KOZO MBETI TI JEAN

1 E yeke fa peko ti ye so ayeke tënë ti fini,+ ye so ayeke dä na tongo nda ni, ye so e mä tënë ni, e bâ ni na lê ti e, so e bâ ni mbilimbili nga so maboko ti e andu ni. 2 (Biani, a fa fini ni na gigi si azo kue abâ. E bâ fini ti lakue lakue+ so ayeke lani na terê ti Babâ ni na a fa ni polele na e; e yeke sara tënë ni,+ nga e yeke fa peko ni na ala.) 3 Ye so e bâ na e mä, e yeke fa nga peko ni na ala,+ tongaso si ala nga kue ala lingbi ti sara songo na e. Songo ti e ni so, e yeke na ni na Babâ ni nga na Molenge ti lo Jésus Christ.+ 4 Ni la, e yeke sû aye so na mbeti si ngia ti e alingbi kue.

5 Tënë so e mä na yanga ti lo na e yeke fa ni na ala ayeke so: Nzapa ayeke lumière+ na bingo ayeke na yâ ti lo kete pëpe. 6 Tongana e tene: “E yeke na songo na lo,” me e ngbâ ti tambela na yâ ti bingo, andâ e yeke tene mvene nga e ngbâ ti sara ye alingbi na tâ tënë pëpe.+ 7 Me, ndali ti so lo wani lo yeke na yâ ti lumière, tongana e yeke tambela na yâ ti lumière, biani e yeke na songo na popo ti e. Nga, mênë ti Molenge ti lo Jésus asukula e na a zi asiokpari kue awe.+

8 Tongana e tene: “E yeke na siokpari pëpe,” e handa terê ti e wani+ na tâ tënë ayeke na yâ ti e pëpe. 9 Tongana e fa asiokpari ti e na gigi, lo yeke be-ta-zo nga lo yeke mbilimbili, tongaso, lo yeke pardonné asiokpari ti e na lo yeke sukula e na lo zi aye kue so ayeke ti kirikiri.+ 10 Tongana e tene: “E sara siokpari pëpe,” e yeke sara si lo ga zo ti mvene, na tënë ti lo ayeke na yâ ti e pëpe.

2 Amolenge ti mbi so mbi ndoye ala mingi, mbi yeke sû aye so na mbeti na ala si ala tï pëpe na yâ ti mbeni siokpari. Me, tongana a si so mbeni zo atï na yâ ti mbeni siokpari, e yeke na mbeni zo ti mungo maboko* so ayeke na terê ti Babâ ni. A yeke Jésus Christ,+ zo ti mbilimbili.+ 2 Lo yeke sandaga+ so amû lege ti leke songo na popo ti zo na Nzapa, sandaga ndali ti asiokpari ti e.+ Na gï ndali ti asiokpari ti e pëpe, me nga ndali ti asiokpari ti azo ti dunia kue.+ 3 A yeke na lege so la si e hinga so e hinga lo: tongana e ngbâ ti bata acommandement ti lo. 4 Zo so atene: “Mbi hinga lo,” me lo yeke bata acommandement ti lo pëpe, zo ni so ayeke zo ti mvene na tâ tënë ayeke na yâ ti lo pëpe. 5 Me zo kue so abata tënë ti lo, biani a sara si ndoye ti Nzapa aga mbilimbili-kue na yâ ti zo so.+ A yeke tongaso la si e hinga so e yeke beoko na lo.+ 6 Zo so atene ni ngbâ beoko na lo, a yeke ngbanga ti lo ti ngbâ ti tambela gï tongana ti so lo tambela giriri.+

7 Ala so mbi ndoye ala mingi, mbi yeke sû na ala mbeni fini commandement pëpe, me mbeni ngbene commandement so ala wara ni ngbene ye na tongo nda ni.+ Ngbene commandement so ayeke tënë so ala mä lani awe. 8 Me nga, mbi yeke sû na ala mbeni fini commandement so ayeke tâ tënë na ndö ti lo nga na ndö ti ala, ndali ti so bingo angbâ ti hon, na tâ lumière ayeke su+ fadeso awe.

9 Zo so atene ni yeke na yâ ti lumière, me lo ke+ ita ti lo, lo ngbâ na yâ ti bingo.+ 10 Zo so andoye ita ti lo angbâ na yâ ti lumière,+ na mbeni ye ti tene zo apika gere ti lo dä ayeke na yâ ti lo pëpe. 11 Me zo so ake ita ti lo ayeke na yâ ti bingo na lo yeke tambela na yâ ti bingo,+ nga lo hinga ndo so lo yeke gue dä pëpe+ ndali ti so bingo avuko lê ti lo awe.

12 Amolenge so mbi ndoye ala mingi, mbi yeke sû mbeti so na ala ndali ti so a pardonné siokpari ti ala awe ngbanga ti iri ti lo.+ 13 Mbi yeke sû mbeti so na ala, ababâ, ngbanga ti so ala hinga lo so ayeke dä na tongo nda ni. Mbi yeke sû mbeti so na ala, amaseka-koli, ngbanga ti so ala hon Zo ti sioni+ na ngangu awe. Amolenge so mbi ndoye ala mingi, mbi sû mbeti na ala ngbanga ti so ala hinga Babâ ni awe.+ 14 Mbi sû mbeti na ala, ababâ, ngbanga ti so ala hinga lo so ayeke dä na tongo nda ni. Mbi sû mbeti na ala, amaseka-koli, ngbanga ti so ala kpengba,+ tënë ti Nzapa angbâ na yâ ti bê ti ala,+ na ala hon Zo ti sioni na ngangu awe.+

15 Ala ndoye dunia so pëpe wala aye so ayeke na yâ ti dunia so.+ Tongana mbeni zo andoye dunia so, ndoye ti Babâ ni ayeke na yâ ti lo pëpe,+ 16 ngbanga ti so ye kue so ayeke na yâ ti dunia so, so ti tene nzara ti mitele,+ nzara ti lê+ na sarango baba ti akungba so zo ayeke na ni, alondo na Babâ ni pëpe, me a londo na dunia so. 17 Nga, dunia so angbâ ti hon nga na nzara ti lo kue.+ Me zo so asara ye so bê ti Nzapa aye, lo ngbâ lakue lakue.+

18 Amolenge so mbi ndoye ala mingi, so ayeke ndangba ngbonga ni la. Legeoko tongana ti so ala mä so wato-ti-Christ ayeke ga,+ même fadeso awato-ti-Christ mingi aga awe.+ Ni la, e hinga so a yeke ndangba ngbonga ni la. 19 Azo so alondo lani na popo ti e si ala sigi, me ala yeke lani ti e pëpe.+ Tongana ala yeke lani ti e, ka ala ngbâ na popo ti e. Me ala londo na popo ti e ala sigi si a lingbi ti bâ polele so azo kue la si ayeke ti e pëpe.+ 20 Me ti ala, a yeke zo so ayeke nzoni-kue la si asoro* ala,+ na ala kue ala hinga ye. 21 Mbi sû mbeti so na ala, na mbi sû ni pëpe ndali ti so ala hinga tâ tënë pëpe,+ me ndali ti so ala hinga ni, nga ndali ti so mvene oko alondo na yâ ti tâ tënë pëpe.+

22 Zo ti mvene ni ayeke zo wa? A yeke lo so ake so Jésus ayeke Christ.+ So wato-ti-Christ+ ni la, zo so ake Babâ ni nga na Molenge ni. 23 Zo kue so ake Molenge ni, lo yeke beoko na Babâ ni nga pëpe.+ Me zo kue so atene ni hinga Molenge ni,+ lo yeke beoko na Babâ ni nga.+ 24 Ti ala, zia ye so ala mä na tongo nda ni angbâ na yâ ti bê ti ala.+ Tongana ye so ala mä na tongo nda ni angbâ na yâ ti bê ti ala, ala yeke ngbâ ande beoko na Molenge ni nga beoko na Babâ ni. 25 Nga, ye so lo wani lo mû zendo ni na e ayeke so: fini ti lakue lakue.+

26 Mbi sû aye so na ala na ndö ti azo so ayeke tara ti handa ala. 27 Ti ala, sorongo so a soro na ala angbâ na ala.+ Ala yeke na bezoin ti mbeni zo ti fa ye na ala pëpe. Legeoko tongana ti so sorongo ala ni afa ye na ala na ndö ti aye kue,+ na a yeke tâ tënë nga a yeke mvene pëpe, gï tongana ti so a fa ye na ala, zia ala ngbâ ti duti beoko na lo.+ 28 Fadeso, amolenge so mbi ndoye ala mingi, zia ala ngbâ ti duti beoko na lo tongaso si, tongana lo fa terê ti lo na gigi, e lingbi ti sara tënë na kamene pëpe+ nga a kangbi e na lo na kamene na lê ti e pëpe na ngoi so lo yeke duti dä. 29 Tongana ala hinga so lo yeke mbilimbili, ala hinga nga so lo la si lo dü azo kue so angbâ ti sara ye ti mbilimbili.+

3 Bâ mara ti ndoye so Babâ ni afa na mbage ti e so ma,+ si a lingbi ti iri e amolenge ti Nzapa!+ Na e yeke amolenge ti lo biani. Ndani la, dunia so ahinga e pëpe+ ngbanga ti so dunia ni ahinga lo pëpe.+ 2 Ala so mbi ndoye ala mingi, fadeso e yeke amolenge ti Nzapa,+ me ade a fa pëpe na gigi ye so e yeke ga ni ande.+ E hinga so na ngoi so lo yeke fa ande terê ti lo na gigi, e yeke duti ande tongana lo, ngbanga ti so e yeke bâ lo ande gï tongana ti so lo yeke. 3 Azo kue so ayeke na beku so, so ayeke na ndö ti lo, asukula sioni ye kue na terê ti ala+ gï tongana ti so Jésus Christ ayeke na sioni ye oko na terê ti lo pëpe.

4 Zo kue so angbâ na yâ ti siokpari, lo yeke nga zo ti kpengo ndia pëpe, na siokpari ayeke kpengo ndia pëpe. 5 Ala hinga nga so lo fa lani terê ti lo na gigi ti zi asiokpari ti e,+ na siokpari oko ayeke na yâ ti lo pëpe. 6 Zo kue so angbâ beoko na lo angbâ ti sara siokpari pëpe.+ Zo so angbâ ti sara siokpari abâ lo pëpe nga ahinga lo pëpe. 7 Amolenge so mbi ndoye ala mingi, zia mbeni zo ahanda ala pëpe. Zo so angbâ ti sara ye ti mbilimbili ayeke mbilimbili legeoko tongana ti so lo ni so ayeke mbilimbili. 8 Zo so angbâ ti sara siokpari alondo na Zabolo, ngbanga ti so a yeke ngbene ye na tongo nda ni*+ la si Zabolo ayeke sara siokpari. Ndani so Molenge ti Nzapa afa terê ti lo na gigi ayeke ti futi akusala ti Zabolo.+

9 Zo kue so Nzapa adü lo angbâ ti sara siokpari pëpe+ ngbanga ti so ngongoa ti Nzapa* angbâ na yâ ti lo. Lo lingbi ti ngbâ ti sara siokpari pëpe, ngbanga ti so Nzapa la si adü lo.+ 10 A hinga amolenge ti Nzapa na amolenge ti Zabolo na lege ti ye so: Zo kue so ayeke sara ye ti mbilimbili pëpe alondo na Nzapa pëpe, nga zo so andoye ita ti lo pëpe+ alondo na Nzapa pëpe. 11 Tënë so ala mä na tongo nda ni ayeke so: a lingbi e ndoye terê na popo ti e.+ 12 E sara tongana Caïn pëpe, so alondo na Zo ti sioni si lo fâ ita ti lo.+ Lo fâ lo ngbanga ti nyen? Ngbanga ti so akusala ti lo ayeke sioni,+ me akusala ti ita ti lo ayeke mbilimbili.+

13 Aita, so dunia so ake ala, zia li ti ala akpe pëpe.+ 14 E hinga so e londo na yâ ti kuâ awe ti si na fini+ ngbanga ti so e ndoye aita.+ Zo so andoye ita ti lo pëpe angbâ na yâ ti kuâ.+ 15 Zo kue so ake ita ti lo ayeke zo ti fango zo.+ Ala hinga so mbeni zo ti fango zo ayeke na fini ti lakue lakue na yâ ti lo oko pëpe.+ 16 A yeke tongaso si e hinga ndoye, ngbanga ti so lo kä fini* ti lo na kuâ ndali ti e.+ A yeke ngbanga ti e ti kä fini* ti e na kuâ ndali ti aita ti e.+ 17 Me zo kue so ayeke na aye ti gigi so, na lo bâ so ita ti lo ayeke na ye pëpe, me lo ke ti bâ mawa ti lo, tongana nyen si ndoye ti Nzapa ayeke ngbâ na yâ ti lo?+ 18 Amolenge so mbi ndoye ala mingi, zia e ndoye terê na tënë pëpe wala na yanga pëpe,+ me na lege ti kusala+ nga na tâ tënë.+

19 A yeke na lege so la si e yeke hinga ande so e yeke ti tâ tënë, nga e yeke sara si bê ti e adë na gbele lo 20 na ndö ti ye kue so bê ti e ni alingbi ti fâ ngbanga na ndö ti e ndali ni, ngbanga ti so Nzapa ayeke kota ahon bê ti e, na lo hinga ye kue.+ 21 Ala so mbi ndoye ala mingi, tongana bê ti e afâ ngbanga na ndö ti e pëpe, e yeke na kamene pëpe ti sara tënë na Nzapa;+ 22 na ye kue so e hunda na lo,+ e yeke wara ni ndali ti so e yeke bata acommandement ti lo nga e yeke sara ye so anzere na lê ti lo. 23 Biani, commandement ti lo ayeke so: e mä na bê na iri ti Molenge ti lo Jésus Christ+ na e ndoye terê na popo ti e,+ gï tongana ti so lo mû commandement ni na e. 24 Na ndö ni, zo so abata acommandement ti lo angbâ beoko na lo, na lo yeke beoko na zo tongaso.+ E hinga so lo ngbâ beoko na e ndali ti yingo so lo mû na e.+

4 Ala so mbi ndoye ala mingi, ala mä na bê pëpe na atënë kue so alondo na yingo,*+ me ala tara atënë ni so ti bâ wala a londo na Nzapa,+ ngbanga ti so aprophète ti wataka mingi abâ gigi na yâ ti dunia so.+

2 Ala yeke hinga tënë so yingo atene na so alondo na Nzapa na lege so: Tënë kue so yingo atene so atene Jésus Christ aga na yâ ti mitele, tënë ni so alondo na Nzapa.+ 3 Me tënë kue so yingo atene na so atene Jésus aga na yâ ti mitele pëpe alondo na Nzapa pëpe.+ Nga, so ayeke tënë ti yingo so alondo na wato-ti-Christ la; so ala mä tënë ti gango ni awe,+ na fadeso a bâ gigi na yâ ti dunia so awe.+

4 Amolenge so mbi ndoye ala mingi, ala londo na Nzapa na ala hon azo so na ngangu awe,+ ngbanga ti so lo so ayeke beoko na ala+ ayeke kota ahon lo so ayeke beoko na dunia so.+ 5 Azo ni so alondo na dunia so.+ Ndani la, ala yeke sara tënë ti ye so alondo na dunia so na dunia ni amä ala.+ 6 Ti e, e londo na Nzapa. Zo so ahinga Nzapa amä e.+ Zo so alondo na Nzapa pëpe amä e pëpe.+ A yeke tongaso si e hinga tënë so yingo atene so ayeke ti tâ tënë, na tënë so yingo atene so ayeke ti wataka.+

7 Ala so mbi ndoye ala mingi, zia e ngbâ ti ndoye terê na popo ti e+ ngbanga ti so ndoye alondo na Nzapa, na zo kue so ayeke na ndoye, Nzapa la si adü lo na lo hinga Nzapa.+ 8 Zo so ayeke na ndoye pëpe ahinga Nzapa pëpe, ndali ti so Nzapa ayeke ndoye.+ 9 A bâ ndoye ti Nzapa na mbage ti e na lege so: Nzapa atokua lani oko Molenge ti lo+ na dunia so si e lingbi ti wara fini na lege ti lo.+ 10 A bâ ndoye ni na lege so, a yeke e la e ndoye Nzapa pëpe, me a yeke lo la si lo ndoye e na lo tokua Molenge ti lo tongana sandaga so amû lege ti leke songo na popo ti zo na Nzapa,+ sandaga ndali ti asiokpari ti e.+

11 Ala so mbi ndoye ala mingi, tongana a yeke tongaso si Nzapa andoye e, a yeke ngbanga ti e nga ti ndoye terê na popo ti e.+ 12 Mbeni zo abâ Nzapa lâ oko pëpe.+ Tongana e ngbâ ti ndoye terê na popo ti e, Nzapa angbâ na e nga a sara si ndoye ti lo aga mbilimbili-kue na yâ ti e.+ 13 Na lege so e hinga so e ngbâ beoko na lo na lo yeke beoko na e ndali ti so lo mû na e yingo ti lo. 14 Nga, e wani e bâ na e sara tënë ni e tene Babâ ni atokua Molenge ti lo tongana sauveur ti dunia.+ 15 Zo kue so atene so Jésus ayeke Molenge ti Nzapa,+ Nzapa angbâ beoko na zo tongaso, na lo nga lo ngbâ beoko na Nzapa.+ 16 Ti e, e hinga na e mä na bê na ndoye so Nzapa ayeke na ni na mbage ti e.+

Nzapa ayeke ndoye,+ na zo so angbâ na yâ ti ndoye, lo ngbâ beoko na Nzapa, na Nzapa angbâ beoko na lo.+ 17 Bâ lege so e fa ndoye na popo ti e na mbeni lege so ayeke mbilimbili-kue la, si e lingbi ti sara tënë na kamene pëpe*+ na lâ ti fango ngbanga, ndali ti so, gï tongana ti so lo yeke, e nga kue e yeke tongaso na yâ ti dunia so. 18 Mbeto ayeke na yâ ti ndoye oko pëpe,+ me ndoye so ayeke mbilimbili-kue abi mbeto na gigi* ngbanga ti so mbeto ayeke ye ti kangango lege. Biani, zo so ayeke na yâ ti mbeto, a sara si lo lingbi kue pëpe na yâ ti ndoye.+ 19 E yeke na ndoye, ngbanga ti so lo ndoye e kozoni.+

20 Tongana mbeni zo atene: “Mbi ndoye Nzapa,” me lo ngbâ ti ke ita ti lo, lo yeke zo ti mvene.+ Ndali ti so zo so andoye ita ti lo pëpe,+ ita ti lo so lo bâ lo, lo lingbi pëpe ti ndoye Nzapa so lo bâ lo pëpe.+ 21 E wara commandement so na mbage ti lo: zo so andoye Nzapa, a lingbi lo ndoye ita ti lo nga.+

5 Zo kue so amä na bê so Jésus ayeke Christ, Nzapa la si adü zo so.+ Zo kue so andoye Nzapa, lo ndoye nga zo so Nzapa adü lo. 2 E hinga so e yeke ndoye amolenge ti Nzapa+ na lege so: tongana e ngbâ ti ndoye Nzapa na e ngbâ ti bata acommandement ti lo. 3 Ndoye ti Nzapa ayeke so: e bata acommandement ti lo;+ me acommandement ti lo ayeke ye so ane pëpe,+ 4 ndali ti so zo kue so* Nzapa adü ahon dunia so na ngangu.+ Songo benda so ahon dunia so na ngangu ayeke mabe ti e.+

5 Zo wa la alingbi ti hon dunia so na ngangu?+ A yeke zo so amä na bê so Jésus ayeke Molenge ti Nzapa.+ 6 A yeke lo so aga lani na lege ti ngu na mênë, Jésus Christ. Lo ga gï na ngu pëpe,+ me na ngu nga na mênë.+ Yingo ayeke témoin ti ye so,+ ngbanga ti so yingo ni ayeke tâ tënë. 7 Ndali ti so atémoin ayeke ota: 8 yingo,+ ngu+ nga na mênë.+ Na ala ota kue amä terê.

9 Tongana e yeda na tënë so azo afa, tënë so Nzapa afa ayeke kota mingi ahon ti ala, ngbanga ti so tënë so Nzapa afa ayeke so: lo sara tënë na ndö ti Molenge ti lo. 10 Zo so amä na bê na Molenge ti Nzapa, lo wara ti lo tënë ni awe. Zo so amä na bê na Nzapa pëpe, lo sara si Nzapa aga zo ti mvene,+ ndali ti so lo mä na bê pëpe na tënë so Nzapa afa tongana témoin na ndö ti Molenge ti lo. 11 Tënë ni so a fa ayeke so: Nzapa amû na e fini ti lakue lakue,+ na fini so ayeke na yâ ti Molenge ti lo.+ 12 Zo so ayeke beoko na Molenge ni ayeke na fini so. Zo so ayeke beoko na Molenge ti Nzapa pëpe ayeke na fini so pëpe.+

13 Ala so amä na bê na iri ti Molenge ti Nzapa,+ mbi sû aye so na ala si ala hinga so ala yeke na fini ti lakue lakue.+ 14 Confiance so e yeke na ni na lo+ ayeke so: Atâa ye wa la e hunda, tongana a gue oko na ye so bê ti lo aye, lo yeke mä e.+ 15 Tongana e hinga so atâa nyen la e hunda na lo, lo yeke mä e, e hinga nga so e yeke wara biani aye so e hunda ni ngbanga ti so e hunda ni na lo.+

16 Tongana mbeni zo abâ ita ti lo atï na yâ ti mbeni siokpari so ayeke gue na zo na kuâ pëpe, a lingbi lo hunda Nzapa, na Nzapa ayeke mû ande fini na ita ti lo ni.+ Biani, Nzapa ayeke mû fini na ala so atï na yâ ti mbeni siokpari so ague na zo na kuâ pëpe. Mbeni siokpari ayeke dä so ague na zo na kuâ.+ A yeke tënë ti siokpari so la si mbi tene na lo ti hunda Nzapa pëpe. 17 Ye kue so ayeke ye ti kirikiri ayeke siokpari.+ Me mbeni siokpari ayeke dä so ague na zo na kuâ pëpe.

18 E hinga so azo kue so Nzapa la si adü ala angbâ ti sara siokpari pëpe, me lo so Nzapa adü lo* ayeke bâ ndo na ndö ti ala, na Zo ti sioni alingbi ti gbu ala pëpe.+ 19 E hinga so e yeke ti Nzapa, me dunia so kue ayeke na gbe ti Zo ti sioni.+ 20 Me e hinga so Molenge ti Nzapa aga,+ na lo mû na e ndara* si e lingbi ti hinga tâ Nzapa. E yeke beoko na tâ Nzapa+ ni na lege ti Molenge ti lo Jésus Christ. So tâ Nzapa na fini ti lakue lakue ni la.+ 21 Amolenge so mbi ndoye ala mingi, ala kpe ayanda.+