terê ti tente ni nga na agbakuru kue so a yeke sara na kusala ndali ti nzoni ti azo ni.+ 22 Biani, na lege ti Ndia, mênë ayeke sukula mingi ti aye kue,+ na a lingbi ti mû pardon na zo gï tongana a tuku mênë si.+

23 Tongaso, a hunda nga ti tene a zi sioni ye na terê ti aye so akpa aye ti yayu ni+ kpango na lege ti asandaga ti anyama; me ti atâ ye ti yayu ni, a hunda ti sara kua na asandaga so ayeke nzoni ahon asandaga ti anyama.+ 24 Ndali ti so Christ alï pëpe na yâ ti mbeni ndo so ayeke nzoni-kue so maboko ti zo la si asara+ na so akpa gï tâ ye ni kpango,+ me lo lï tâ na yayu+ si fadeso lo si na gbele Nzapa ndali ti e.+ 25 Lo mû terê ti lo fani mingi pëpe na sandaga, tongana ti so ngu na ngu+ kota prêtre ayeke lï na yâ ti ndo so ayeke nzoni-kue na mênë ti lo wani pëpe. 26 Tongana a yeke fade tongaso, ka a lingbi lo bâ pasi fani mingi ti londo na ngoi so a zia gere ti dunia. Me fadeso lo fa terê ti lo gï fani oko biani biani awe tongana aye ti angoi nde nde ayeke gue ti hunzi, si lo lingbi ti zi biaku siokpari na lege ti sandaga ti terê ti lo wani.+ 27 Legeoko tongana ti so ye so aku azo kue ayeke gï ti kui fani oko awe, me na pekoni a yeke ti wara ngbanga, 28 ti Christ nga, a mû lo na sandaga gï fani oko biani biani awe ti yô asiokpari ti azo mingi;+ ti fani use ni so lo yeke si ande, a yeke teti siokpari pëpe, nga azo so ayeke ku lo kungo teti salut ti ala ayeke bâ lo ande.+

10 Biani, Ndia ayeke gï gbe ti dê+ ti anzoni ye so ayeke ga,+ me a yeke atâ ye ni pëpe, na lege ti a-oko sandaga so azo ayeke mû ka ngu na ngu, ala lingbi lâ oko pëpe ti sara si azo so ayeke ga nduru na Nzapa aga azo so ayeke mbilimbili-kue.+ 2 Tongana ye ni ayeke fade tongaso, ka a zia lege ti mungo asandaga awe, ndali ti so ala so ayeke ga na sandaga ni so, so a zi sioni ti ala awe ala yeke bâ terê ti ala tongana azo ti siokpari encore ape. 3 Me, asandaga so asara si ala yeke dabe ti ala na asiokpari ti ala ngu na ngu,+ 4 ndali ti so mênë ti akoli-bagara na ti akoli-ngasa alingbi ti zi asiokpari oko pëpe.

5 Ni la, tongana lo lï na yâ ti dunia so, lo tene: “‘Sandaga ti anyama wala ambeni sandaga nde mo ye ni pëpe, me mo leke mbeni terê ndali ti mbi. 6 Asandaga so a zö ni agbi kue nga na asandaga ndali ti siokpari anzere na mo pëpe.’+ 7 Tongaso mbi tene: ‘Nzapa, bâ, mbi ga ti sara ye so bê ti mo aye (a sû tënë na ndö ti mbi na yâ ti rouleau* ni).’”+ 8 Tongana lo tene kozoni, lo tene : “Mo ye pëpe nga a nzere na mo pëpe si a mû asandaga ti anyama, ambeni sandaga nde, asandaga so a zö ni agbi kue nga na asandaga ndali ti siokpari”, atâa so Ndia la ahunda ti mû asandaga so, 9 na pekoni lo tene: “Bâ, mbi ga ti sara ye so bê ti mo aye.”+ Lo zi ye so aga kozo, tongaso si lo zia ti use ni na sese. 10 Na lege ti ‘ye so bê ti lo aye’+ so, a sara si e ga nzoni-kue na lege ti terê ti Jésus Christ so lo mû na sandaga gï fani oko biani biani awe.+

11 Nga, prêtre oko oko ayeke gbu mbata ti kua ti lo lâ na lâ ti sara kua so ayeke nzoni-kue*+ ti mû a-oko sandaga fani mingi,+ ndali ti so asandaga so alingbi lâ oko pëpe ti zi asiokpari kue kue kue.+ 12 Me ti koli so, lo mû sandaga oko biani biani ndali ti asiokpari na lo duti na terê ti Nzapa na mbage ti maboko ti lo ti koli,+ 13 na ti londo na ngoi ni so, lo yeke ku juska ti tene a zia awato ti lo tongana mbata ti gere ti lo.+ 14 Biani, a yeke na lege ti sandaga oko la si lo mû lege na ala so a yeke sara ti tene ala ga nzoni-kue,+ ti ga mbilimbili-kue biani biani. 15 Na ndö ni, yingo vulu nga afa tënë ni na e, ndali ti so tongana yingo ni atene: 16 “Jéhovah* atene: ‘Mbele so mbi yeke te ande na ala na peko ti alango ni so ayeke duti tongaso: mbi yeke zia andia ti mbi na yâ ti bê ti ala na mbi yeke sû ni na yâ ti li ti ala.’”+ 17 Na pekoni yingo ni akiri atene: “Mbi yeke dabe ti mbi ande na asiokpari ti ala encore ape nga mbi yeke dabe ti mbi encore ape na asarango ye ti ala so ague nde na Ndia.”+ 18 So a pardonné aye so awe, a yeke na bezoin ti mû sandaga ndali ti siokpari encore ape.

19 Tongaso, aita, so e yeke na confiance ti mû lege ti lingo na ndo so ayeke nzoni-kue+ na lege ti mênë ti Jésus, 20 lege so lo zi ndali ti e tongana mbeni fini lege so ayeke na fini si ahon na yâ ti rideau ni,+ so ti tene mitele ti lo, 21 nga ndali ti so e yeke na mbeni kota prêtre so ayeke na ndö ti da ti Nzapa,+ 22 zia e ga nduru na Nzapa na vuru bê, na kite oko pëpe nga na mabe, ndali ti so na lege ti ye so a fi ni na ndö ti bê ti e, a sukula bê ti e ni awe si e duti na sioni conscience pëpe+ na a sukula terê ti e awe na ngu so ayeke na saleté pëpe.+ 23 Zia e ngbâ ti sara tënë ti beku ti e ni so dandara na e yengi pëpe,+ ndali ti so lo so amû zendo ni ayeke be-ta-zo. 24 Nga, zia e bi lê* na ndö ti mba ti pusu mba* ti duti na ndoye na ti sara anzoni kusala,+ 25 e zia pëpe lege ti guengo lakue na bungbi ti e,+ tongana ti so ambeni zo ayeke sara ka, me e wa terê na popo ti e+ nga e ngbâ ti sara ni mingi ahon ti kozo, so ala bâ lango ni ayeke pusu nduru.+

26 Biani, tongana e wara tâ hingango ye na ndö ti tâ tënë awe,+ si e ngbâ na yâ ti siokpari na mbana, sandaga ndali ti asiokpari ti e ayeke dä encore ape,+ 27 me ye so angbâ ayeke gï ti ku na mbeto na bê ngbanga nga na ngonzo so ayeke tongana wâ si ayeke gbi ande ala so ake Nzapa.+ 28 Ândö, zo so ake ti kpe Ndia ti Moïse, a yeke bâ mawa ti lo pëpe, me a yeke fâ lo na peko ti tënë ti yanga ti atémoin use wala ota,+ 29 si fade zo so adoro Molenge ti Nzapa na lo bâ tongana senge ye ngere ti mênë ti mbele+ so na lege ni a sara si lo ga nzoni-kue nga lo zonga yingo ti kota nzobe ti Nzapa sioni sioni, lo lingbi ande na mbeni sioni punition ahon so ape?+ 30 E hinga zo so atene tënë so: “Mbi la mbi yeke kiri na zo peko ti sioni so lo sara, mbi la mbi yeke kiri na ni”; na a kiri a tene: “Jéhovah* ayeke fâ ande ngbanga ti azo ti lo.”+ 31 A yeke tâ ye ti mbeto mingi ti tï na maboko ti Nzapa so ayeke na fini.

32 Me, zia ala ngbâ ti dabe ti ala na angoi ti ândö, so na peko ti so lumière ti Nzapa aza na lê ti ala awe,+ ala kanga bê ti ala na yâ ti kota tiri na apasi. 33 Na mbeni ngoi, a sigi na ala dandara tongana ti so a yeke sara na yâ ti mbeni da ti ngia si azo azonga ala na asara pasi na ala; na mbeni ngoi, ala ga azo so asara beoko na azo so mara ti aye ni so ayeke si na ala. 34 Biani, ala kangbi mawa na ala so ayeke na da ti kanga nga ala yeda na ngia ti tene a gbu aye ti ala na ngangu a hon na ni,+ ndali ti so ala hinga so ala yeke na mbeni ye so ayeke nzoni ahon aye so, nga so ayeke ngbâ lakue lakue.+

35 Tongaso, ala zia pëpe lege ti sarango tënë na mbeto pëpe, so futa ti pekoni ayeke duti ande kota mingi.+ 36 Ni la, ala bezoin gbungo ngangu,+ si na peko ti so ala sara ye so bê ti Nzapa aye awe, ala wara ye ti peko ti zendo ni. 37 Ndali ti so “na yâ ti kete ngoi,+ lo so angbâ ti ga so lo yeke si ande na retard ape.”+ 38 “Me zo ti mbi so ayeke mbilimbili ayeke ngbâ ande na fini ndali ti mabe,”+ na “tongana lo kiri na peko, mbi yeke* wara ngia na mbage ti lo pëpe.”+ 39 E yeke pëpe ti azo so ayeke kiri na peko si a futi ala,+ me e yeke ti azo so ayeke na mabe si a bata ala* na fini.

11 Mabe ayeke hingango biani so aye so mo yeke ku ni kungo ayeke si biani.+ A yeke nga fango polele na gigi ye so afa atene aye so mo bâ ni pëpe ayeke dä biani. 2 A yeke na lege ti mabe ni so la si a sara lani nzoni tënë ti akotara ti e.

3 Na lege ti mabe, e bâ so a leke aye ti angoi nde nde na molongo ni na lege ti tënë ti yanga ti Nzapa, si aye so lê abâ ni asigi na lege ti aye so afa terê ti ala na gigi pëpe.

4 Na lege ti mabe, Abel amû na Nzapa mbeni sandaga so ngere ni ayeke kota mingi ahon ti Caïn;+ na lege ti mabe ni so, a sara nzoni tënë ti lo a tene lo yeke zo ti mbilimbili, ndali ti so Nzapa ayeda* na amatabisi so lo mû.+ Atâa so lo kui awe, lo ngbâ ti sara tënë+ na lege ti mabe ti lo.

5 Na lege ti mabe, a mû Hénok+ a gue na lo na mbeni ndo nde si lo bâ kuâ pëpe, na a wara lo pëpe ndali ti so Nzapa amû lo ague na lo na mbeni ndo nde.+ Biani, kozo si a gue na lo na mbeni ndo nde, a fa na lo a tene lo nzere na lê ti Nzapa. 6 Me, tongana mabe ayeke dä pëpe zo alingbi ti nzere na lê ti Nzapa pëpe, ndali ti so zo so aga nduru na Nzapa a lingbi lo mä na bê so Nzapa ayeke dä nga so Nzapa ayeke zo so ayeke futa azo so ayeke gi lo ngangu.+

7 Na lege ti mabe, Noé+ afa so lo kpe mbeto ti Nzapa na lo leke mbeni arche+ ti sö azo ti da ti lo; lo sara tongaso na peko ti so Nzapa awa lo na ndö ti aye so ade ti bâ ni pëpe;+ na lege ti mabe ti lo, lo fâ ngbanga na ndö ti dunia+ ni na lo ga héritier ti mbilimbili so ague oko na mabe.

8 Na lege ti mabe, Abraham+ amä yanga na peko ti so a iri lo, si lo zia kodro ti lo, lo gue na mbeni ndo so a fa kozo awe a tene lo yeke wara ni tongana héritage. Lo zia kodro ni lo hon, atâa so lo hinga ndo so lo yeke gue dä so pëpe.+ 9 Na lege ti mabe, lo sara kodro tongana wande na yâ ti sese so a mû zendo ni na lo mo bâ mo tene ayeke kodro-wande.+ Lo lango na gbe ti atente,+ lo na Isaac na Jacob so ala yeke ahéritier ti oko zendo ni so legeoko na lo.+ 10 Biani lo yeke ku lani gbata so tâ gere ni ayeke dä, so zo so asara plan* ni nga zo so aleke ni ayeke Nzapa.+

11 Na lege ti mabe nga, Sara awara lege ti mû ngo,* atâa so lo hon ngu ti dungo ni awe,+ ndali ti so lo bâ zo so amû zendo ni tongana zo so ayeke be-ta-zo. 12 Ni la, na lege ti koli oko so a bâ a tene lo kui awe,+ a dü amolenge+ so ala yeke mingi mingi tongana atongoro ti yayu nga ala ga tongana mbutu ti yanga ti ngu-ingo so zo alingbi ti diko ni pëpe.+

13 Azo so kue angbâ na lege ti mabe si ala kui, me ala wara aye so a mû zendo ni so pëpe;+ ye oko, ala bâ azendo so yongoro kâ+ na ala yamba ni, na ala tene polele na yanga ti ala so ala yeke awande nga azo so aga ti sara kodro ti ninga pëpe na yâ ti kodro ni. 14 Ala so atene tënë tongaso, ala fa biani so ala yeke gi mbeni ndo biani ndali ti ala wani. 15 Tongana ala ngbâ fade ti zia bê ti ala na ngbene ndo so ala zia ni si ala hon so,+ ka ala yeke wara lege ti kiri kâ. 16 Me, fadeso ala yeke gi mbeni ndo so ayeke nzoni ahon so ala zia so, so ti tene mbeni ndo so ayeke ti yayu. Ni la, kamene asara Nzapa ndali ti ala pëpe, so ala iri ndo na lo tongana Nzapa ti ala,+ ndali ti so lo leke mbeni gbata ndali ti ala awe.+

17 Na lege ti mabe, a yeke mo bâ mo tene Abraham amû Isaac na sandaga awe na ngoi so Nzapa atara bê ti lo,+ na koli so terê ti lo anzere lani ti wara azendo ni atara ti mû gï oko molenge so lo dü ti yâa na sandaga,+ 18 atâa so a tene lani na lo, a tene: “Ye so a yeke iri ni ande hale* ti mo ayeke sigi na lege ti Isaac.”+ 19 Me lo tene na bê ti lo so Nzapa ayeke na ngangu ti zingo Isaac même na kuâ; na lo kiri lo wara Isaac tongana mbeni zo so azingo na kuâ, na ye so aduti tongana mbeni tapande ti ye.+

20 Na lege ti mabe nga, Isaac airi tufa na ndö ti Jacob+ na Ésaü+ ndali ti aye so ayeke ga.

21 Na lege ti mabe, tongana Jacob aga nduru ti kui,+ lo iri tufa na ndö ti amolenge ti Joseph+ ti koli oko na oko nga lo voro Nzapa na ngoi so lo yeke ba na ndö ti keke ti lo.+

22 Na lege ti mabe, tongana Joseph aga nduru ti kui, lo sara tënë ti sigingo ti amolenge ti Israël na Égypte; na lo mû yanga na ala ti tene ala mû abio ti lo ahon na ni.+

23 Na lege ti mabe, babâ na mama ti Moïse ahonde lo nze ota na peko ti so a dü lo,+ ndali ti so ala bâ so molenge ni ayeke pendere mingi,+ ala sara mbeto ti yanga so gbia ni amû so pëpe.+ 24 Na lege ti mabe, tongana Moïse akono awe,+ lo ke ti tene a iri lo molenge ti molenge ti Pharaon ti wali,+ 25 lo soro ti tene a sara pasi na lo legeoko na azo ti Nzapa ahon ti tene lo wara ngia na yâ ti siokpari gï ndali ti kete ngoi, 26 ngbanga ti so lo bâ ti lo zonga so a zonga na Christ tongana amosoro so ahon amosoro ti Égypte; na lo zia lê ti lo gï na ndö ti futa so a yeke mû. 27 Na lege ti mabe, lo zia kodro ti Égypte,+ lo sara mbeto ti ngonzo ti gbia ni pëpe,+ ndali ti so lo ngbâ ti luti ngangu mo bâ mo tene lo yeke bâ Lo so lê abâ lo pëpe.+ 28 Na lege ti mabe, lo sara ândö Matanga ti Pâque na lo fi mênë na ndö ti ayanga-da si wafutingo ye andu akozo molenge ti ala pëpe.+

29 Na lege ti mabe, ala hon na yâ ti kota Ngu-Bengba tongana ti so zo ayeke tambela na ndö ti kuru sese,+ me tongana azo ti Égypte atara ti hon dä, ngu ni amene ala kue.+

30 Na lege ti mabe, agbagba ti kodro ti Jéricho atuku na sese na peko ti so azo atambela angoro ni teti lango mbasambala.+ 31 Na lege ti mabe, Rahab so ayeke wali-ndumba akui legeoko pëpe na azo so ake ti mä yanga, ngbanga ti so lo yamba na siriri azo ti bembengo ndo so a tokua ala lani.+

32 Mbi kiri ti tene nyen ande? Ngoi ayeke mingi pëpe ti tene mbi ngbâ ti fa tënë ti Gédéon,+ Barak,+ Samson,+ Jephté,+ David,+ Samuel+ nga na tanga ti aprophète ni. 33 Na lege ti mabe, ala kinda aroyaume na yâ ti bira,+ ala sara ye so ayeke mbilimbili, ala wara azendo,+ ala kanga yanga ti abamara,+ 34 ala mingo ngangu ti wâ,+ ala sigi na yanga ti épée,+ na ngoi so ngangu ahunzi na ala a sara si ala ga ngangu mingi,+ ala ga angangu zo ti bira,+ ala zia loro na gere ti aturugu ti akodro-wande.+ 35 Ambeni wali ayamba azo ti ala so akui tongana a zingo azo ni na kuâ,+ me a sara pasi na ambeni zo ngbanga ti so ala ke ti tene a futa mbeni ye ti zi ala; ala sara tongaso ti tene a zingo ala na kuâ na zingongo ti akuâ so ayeke nzoni ahon ti so asi kozo. 36 Biani, ambeni awara ti ala tara ni na lege so a he ala na a pika ala na zaza, juska a zia ala na yâ ti chaîne+ na a bi ala na da ti kanga.+ 37 A bo ala na tênë,+ a tara bê ti ala, a fâ yâ ti ala na scie,* a fâ ala na épée,+ ala yü poro ti terê ti ataba+ wala ti angasa si ala tambela na ni na ando nde nde, na oko ngoi ni ye amanke ala, ala yeke na yâ ti ye ti vundu,+ a sara ye ti sioni na ala;+ 38 dunia ni akpa ti yamba azo tongaso pëpe. Ala hon kirikiri na yâ ti benyama, na ndö ti ahoto, na yâ ti adû ti tênë+ nga na yâ ti adû ti sese.

39 Azo so kue, atâa so a sara nzoni tënë ti ala ndali ti mabe ti ala, ala wara pëpe aye so a mû zendo ni so, 40 ndali ti so Nzapa abâ kozoni awe ndali ti e mbeni ye so ayeke nzoni mingi ahon atanga ni,+ tongaso si a lingbi pëpe ti sara si ala ga azo so ayeke mbilimbili-kue sân e.

12 Ni la, ndali ti so e yeke na atémoin mingi mingi tongaso so angoro e tongana mbinda, zia e zi nengo ye kue e bi ni nga na siokpari so alingbi ti gbu e hio;+ zia e gbu ngangu, e kpe loro ti mandako so a zia na gbele e,+ 2 na ngoi so lê ti e ayeke gï na ndö ti Jésus, Kota Mokonzi ti mabe ti e na lo so asara si mabe ti e alingbi kue.+ Ndali ti ngia so a zia na gbele lo, lo gbu ngangu juska lo kui na ndö ti keke ti pasi,* lo bi kamene yongoro, na fadeso lo duti na terê ti trône ti Nzapa na mbage ti koli.+ 3 Biani, ala bâ lo mbilimbili, lo so lo kanga bê ti lo na atënë so awasiokpari+ atene ti ke lo me so asara sioni gï na ala wani, tongaso si ala woko pëpe nga ngangu ahunzi na âme ti ala kue kue kue pëpe.+

4 Na yâ ti tiri ti ala na siokpari so, ade ala tiri ngangu juska mênë ti ala atuku pëpe, 5 me ala girisa biani biani awe wango so a mû na ala tongana ti so mbeni babâ amû wango na amolenge ti lo: “Molenge ti mbi, mo bâ gbotongo mê so alondo na Jéhovah* tongana senge ye pëpe, wala tongana lo kiri na mo na nzoni lege, mo ke pëpe; 6 ndali ti so zo so Jéhovah* aye lo, lo yeke gboto mê ti lo; biani, lo pika* zo kue so lo yamba lo tongana molenge ti lo.”+

7 Ala yeke na bezoin ti gbu ngangu ndali ti so a yeke tongana mbeni lege ti gbotongo mê ti* ala la. Nzapa ayeke sara ye na ala tongana amolenge ti lo.+ Molenge wa la si babâ ti lo agboto mê ti lo ape?+ 8 Me tongana ala kue awara mara ti gbotongo mê so pëpe, andâ ala yeke biani amolenge ti gigi, me ala yeke atâ molenge pëpe. 9 Nga, e yeke lani na ababâ so ayeke azo, na ala si ayeke gboto mê ti e, na e kpe mbeto ti ala. Ti tene e ngbâ na fini, a yeke ti e ti woko terê ti e na gbe ti Babâ ti fini ti e ti yingo ahon ala so ape?+ 10 Ababâ so ayeke gboto mê ti e lani ndali ti kete ngoi alingbi na ye so ala bâ ayeke nzoni na lê ti ala; me ti Nzapa, lo yeke gboto mê ti e ndali ti nzoni ti e si e ga nzoni-kue tongana lo.+ 11 Tâ tënë, a lingbi ti bâ gbotongo mê kue na ndembe ni tongana ye so amû ngia na zo pëpe, me ye so ason;* ye oko, gbândä ala so gbotongo mê ni asara kua na ndö ti ala, gbotongo mê ni ayeke lë lengo ti siriri, so ti tene mbilimbili.

12 Ni la, ala mû ngangu na amaboko so ayeke gue ti tï nga na agenou so awoko,+ 13 ala ngbâ ti leke alege so ayeke nzoni ndali ti gere ti ala,+ si gere so abuba azi na lê ti terê pëpe, me a sara si a ga nzoni. 14 Ala gi lege ngangu ti duti na siriri na azo kue,+ nga ala tomba peko ti dutingo so ayeke nzoni-kue,+ dutingo so tongana zo ayeke na ni pëpe lo lingbi ti bâ Seigneur pëpe. 15 Ala bâ ndo nzoni si a gbanzi mbeni zo na kota nzobe ti Nzapa pëpe; si mbeni sioni gunda ti keke asigi na abi wusuwusu pëpe nga si azo mingi aga sioni ndali ni pëpe;+ 16 nga ala bâ si mbeni zo ti sarango lango-sioni* wala mbeni zo so ayeke ne pëpe aye so ayeke nzoni-kue aduti na popo ti ala pëpe, mbeni zo tongana Ésaü so akä adroit ti lo ti kozo molenge ndali ti sembe ti kobe oko.+ 17 Na ala hinga nga so na pekoni, tongana lo hunda ti tene a iri tufa na ndö ti lo, a ke na lo, ndali ti so atâa so lo gi na ngangu nga na ngu ti lê ti tene babâ ti lo achangé yanga,+ me lo sara gbä.*

18 Ala ga lani nduru pëpe na terê ti ye so zo alingbi ti ndu ni na maboko,+ ye so wâ amû ni si ayeke gbi,+ vuko mbinda, bingo so avuko pitipiti nga kota pupu,+ 19 toto ti trompette+ na mbeni go so asara tënë;+ na mango go ni so, azo ni avoro yanga ti tene a kiri a tene mbeni tënë na ala pëpe.+ 20 Biani, ala lingbi lani pëpe ti kanga bê na yanga so a mû na ala, so atene: “Tongana mbeni nyama andu hoto ni, a lingbi a bo lo na tênë si lo kui.”+ 21 Nga, ye ni so asara zo mbeto mingi si Moïse atene: “Mbeto agbu mbi nga terê ti mbi ayeke dö dongo.”+ 22 Me ala ga nduru na mbeni Hoto ti Sion+ nga na mbeni gbata ti Nzapa so ayeke na fini, so ti tene Jérusalem ti yayu;+ nga ala ga nduru na a-ange saki na saki 23 so abungbi gbani;+ ala ga nduru na congrégation ti akozo molenge so a zia iri ti ala na yayu; ala ga nduru na Nzapa so ayeke Juge ti azo kue;+ ala ga nduru na fini so ayeke na lege ti yingo,+ fini ti azo so ayeke mbilimbili, azo so a sara si ala ga mbilimbili-kue;+ 24 ala ga nduru na Jésus walekengo-songo+ ti mbeni fini mbele+ nga ala ga nduru na mênë so a fi ni, mênë so asara tënë nzoni mingi ahon mênë ti Abel.+

25 Ala sara hange si ala ke pëpe ti mä yanga* ti zo so ayeke sara tënë. Asingana azo so ake ândö ti mä yanga ti lo so ayeke fa peko ti gbotongo mê ti Nzapa na ndö ti sese ala sigi dä ape so, si e la tongana e tourné peko ti e na lo so ayeke sara tënë na yayu, fade e sigi dä?+ 26 Na ngoi ni so, toto ti go ti lo ayengi sese,+ me ti fadeso lo mû zendo so: “Mbi yeke kiri ande ti yengi gï sese pëpe, me yayu nga.”+ 27 So lo tene “mbi yeke kiri ande ti”, a ye ti fa so lo yeke zi aye so a yeke yengi ni, so ti tene aye so a leke ni, si aye so a yengi pëpe angbâ ti ala. 28 Tongaso, na bango so e yeke wara ande mbeni Royaume so a lingbi ti yengi ni pëpe, zia e ngbâ ti duti na kota nzobe, so na lege ni e lingbi ti sara kusala so ayeke nzoni-kue na lê ti Nzapa na kpengo mbeto ti lo nga na dongo bê. 29 Biani, Nzapa ti e ayeke tongana mbeni wâ so ayeke gbi ye kue kue kue.+

13 Zia yengo terê ti ala ti aita angbâ ti gue.+ 2 Ala girisa pëpe tënë ti yambango agene,*+ so ndali ni, ambeni zo ayamba lani a-ange, me ala hinga pëpe so a yeke a-ange la.+ 3 Ala dabe ti ala na aita so ayeke na da ti kanga*+ mo bâ mo tene ala nga kue a kanga ala legeoko na ala;+ ala dabe ti ala na aita so azo ayeke sara sioni na ala, ndali ti so ala nga kue ala ngbâ na yâ ti mitele.* 4 Zia azo kue abâ mariage na nene ni mingi, na zia a sara si gbogbo ti mariage aga sioni pëpe,+ ndali ti so Nzapa ayeke fâ ngbanga ande na li ti azo ti sarango lango-sioni* nga na azo ti gingo wali wala koli nde.+ 5 Ala zia si ndoye ti nginza aduti na yâ ti sarango ye ti ala pëpe,+ me ala zia bê ti ala gï na ndö ti aye so ala yeke na ni.*+ Ndali ti so lo tene: “Mbi yeke zia ande mo lâ oko pëpe nga mbi yeke girisa mo lâ oko pëpe.”+ 6 Tongaso si e sara mbeto oko pëpe na e tene: “Jéhovah* ayeke zo ti mungo maboko na mbi; mbeto ayeke sara ande mbi pëpe. Nyen la zo apeut ti sara na mbi nyen?”+

7 Ala dabe ti ala na azo so ayeke mû li ni na popo ti ala,+ so ayeke fa tënë ti Nzapa na ala; na ngoi so ala yeke bâ ye ti peko ti sarango ye ti ala, ala sara ye na mabe tongana ti ala.+

8 Jésus Christ ayeke gï oko lo so ayeke biri, laso nga lakue lakue.

9 Ala zia si mara ti afango ye nde nde nga so alondo na mbeni ndo nde ahon na ala yongoro pëpe; ndali ti so a yeke nzoni ti tene bê ti zo awara ngangu na lege ti kota nzobe ti Nzapa, me na lege ti akobe pëpe,* akobe so azo so azia bê ti ala kue na ni abâ nzoni na pekoni pëpe.+

10 E yeke na mbeni gbalaka so ala so ayeke sara kusala na Nzapa na yâ ti tente ni ayeke na droit ti te ye ti ndö ni pëpe.+ 11 Ndali ti so anyama so kota prêtre ayeke mû mênë ti ala ague na ni na ndo so ayeke nzoni-kue ndali ti siokpari, a yeke zö akuâ ti ala na gigi ti camp ni.+ 12 Ni la, Jésus nga kue, ti tene lo sara si azo ni aga nzoni-kue na lege ti mênë ti lo wani,+ lo bâ pasi na gigi ti yanga ti gbata ni.+ 13 Tongaso, zia e sigi na yâ ti camp ni e gue na peko ti lo, ti tene e yô zonga so a zonga na lo,+ 14 ndali ti so ge, e yeke pëpe na mbeni gbata so angbâ lakue, me e yeke gi gingo gbata so ayeke ga.+ 15 Na lege ti lo, zia e mû lakue na Nzapa sandaga ti gonda,+ so ti tene lengo ti yanga+ so ayeke fa iri ti lo dandara.+ 16 Nga, ala girisa pëpe ti sara ye ti nzoni nga ti kangbi ye na zo,+ ndali ti so a yeke mara ti asandaga tongaso la si anzere na Nzapa mingi.+

17 Ala mä yanga ti ala so ayeke mû li ni na popo ti ala+ na ala woko terê ti ala na gbe ti ala,+ ndali ti so azo so ayeke bâ ndo na ndö ti ala* tongana azo so ayeke na tënë ti kiri na ni na Nzapa,+ si ala sara kua ti ala na ngia me na demango terê pëpe, ndali ti so ye ni ayeke sara ande nzoni na ala pëpe.

18 Ala ngbâ ti sambela ndali ti e, ndali ti so e hinga e tene e yeke na nzoni conscience, ngbanga ti so e ye ti sara ye mbilimbili na yâ ti aye kue.+ 19 Me mbi wa ala mingi ti sara tongaso, si a lingbi ti zi mbi hio na ala.

20 Zia Nzapa ti siriri, so azingo na kuâ Seigneur ti e Jésus, kota berger+ ti ataba ni, na mênë ti mbele so angbâ lakue lakue, 21 amû na ala ye kue ti nzoni so ala yeke na bezoin ni ti sara na ye so bê ti lo aye, nga zia lo sara na mbage ti e ye so ayeke nzoni na lê ti lo na lege ti Jésus Christ. Zia a mû gloire na lo lakue lakue nga kpu na kpu. Amen.

22 Mbi wa ala mingi, aita, ti kanga bê ti ala na tënë ti mungo ngangu na zo so, ndali ti so lettre so mbi sara na ala so ayo pëpe. 23 Mbi ye ti tene na ala so a zi ita ti e Timothée na kanga awe; tongana lo ga hio, mbi na lo la si e yeke gue ande ti bâ ala.

24 Ala tene bara ti mbi na azo kue so ayeke mû li ni na popo ti ala, ala tene ni nga na azo ti be-vulu kue. Ala so ayeke na Italie+ atokua bara na ala.

25 Zia kota nzobe ti Seigneur aduti na ala kue.