KOZO MBETI TI PIERRE

1 Pierre, bazengele+ ti Jésus Christ, atokua mbeti so na azo so aga ti sara kodro ti ninga pëpe, so akangbi kirikiri na sese ti Pont, ti Galatie, ti Cappadoce,+ na yâ ti kodro-komanda ti Asie, na sese ti Bithynie, ala so a soro ala awe 2 alingbi na ngangu so Nzapa Babâ ni ayeke na ni ti hinga ye kozoni,+ nga so a sara si ala ga nzoni-kue na lege ti yingo vulu,+ ti tene ala ga azo so amä yanga nga azo so a fi mênë ti Jésus Christ na terê ti ala:+

Zia Nzapa angbâ ti mû kota nzobe nga na siriri ti lo na ala mingi mingi.

3 Zia a gonda Nzapa na Babâ ti Seigneur ti e Jésus Christ, ndali ti so, na lege ti kota nzoni bê so lo sara, lo kiri lo dü e fini+ ti duti na beku+ so ayeke na fini na lege ti zingongo so Jésus Christ azingo na kuâ,+ 4 ti wara héritage so alingbi ti buba pëpe, so alingbi ti ga sioni pëpe nga so pendere ni alingbi ti hon pëpe.+ A bata ni na ala na yayu,+ 5 ala so a yeke bata ala na ngangu ti Nzapa na lege ti mabe ndali ti salut so a ga nduru ti fa ni awe na ngoi ti nda ni. 6 Ndani la, ala yeke na ngia mingi, atâa so na yâ ti kete ngoi so, a lingbi atara nde nde azia vundu na bê ti ala,+ 7 tongaso si mabe ti ala so a tara ni awe+ (mabe so ngere ni ahon ngere ti lor so ayeke buba bubango atâa so a tara ni na lê ti wâ awe) aduti mbeni ye ti gonda, ye ti gloire, ye ti nengo terê na ngoi so Jésus Christ ayeke fa terê ti lo na gigi.+ 8 Atâa so ala bâ lo lâ oko pëpe, ala ndoye lo. Atâa so ala yeke bâ lo fadeso pëpe, ala mä na bê na lo nga bê ti ala ayeke na ngia mingi, ngia so a lingbi ti fa ndani pëpe, tâ kota ngia, 9 ndali ti so ala yeke wara ye ti peko ti mabe ti ala, so ti tene salut ti ala.*+

10 Aprophète so afa ândö na prophétie tënë ti kota nzobe so Nzapa ayeke sara na ala agi ti hinga ye mbilimbili na ndö ti salut ni so nga ala gi ye nzoni na ndö ni.+ 11 Ala yeke gi lakue ti hinga mbilimbili ngoi wa nga lawa la si aye so yingo so ayeke na yâ ti ala afa ni ândö na ndö ti Christ+ ayeke ga tâ tënë. Yingo ni so afa kozo awe tongana nyen la Christ ayeke bâ pasi+ nga tongana nyen la lo yeke wara gloire na pekoni. 12 Me a fa ândö na aprophète so a tene ala yeke sara kua ndali ti ala wani pëpe, me a yeke ndali ti ala si aprophète ni ayeke sigi lani na aye so laso a fa ni na ala awe na lege ti azo so afa nzoni tënë na ala na yingo vulu so alondo na yayu.+ A yeke aye so la si a-ange ayeke na nzara ti zia lê ti ala dä mbilimbili.

13 Ni la, ala leke bibe ti ala ti sara ngangu kua,+ ala zia tâ li ti ala kpô.+ Ala zia beku ti ala na ndö ti kota nzobe so a yeke sara ande na ala na ngoi so Jésus Christ ayeke fa terê ti lo na gigi. 14 So ala yeke amolenge so amä yanga, a yeke nzoni ala zia pëpe si anzara ti bê so ala yeke na ni ândö na ngoi so ala de ti hinga ndo pëpe so achangé sarango ye ti ala, 15 me ti tene ala kpa Lo so ayeke nzoni-kue so airi ala so, zia ala nga aga azo so ayeke nzoni-kue na yâ ti sarango ye ti ala kue,+ 16 ngbanga ti so Mbeti ti Nzapa atene: “A yeke nzoni ala ga nzoni-kue, ngbanga ti so mbi yeke nzoni-kue.”+

17 Nga, tongana ala yeke iri ndo na Babâ ni so ayeke fâ ngbanga ti zo oko oko alingbi na kusala ti lo na mungo mbage ti zo pëpe,+ zia ala sara ye na mbeto+ na ngoi so ala yeke na yâ ti dunia so tongana azo so aga ti sara kodro ti ninga pëpe. 18 Biani, ala hinga so a yeke pëpe na aye so ayeke buba bubango, argent wala lor, si a zi ala+ na yâ ti sarango ye ti ala so ayeke senge senge so ala mû na peko ti akotara ti ala.* 19 Me a zi ala na lege ti mênë so ngere ni ayeke kota mingi,+ mênë so ayeke tongana ti mbeni molenge ti taba so sioni wala saleté oko ayeke na terê ti lo pëpe,+ so ti tene mênë ti Christ.+ 20 Tâ tënë, a hinga lo kozo si a zia gere ti dunia,+ me a fa lo na gigi na hunzingo ti ngoi ni ndali ti ala.+ 21 Na lege ti lo ala ga azo so amä na bê na Nzapa,+ lo so lo zingo Christ na kuâ+ si lo mû na lo gloire,+ ti tene mabe ti ala nga na beku ti ala aduti na mbage ti Nzapa.

22 So fadeso ala sukula terê* ti ala na lege so ala yeda ti sara ye alingbi na tâ tënë awe so, ye ti peko ni ayeke yengo terê ti aita,+ yengo terê so ayeke ti handango lê ti zo pëpe, zia ala ndoye terê ngangu mingi na ndoye so alondo na bê.+ 23 Ndali ti so a kiri a dü ala fini awe,+ a dü ala pëpe na lege ti ngongoa so ayeke buba bubango, me na lege ti ngongoa*+ so alingbi ti buba pëpe, na lege ti tënë ti Nzapa, lo so ayeke na fini si lo yeke ngbâ kpu na kpu.+ 24 Ndali ti so “azo kue ayeke* tongana pere, na gloire ti azo kue ayeke tongana fleur so asigi na yâ ti ngonda; pere ni ahule si fleur ni atï, 25 me tënë ti yanga ti Jéhovah* ayeke ngbâ kpu na kpu.”+ Na “tënë ti yanga” ti lo ni so ayeke nzoni tënë so a fa lani na ala.+

2 Tongaso, ala pusu aye so kue yongoro na terê ti ala: ye ti sioni kue,+ handango ndo kue, handango lê ti zo, kota bê nga na dikongo asioni tënë kue na peko ti zo; 2 me legeoko tongana aforoto so a dü ala fini fini,+ zia ala duti na kota nzara ti nyon lait so a zia mbeni ye nde dä pëpe, lait so ayeke ti tënë ti Nzapa, si na lege ni ala kono ti wara salut,+ 3 gï tongana ala tara si ala bâ so Seigneur ayeke nzoni.

4 Tongana ala yeke ga na mbage ti lo, so ti tene na mbage ti mbeni tênë so ayeke na fini, so biani azo ake ni,+ me so Nzapa asoro ni na lo bâ ni tongana ye so ngere ni ayeke kota mingi,+ 5 ala nga, tongana atênë so ayeke na fini, a ngbâ ti leke ala ti ga mbeni da+ ti yingo ti tene ala ga mbeni bungbi ti aprêtre so ayeke nzoni-kue, ti mû asandaga ti yingo+ so anzere na Nzapa na lege ti Jésus Christ.+ 6 Ndali ti so a sara tënë ni na yâ ti Mbeti ti Nzapa, a tene: “Bâ, mbi yeke zia na Sion mbeni tênë, so a soro ni awe, mbeni tênë so ayeke tênë ti coin ti fondation, tênë so ngere ni ayeke kota mingi; zo kue so amä na bê na ni, vundu ayeke sara ande lo lâ oko pëpe.”+

7 Tongaso, ndali ti ala, lo yeke ye so ngere ni ayeke kota mingi, ngbanga ti so ala yeke azo so amä na bê. Me ti azo so amä na bê pëpe, “tênë so azo ti lekengo da ni ake ni so,+ ni la aga ngangu tênë ti coin ti da ni”,+ 8 nga a ga “mbeni tênë so zo ayeke pika gere ti lo dä nga mbeni kota tênë so asara si zo atï.”+ Azo so ayeke pika gere ti ala dä ngbanga ti so ala ke ti mä tënë ni. Na a yeke ye so a fa kozo awe ti si na ala. 9 Me ala, ala yeke “mbeni groupe ti azo so a soro ala awe, mbeni bungbi ti aprêtre so ayeke sara kua tongana agbia, mbeni mara so ayeke nzoni-kue,+ mbeni groupe ti azo so ayeke ga ye ti Nzapa wani+ si ala lingbi ti fa anzoni”*+ ti lo so lo iri ala ti sigi na yâ ti bingo ti ga na yâ ti pendere lumière ti lo.+ 10 Ândö ala yeke mbeni mara pëpe, me fadeso ala yeke mara ti Nzapa;+ ândö ala yeke azo so a sara nzoni bê na ala pëpe, me fadeso ala yeke azo so a sara nzoni bê na ala.+

11 Ala so mbi ndoye ala mingi, mbi wa ala tongana awande nga azo so aga ti sara kodro ti ninga pëpe+ ti gbanzi terê ti ala na anzara ti mitele+ so ayeke tiri na ala.*+ 12 Ala duti na nzoni sarango ye na popo ti azo ti amara,+ si na ngoi so azo ni abi tënë na li ti ala atene ala yeke asioni zo, azo ni so alingbi ti bâ anzoni kusala ti ala,+ na ye ti peko ni ayeke so, azo ni ayeke mû gloire na Nzapa na lango so lo ga ti bâ kua so a sara.

13 Ndali ti Seigneur, ala woko terê ti ala na gbe ti aye so kue azo azia na sese:+ wala a yeke mbeni gbia, zia ala woko terê ti ala na gbe ti lo+ ndali ti so lo yeke kota zo; 14 wala a yeke agouverneur, zia ala woko terê ti ala na gbe ti ala ndali ti so ala yeke azo so Seigneur si atokua ala ti punir azo so asara sioni, me ti gonda azo so asara nzoni.+ 15 Biani, Nzapa aye si na sarango ye ti nzoni ala kanga yanga ti azo so ndara amanke ala si ala yeke tene abuba tënë so.+ 16 Ala sara ye tongana azo so a zi ala awe,+ me zia si ala duti na liberté ti ala ni pëpe tongana mbeni ye ti hondengo ndö ti sioni,+ me tongana angbâa ti Nzapa.+ 17 Ala ne mara ti azo nde nde kue,+ ala ndoye sewa ti e ti aita kue,+ ala kpe mbeto ti Nzapa,+ ala ne gbia ti kodro.+

18 Zia azo ti kua awoko terê ti ala na gbe ti awa ti ala na sarango mbeto ti ala na lege ni,+ ala woko terê ti ala gï pëpe na gbe ti awa ti ala so ayeke nzoni si ayeke sara ye na lege ni, me ala woko terê ti ala nga na gbe ti ala so sarango kua na gbe ti ala ason mingi. 19 Biani, a yeke ye ti gonda tongana mbeni zo ayeke kanga bê ti lo na gbe ti apasi* nga lo yeke bâ pasi senge senge ndali ti conscience ti lo na lê ti Nzapa.+ 20 Ndali ti so tongana ala yeke sara ye ti sioni la si a yeke pika ala na ala yeke gbu ngangu dä,+ gonda ti nyen la si ala wara dä? Me tongana ala yeke sara ye ti nzoni si ala bâ pasi na ala gbu ngangu dä, so ayeke mbeni ye so azia ngia na bê ti Nzapa.+

21 Biani, a iri ala ti wara mara ti fini tongaso, ngbanga ti so Christ abâ lani pasi ndali ti ala,+ na lo zia na ala mbeni tapande si ala mû peko ti gere ti lo mbilimbili.+ 22 Lo sara siokpari oko pëpe,+ na a wara tënë ti handango zo na yanga ti lo pëpe.+ 23 Tongana a yeke zonga lo,+ lo kiri peko ti zonga ni pëpe.+ Tongana lo yeke bâ pasi,+ lo gi ti son na ndö ti zo pëpe, me lo ngbâ ti zia tënë ti lo kue na maboko ti Lo so ayeke fâ ngbanga+ mbilimbili. 24 Lo wani lo yô asiokpari ti e+ na yâ ti terê ti lo na ndö ti keke,+ si ti e na siokpari ahunzi, na e duti na fini ti sara ye ti mbilimbili. Nga “ala wara sava ndali ti akä ti lo.”+ 25 Biani, lani ala yeke tongana ataba so agirisa lege awe;+ me fadeso ala kiri na mbage ti lo so ayeke berger+ nga zo ti bango ndo na ndö ti âme* ti ala.

3 Legeoko nga, awali, ala woko terê ti ala na gbe ti akoli ti ala,+ si tongana ambeni koli ni ayeke dä so ayeda na tënë ti Nzapa pëpe, a lingbi ti ga na ala ti mä na bê, na lege ti tënë pëpe, me na lege ti sarango ye ti terê ti awali ti ala,+ 2 ngbanga ti so akoli ni abâ na lê ti ala sarango ye ti ala so sioni oko ayeke dä pëpe+ nga na nengo so ala ne na ala mingi. 3 Nga, zia pendere ti ala aduti gï pendere ti gigi pëpe, so ti tene sarango li ti ala na kode ahon ndö ni, yungo aye ti pendere nde nde ti lor+ wala yungo apendere bongo, 4 me zia pendere ti ala aduti ti zo ti yâ ni na yungo bongo so alingbi ti buba pëpe so ayeke bibe ti dutingo na siriri nga ti sarango ye na ngangu pëpe,+ so ayeke ye ti kota ngere na lê ti Nzapa. 5 Ndali ti so a yeke nga tongaso la si awali ti ândö so ayeke nzoni-kue nga so azia beku ti ala na Nzapa ayeke sara pendere na terê ti ala, ala woko terê ti ala na gbe ti akoli ti ala, 6 tongana ti Sara so amä lani yanga ti Abraham na lo iri lo seigneur.+ Ala ga amolenge ti lo awe tongana ala ngbâ ti sara nzoni nga ala zia si mbeni ye asara ala mbeto pëpe.+

7 Akoli, legeoko nga, ala ngbâ ti duti na awali ti ala na lege ti hingango ye.* Ala ne ala+ tongana mbeni ta so akpengba ti lo pëpe legeoko tongana ala, ndali ti so ala na awali ti ala+ nga ayeke ahéritier ti fini so a mû ni na lege ti kota nzobe ti Nzapa, si a kanga lege na asambela ti ala pëpe.

8 Ti hunzi na ni, zia ala kue ala duti na bibe oko,+ ala hinga ti zia terê ti ala na place ti mba ti ala, ala ye terê na popo ti ala na yengo terê ti aita, ala bâ mawa ti mba mingi+ nga ala sara terê ti ala kete.+ 9 Ala kiri sioni ndali ti sioni pëpe+ wala zonga ndali ti zonga pëpe.+ Me ala tene nzoni tënë na zo,+ ngbanga ti so a iri ala ti sara ye tongaso si ala lingbi ti wara tënë nzoni tongana héritage.

10 Biani “zo so aye gigi nga ti bâ alango so ayeke nzoni, zia lo bata langue ti lo si lo tene sioni tënë pëpe+ nga lo bata yanga ti lo si lo tene tënë ti handa pëpe. 11 Me zia lo tourné peko ti lo na ye so ayeke sioni+ na lo sara ye so ayeke nzoni;+ zia lo gi siriri na lo tomba peko ni.+ 12 Biani, lê ti Jéhovah* ayeke na ndö ti azo ti mbilimbili, na mê ti lo ayeke mä sambela ti ala ti voro terê na lo,+ me lê ti Jéhovah* ake azo so ayeke sara aye ti sioni.”+

13 Ti tâ tënë ni, zo wa la si ayeke sara sioni na ala tongana ala ga azo so ayapu na sarango ye ti nzoni?+ 14 Me tongana a si so ala bâ pasi ndali ti mbilimbili, ngia ayeke na ala.+ Ye oko, ye so azo so asara mbeto ni, ala sara mbeto ni pëpe, nga ala gi bê ti ala pëpe.+ 15 Me na yâ ti bê ti ala, zia ala hinga so Christ ayeke nzoni-kue na ala bâ lo tongana Seigneur, lakue ala duti nduru ti gbu koko ti beku ti ala na gbele azo kue so ayeke hunda ala na nda ti beku ni so; me ala sara ni na ngangu pëpe+ nga na nengo zo mingi.+

16 Ala duti na nzoni conscience,+ si na ndö ti ye so a tene sioni tënë ti ala dä, nzoni sarango ye ti ala tongana azo ti Christ asara si kamene agbu azo+ so ayeke tene sioni tënë ti ala.+ 17 Ndali ti so a yeke nzoni mingi ti tene ala bâ pasi ngbanga ti so ala yeke sara ye ti nzoni,+ tongana a yeke ye so bê ti Nzapa aye la, ahon ti bâ pasi ngbanga ti so ala yeke sara ye ti sioni.+ 18 Biani, Christ akui gï fani oko biani biani awe tënë ti asiokpari,+ zo ti mbilimbili ndali ti azo so ayeke mbilimbili pëpe,+ si lo lingbi ti gue na ala na Nzapa.+ A fâ lo na yâ ti mitele,+ me a kiri na lo na fini na yâ ti yingo.+ 19 Na pekoni lo gue lo fa tënë na ayingo so ayeke na da ti kanga,+ 20 ayingo so ake yanga ândö na ngoi ti Noé,+ ngoi so Nzapa angbâ lani ti kanga bê ti lo ti ku tongana a yeke leke lani arche,+ so a yô azo mingi pëpe na yâ ni, so ti tene a-âme* miombe, ti sö fini ti ala na lege ti ngu.+

21 Batême, so ague oko na ye so, ayeke sö ala fadeso nga, (batême ayeke pëpe zingo saleté ti terê ti zo, me hundango Nzapa ti wara nzoni conscience),+ na lege ti zingongo ti Jésus Christ na kuâ. 22 Lo yeke na terê ti Nzapa na mbage ti koli,+ ndali ti so lo gue na yayu awe, si a zia a-ange, akomandema nga na angangu na gbe ti lo.+

4 So Christ abâ pasi na yâ ti mitele awe,+ ala nga kue ala mû oko bibe ti lo so tongana ye ti bira; ngbanga ti so zo so abâ pasi na yâ ti mitele, ti lo na siokpari ahunzi awe,+ 2 si tanga ti ngoi so lo yeke sara na yâ ti mitele, fini ti lo aduti ndali ti anzara ti bê ti azo pëpe,+ me ndali ti ye so bê ti Nzapa aye.+ 3 Biani, ngoi so ahon alingbi na ala awe ti sara ye so amara aye,+ ngoi so lani ala yeke sara sioni ye sân kamene,* ala yeke tambela na lege ti asioni nzara ti terê, nyongo sämba ahon ndö ni, apumba ti kirikiri, nyongo sämba butuma nga avorongo yanda, ye so ndia ake.+ 4 Me ngbanga ti so ala ngbâ ti kpe loro na azo so pëpe ti gue na yâ ti oko popoto ti asioni ye so, li ti azo so aga kirikiri na ala ngbâ gï ti tene asioni tënë ti ala.+ 5 Me azo so ayeke kiri tënë ande na lo so ayeke nduru ti fâ ngbanga ti azo so ayeke na fini na ti ala so akui awe.+ 6 Ndali ti ye so, a fa nga nzoni tënë na akuâ,+ si a fâ ngbanga ti ala na lege ti mitele alingbi na bango ndo ti azo, me ala duti na fini na lege ti yingo alingbi na bango ndo ti Nzapa.

7 Nda ti aye kue aga nduru awe. Tongaso, ala bata bibe ti ala nzoni,+ na zia lê ti ala akpengba ti sambela.+ 8 Kota ye ni kue ayeke ti tene ala ndoye terê ngangu na popo ti ala,+ ngbanga ti so ndoye akanga ndö ti asiokpari mingi.+ 9 Ala yamba terê nzoni na popo ti ala na dikongo tënë na gbe ti go ti ala pëpe.+ 10 Ti lingbi na matabisi so zo oko oko awara, ala mû ni ala sara na kua na amba ti ala tongana anzoni wabatango ye ti kota nzobe ti Nzapa so lo yeke sara ni na alege nde nde.+ 11 Tongana mbeni zo ayeke sara tënë, zia lo sara tënë ni tongana atënë so alondo na yanga ti Nzapa; tongana mbeni zo ayeke sara kua na azo, zia lo sara ni tongana zo so azia bê ti lo na ngangu so Nzapa ayeke mû;+ si na yâ ti aye kue a gonda Nzapa+ na lege ti Jésus Christ. Gloire na ngangu ayeke ti lo lakue lakue nga kpu na kpu. Amen.

12 Aita so mbi ndoye ala mingi, zia li ti ala aga kirikiri pëpe ndali ti akpale so ayeke tongana wâ si ayeke ga na ndö ti ala+ so; zia li ti ala aga kirikiri pëpe mo bâ mo tene mbeni ye ti ndima la si ayeke si na ala so. 13 Ahon ti zia si li ti ala aga kirikiri, ala ngbâ ti duti na ngia+ ndali ti so ala nga ala yeke azo so ayeke bâ apasi so Christ abâ,+ tongaso si ala duti na ngia na terê ti ala anzere mingi na ngoi so lo yeke fa gloire ti lo na gigi.+ 14 Tongana a yeke zonga ala ndali ti iri ti Christ, ala duti na ngia,+ ngbanga ti so yingo ti gloire, so ti tene yingo ti Nzapa, ayeke duti na ndö ti ala.

15 Me, zia mbeni zo na popo ti ala abâ pasi pëpe ndali ti so lo yeke zo ti fango zo, wala zo ti nzi, wala sioni zo wala zo so ayeke yôro yanga ti lo na yâ ti tënë ti azo.+ 16 Me, tongana mbeni zo ayeke bâ pasi ndali ti so lo yeke Chrétien, zia kamene asara lo pëpe,+ me lo ngbâ ti gonda Nzapa na ngoi so iri ni so ayeke na ndö ti lo. 17 Biani, so ayeke ngoi so a fa ni awe ti tene ngbanga ato nda ni na yâ ti da ti Nzapa.+ So ngbanga ni ato nda ni na e kozo so,+ ka ti azo so ayeda na nzoni tënë ti Nzapa pëpe so ayeke duti ande tongana nyen?+ 18 “Nga, tongana a yeke ngangu na zo ti mbilimbili ti wara salut, ka ti zo so akpe Nzapa pëpe nga na ti wasiokpari ayeke duti ande tongana nyen?”+ 19 Tongaso nga, zia ala so ayeke bâ pasi alingbi na ye so bê ti Nzapa aye angbâ ti zia bê ti ala na ndö ti Nzapa lo so asara ye kue, lo so lo yeke be-ta-zo nga na oko ngoi ni ala ngbâ ti sara ye ti nzoni.+

5 Ni la, so mbi kue mbi yeke ancien, mbi yeke témoin ti apasi so Christ abâ na mbi kue mbi yeke wara gloire so a yeke fa ni ande,+ mbi mû wango so na a-ancien so ayeke na popo ti ala: 2 Ala bata kundu ti ataba ti Nzapa+ so lo zia na maboko ti ala; ala sara kua tongana azo ti bango ndo na ndö ni,* zia a gbu ala gbungo na ngangu pëpe ti sara ni, me zia ala sara ni na bê ti ala wani na gbele Nzapa;+ ala bata kundu ti ataba ni na bibe ti warango ye na lege ti likisi pëpe,+ me na bê ti ala kue. 3 Ala sara mokonzi pëpe na ndö ti ala so ayeke aye ti Nzapa,+ me ala ga tapande ndali ti ataba ni.+ 4 Na ngoi so kota berger ni+ ayeke fa terê ti lo na gigi, ala yeke wara ande couronne ti gloire so pendere ni ayeke hon pëpe.+

5 Legeoko nga, amaseka-koli, ala woko terê na gbe ti ambakoro.*+ Me ala kue, ala yü bibe ti sarango terê kete tongana ala yeke sara ye na mba na popo ti ala, ngbanga ti so Nzapa ake azo ti baba, me lo yeke mû kota nzobe ti lo na azo so asara terê ti ala kete.+

6 Tongaso, ala sara terê ti ala kete na gbe ti ngangu maboko ti Nzapa, tongaso si lo lingbi ti yâa ala na nduzu tongana ngoi ni alingbi,+ 7 na oko ngoi ni, ala mû agingo bê ti ala kue ala bi ni na ndö ti lo,+ ngbanga ti so lo yeke bi bê ti lo na ndö ti ala.+ 8 Ala bata bibe ti ala, zia lê ti ala akpengba.+ Wato ti ala Zabolo ayeke tambela tongana mbeni bamara so ayeke toto, na lo yeke gi mbeni zo ti te lo.+ 9 Me ala luti ti ke lo,+ ala kpengba na yâ ti mabe, na hingango so a-oko pasi so ayeke si nga na bungbi ti ala* ti aita kue na yâ ti dunia so.+ 10 Me na peko ti so ala bâ pasi kete awe, Nzapa ti kota nzobe kue, lo so lo iri ala ti wara gloire ti lo ti lakue lakue+ ndali ti so ala sara beoko na Christ, ayeke hunzi lekengo ala. Lo yeke sara si ala luti ngangu,+ lo yeke sara si ala kpengba,+ lo yeke sara ande si gere ti ala aluti ngangu. 11 Ngangu ayeke ti lo lakue lakue. Amen.

12 A yeke na lege ti Sylvain,*+ mbeni ita so mbi bâ lo yeke be-ta-zo, si mbi sû nduru mbeti so na ala ti kpengba ala nga ti fa na ala so tâ kota nzobe ti Nzapa ni la. Ala luti ngangu na yâ ni. 13 Wali so ayeke na Babylone, lo so a soro lo tongana ala, atokua bara na ala. Molenge ti mbi Marc+ nga atokua bara na ala. 14 Ala bara mba na popo ti ala na sungo ngbangba ti mba na ndoye.

Ala kue so ayeke beoko na Christ, zia siriri aduti na ala.