USE MBETI TI PIERRE

1 Mbi Simon Pierre, ngbâa nga bazengele ti Jésus Christ, mbi tokua mbeti so na ala so ayeke na mabe so ayeke ye ti kota ngere tongana ti e,* na lege ti mbilimbili ti Nzapa ti e nga na Sauveur Jésus Christ:

2 Zia Nzapa angbâ ti mû kota nzobe nga na siriri ti lo mingi mingi na ala na lege ti tâ hingango ye+ na ndö ti Nzapa nga na ndö ti Jésus Seigneur ti e, 3 ndali ti so ngangu ti lo, so ayeke ti Nzapa, amû na e aye kue so amû maboko na e ti duti na fini si e voro Nzapa na bê ti e kue, na lege ti tâ hingango ye na ndö ti lo so airi e+ na lege ti gloire ti lo nga na sarango ye ti lo so ayeke nzoni mingi. 4 Na lege ti aye ni so, lo mû na e senge senge azendo so ngere ni ayeke ngangu nga ayeke kota mingi,+ si na lege ti aye ni so ala ga azo so awara mara ti dutingo ti Nzapa, biani, ala sigi na yâ ti sarango ye ti dunia so awe,+ asarango ye so abuba awe ndali ti asioni nzara ti bê.

5 Ndani la, ti ala, ala sara ngangu kue+ ti sara ye alingbi na aye so, ala zia sarango ye so ayeke nzoni mingi na ndö ti mabe ti ala;+ ala zia hingango ye na ndö ti sarango ye so ayeke nzoni mingi;+ 6 ala zia kangango nzara ti bê na ndö ti hingango ye; ala zia gbungo ngangu na ndö ti kangango nzara ti bê;+ ala zia vorongo Nzapa na bê kue na ndö ti gbungo ngangu;+ 7 ala zia yengo terê ti aita na ndö ti vorongo Nzapa na bê kue nga ala zia ndoye na ndö ti yengo terê ti aita.+ 8 Tongana aye so ayeke na ala na ayeke mingi mingi, a yeke kanga ande lege na ala ti duti gï senge senge me a yeke mû lege na ala ti lë lengo+ tongana a ndu tënë ti tâ hingango ye na ndö ti Seigneur ti e Jésus Christ.

9 Biani, zo so ayeke na aye so pëpe, lo yeke waziba, lo kanga lê ti lo si lo bâ lumière pëpe,+ nga lo girisa so a sukula asiokpari ti lo+ ti ândö awe. 10 Tongaso, aita, ala sara ngangu kue ti sara si iringo so a iri na ala+ nga sorongo so a soro na ala aduti tâ ye biani; ndali ti so tongana ala ngbâ ti sara aye so, ala yeke tï ande lâ oko pëpe.+ 11 Biani, a yeke tongaso si a yeke mû ande lege na ala nzoni ti lï na yâ ti Royaume ti Seigneur na Sauveur ti e Jésus Christ,+ Royaume so ayeke ngbâ lakue lakue.+

12 A yeke ndali ti tënë so la si mbi ye lakue ti dabe ti ala na aye so, atâa so ala hinga ni awe na ala luti ngangu na yâ ti tâ tënë so ala hinga ni so. 13 Me, na ngoi so mbi ngbâ na yâ ti tabernacle* so,+ mbi bâ so a yeke nzoni ti zingo ala na lege ti atënë ti dango bê so,+ 14 ndali ti so mbi hinga so mbi ga nduru ti zi tabernacle ti mbi ni awe, gï tongana ti so Seigneur ti e Jésus Christ asara tënë ni lani na mbi.+ 15 Mbi yeke sara ande lakue ngangu kue ti tene na peko ti hongo ti mbi, ala wani awara lege ti dabe ti ala na aye so.

16 A yeke pëpe na lege ti ambaï ti mvene so a leke peko ni na kode si e fa na ala tënë ti ngangu ti Seigneur ti e Jésus Christ nga na ngoi so lo yeke duti dä, me a yeke na lege so e ga azo so abâ gloire ti lo tâ na lê ti e.+ 17 Ndali ti so lo wara gonda na gloire so alondo na Nzapa Babâ ni tongana a sara tënë so na lo na lege ti gloire so ayeke pendere mingi, a tene: “So ayeke Molenge ti mbi so mbi ndoye lo mingi, lo so bê ti mbi anzere na mbage ti lo.”+ 18 Tâ tënë, e mä lani atënë ni so, so alondo na yayu, na ngoi so e yeke na terê ti lo na ndö ti hoto so ayeke nzoni-kue.

19 Tongaso, e yeke na tënë ti prophétie ni so akiri aga tâ ye ahon ti kozo; na ala sara nzoni tongana ala dengi mê ti ala na ni mo bâ mo tene mbeni lampe+ so ayeke za lumière na mbeni ndo so ayeke bingo, na yâ ti bê ti ala, juska ndo ahan na tongoro ti ndapre asigi.+ 20 Biani, ala hinga ye so kozoni: mbeni prophétie ti Mbeti ti Nzapa alondo pëpe na lege ti fango peko ti ye so mbeni zo afa na li ti lo wani. 21 Aprophétie aga lâ oko pëpe na lege ti ye so bê ti zo aye,+ me azo asara tënë ti ye so alondo na Nzapa tongana yingo vulu afa lege ni na ala.*+

2 Ye oko, tongana ti so aprophète ti wataka ayeke lani na popo ti azo ti Israël, awafango ye ti wataka ayeke duti ande na popo ti ala nga.+ Na mayele, azo so ayeke ga na asecte so ayeke ga na kuâ na zo si ala yeke lï na ni na popo ti ala, na ala yeke gue juska ti ke wa ti ala so avo ala vongo,+ si ala iri futingo hio tongaso na ndö ti ala wani. 2 Nga, azo mingi ayeke tï na peko ti asioni ye so ala yeke sara sân kamene,*+ na ndali ti ala, azo ayeke sara sioni tënë ti lege ti tâ tënë.+ 3 Nga, na bê ti warango ye, azo so ayeke wara go na ndö ti ala na lege ti atënë so a ba yâ ni bango. Me ti azo so, ngbanga ti ala so a dë ni ândö awe+ ayeke ga yeke yeke pëpe nga futingo ti ala ayeke lango pëpe.+

4 Biani, Nzapa agbanzi lani terê ti lo pëpe ti punir a-ange so asara lani siokpari,+ me lo bi ala na yâ ti Tartare,*+ lo kanga ala na chaîne na yâ ti ndo* so avuko pitipiti ti bata ala ti ku na ngbanga.+ 5 Nzapa agbanzi nga terê ti lo pëpe ti punir mbeni dunia ândö,+ me lo bata Noé, wafango tënë ti ye so ayeke mbilimbili,+ lo bata lo na ambeni zo mbasambala+ na ngoi so lo ga na kota ngu so apika na ndö ti mbeni dunia ti azo so akpe Nzapa pëpe.+ 6 Nga, so lo sara si agbata ti Sodome na Gomorrhe aga mburu ti wâ, lo fâ ngbanga na ndö ti akodro so,+ si lo zia ni tongana mbeni tapande ndali ti azo so akpe Nzapa pëpe, tapande ti aye so ayeke ga.+ 7 Me lo zi Lot+ so ayeke zo ti mbilimbili, lo so vundu asara lo mingi ndali ti asarango ye ti azo so ayeke buba ndia ti Nzapa si ayeke sara sioni ye sân kamene;* 8 biani, lâ na lâ so zo ti mbilimbili so ayeke sara kodro na popo ti ala, âme* ti lo so ayeke mbilimbili awu pono na lege ti ye so lo bâ nga so lo mä ndali ti sarango ye ti ala so ague nde na ndia. 9 Tongaso, Jéhovah* ahinga tongana nyen ti zi na yâ ti tara azo so avoro lo na bê ti ala kue,+ me lo hinga ti bata azo so ayeke mbilimbili pëpe ti ku ti tene a futi ala na lâ ti ngbanga,*+ 10 mbilimbili ala so agi ti sara si mitele ti amba ti ala+ aga sioni na ala yeke ne komandema pëpe.*+

Mbeto asara ala oko pëpe, li ti ala akpengba, mbeto asara ala pëpe ti tene asioni tënë na terê ti azo so Nzapa amû na ala gloire, 11 andâ a-ange, atâa so ala lingbi ti ala ti sara ye mingi nga ala yeke ti ala ngangu mingi, azia tënë na li ti awafango ye ti wataka so pëpe na tenengo asioni tënë; ala sara tongaso pëpe ndali ti so ala kpe mbeto ti Jéhovah.*+ 12 Me akoli so, so ayeke tongana anyama so ayeke na hingango ndo pëpe, so asara ye alingbi gï na ye so a zia na yâ ti li ti ala awe, anyama so a dü ala gï ti tene a gbu ala a fâ ala, ala yeke sara sioni tënë ti aye so ala hinga ni pëpe.+ A yeke futi ala ande alingbi na sarango ye ti ala wani so alingbi na futingo; 13 ala yeke sara sioni na terê ti ala wani, so ayeke futa ti asioni ti ala la.

Ala bâ ti ala sarango ye alingbi na anzara ti bê ti ala na kota lâ tongana ye so ayeke ga na ala ngia.+ Ala yeke asaleté nga asioni ye; na nzerengo terê kue, ala yeke bi terê ti ala na yâ ti afango ye ti ala ni so ahanda zo, na oko ngoi so ala yeke sara matanga legeoko na ala.+ 14 Lê ti ala asi singo na nzara ti gingo wali nde+ na ala zia lege ti siokpari gbä, nga ala yeke handa azo* so gere ti ala aluti kpô pëpe. Ala yeke na mbeni bê so a fa lege na ni ti sara bê ti ye. Ala yeke amolenge so a deba ala awe. 15 Ala dö nzoni lege azia awe, nga a hon na ala yongoro. Ala mû lege ti Balaam,+ molenge ti Béor, lo so andoye futa ti peko ti sioni sarango ye,+ 16 me a suku na lo ndali ti so lo doro ye so ayeke mbilimbili.+ Mbeni nyama ti yongo kungba so ayeke sara ka tënë pëpe asara tënë na lo na go ti zo nga akanga lege na ye ti buba so prophète ni aye ti sara so.+

17 Azo so ayeke ali ti ngu so ngu ayeke dä pëpe, ala yeke ambinda so kota pupu ayeke hon na ni hongo, na a leke vukongo ndo ti bingo ti ku na ala.+ 18 Ala yeke tene atënë ti baba so aga na ye ti nzoni na zo pëpe, nga na lege ti anzara ti mitele+ nga na sarango ye ti sioni sân kamene,* ala handa ala so alondo ti sigi fafadeso na maboko ti azo so na lege ti sarango ye ti ala, ala girisa lege awe.+ 19 Atâa so ala mû zendo ti mû liberté na azo so, ala wani ayeke angbâa ti aye so abuba awe.+ Ndali ti so zo so mbeni zo ahon lo na ngangu, zo ni amû lo na ngbâa awe.*+ 20 Tâ tënë, tongana ala sigi awe na yâ ti asioni ye ti dunia so+ na lege ti tâ hingango ye na ndö ti Seigneur nga na Sauveur Jésus Christ, me ala kiri ala yôro terê ti ala na yâ ni si a mene ala kue, dutingo ti ala ti nda ni aga sioni mingi ahon ti kozoni.+ 21 A yeke fade nzoni mingi ndali ti ala tongana ala hinga nzoni pëpe lege ti mbilimbili, ahon ti tene na peko ti so ala hinga ni awe ala kiri atourné peko na commandement so ayeke nzoni-kue so a fa ni na ala.+ 22 Ye ni asi na ala alingbi na tënë ti mato so: “Mbo akiri na terê ti dengo ti lo wani, na mama ti cochon so a sukula lo awe akiri akpaka terê ti lo na yâ ti popoto.”+

3 Aita so mbi ndoye ala mingi, so ayeke use mbeti ni si mbi yeke sara na ala so; na yâ ti mbeti so, nga na yâ ti kozo mbeti ti mbi ni, mbi dabe ti ala na lege so mbi zingo bibe ti ala ti mä yâ ti aye polele,+ 2 si ala dabe ti ala na atënë so aprophète so ayeke nzoni-kue atene ândö nga na commandement ti Seigneur na Sauveur so abazengele ti ala afa. 3 Kozoni kue, ala hinga ye so: Na lâ ti nda ni, azo ti hengo ndo ayeke ga ande na atënë ti hengo ndo ti ala, na sarango ye alingbi na anzara ti bê ti ala,+ 4 ala yeke tene: “Ngoi so a mû zendo ni a tene lo yeke duti dä so ayeke na ndo wa?+ Ndali ti so a londo na ngoi so akotara ti e akui,* aye kue angbâ tâ gï tongana ti so ayeke na tongo nda ti sarango dunia.”+

5 Na mbana ti bê ti ala wani, ala girisa ye so: ngbene ye giriri ayayu ayeke dä nga mbeni kuru sese ayeke dä so asigi na yâ ti ngu si a yeke na popo ti ngu na lege ti tënë ti yanga ti Nzapa;+ 6 nga na lege ti aye so, dunia ti ngoi ni so afuti na ngoi so kota ngu apika amene ni.+ 7 Me na lege ti oko tënë so, a bata ayayu na sese ti fadeso ti ku na wâ, na a bata ni ti ku lango ti ngbanga nga ti futingo azo so akpe Nzapa pëpe.+

8 Ye oko, aita so mbi ndoye ala mingi, zia ala girisa ye so pëpe: na lê ti Jéhovah* lango oko ayeke tongana ngu saki oko na ngu saki oko ayeke tongana lango oko.+ 9 Jéhovah* ane nengo pëpe na ndö ti tënë ti zendo ti lo,+ tongana ti so ambeni zo abâ na sarango ye ti zo so ane nengo, me lo yeke kanga bê na ala ngbanga ti so lo ye si a futi zo oko pëpe, me lo ye si azo kue achangé bê ti ala.+ 10 Me lâ ti Jéhovah*+ ayeke ga tongana zo ti nzi;+ na lango ni so, ayayu ayeke hon hio tongaso+ na mbeni ngangu bruit, na aye ni so amû wâ ngangu ayeke ga tongana ngu si agirisa, nga sese na akusala so ayeke na yâ ni ayeke sigi dandara.+

11 So aye so kue ayeke ga tongana ngu so, a yeke nzoni ala bâ wala dutingo ti ala ayeke tongana nyen na lege ti sarango ye so ayeke nzoni-kue nga na akusala so afa so ala voro Nzapa na bê ti ala kue; 12 ala ku na ala bata lakue na li ti ala* ngoi so lâ ti Jéhovah*+ ayeke duti dä, so na yâ ni ayayu so wâ amû ni ayeke ga tongana ngu si agirisa,+ na aye ni so amû wâ ngangu mingi ayeke ga tongana ngu. 13 Me na lege ti zendo ti lo,+ e yeke ku afini yayu na fini sese so mbilimbili ayeke duti ande na yâ ni.+

14 Tongaso, aita so mbi ndoye ala mingi, so ala yeke ku aye so, ala sara ngangu kue ti tene na nda ni lo wara ala na saleté na terê ti ala pëpe, na sioni ye na terê ti ala pëpe nga na yâ ti siriri.+ 15 Ni la, ala bâ kangango bê ti Seigneur ti e tongana salut, gï tongana ti so ita ti e Paul so e ndoye lo mingi asû ni nga na mbeti na ala alingbi na ndara so a mû na lo,+ 16 lo sara tënë na ndö ti aye so gï tongana ti so lo sara nga na yâ ti ambeti ti lo kue. Me, na yâ ti ambeti ni so, ambeni ye ayeke dä so a yeke ngangu ti mä yâ ni, aye so azo so ahinga ye pëpe nga so gere ti ala aluti ngangu pëpe ayeke ba yâ ni, tongana ti so ala yeke sara na tanga ti Mbeti ti Nzapa kue, ti ga na futingo na ndö ti ala.

17 Tongaso, aita so mbi ndoye ala mingi, so ala hinga ye so kozo awe, ala sara hange si girisango lege ti azo ni so akpe ndia pëpe ague na ala yongoro pëpe si ala tï, atâa so ala wani ala luti fade ngangu.+ 18 Me ala ngbâ ti maï na yâ ti kota nzobe nga na yâ ti hingango ye na ndö ti Seigneur na Sauveur ti e Jésus Christ. Zia a mû na lo gloire laso nga kpu na kpu. Amen.