Na yaka ti Gethsémané

TONGANA Jésus na abazengele ti lo asigigi na da ni awe, ala gue na yaka ti Gethsémané. Ala gue kâ fani mingi kozoni awe. Fadeso Jésus atene na ala ti lango pëpe na ti sambela. Na pekoni, lo hon a yo kete na ala, na lo kuku na sese ti sambela.

Kete na pekoni, Jésus akiri na ndo so abazengele ti lo ayeke dä. Ti mo, ala yeke sara nyen? Ala yeke lango! Lege ota, Jésus atene na ala ti lango pëpe, me lakue tongana lo kiri, lo wara ala na lango. Tongana lo kiri ti fani ota ni, lo tene: ‘Ala lango na mara ti ngoi tongaso ngbanga ti nyen? L’heure ni asi awe ti tene a kä mbi na awato ti mbi.’

Tâ gi na ngoi ni so, a mä go ti gbâ ti azo so ayeke ga. Bâ! Azo ayeke ga na ayongoro zembe nga na akeke na maboko ti ala! Ala yeke nga na akeke so wâ ayeke na yanga ni ti tene ala bâ na ndo. Tongana ala si nduru, mbeni zo alondo na popo ti ala aga na mbage ti Jésus. Lo su ngbangba ti Jésus, tongana ti so mo bâ ge. Zo ni so ayeke tâ gi Judas Iscariote. Ngbanga ti nyen lo su ngbangba ti Jésus?

Jésus ahunda lo, a tene: ‘Judas, na lege ti sungo ngbangba ti mbi si mo yeke kä mbi?’ Tâ tënë, a yeke na lege ti sungo ngbangba ti lo si azo so aga legeoko na Judas alingbi ti hinga Jésus, zo so ala ye ti gbu lo so. Tongaso ala ga ala gbu lo. Me Pierre ayeke bâ ala gi na lê pëpe. Lo mû yongoro zembe so ayeke na tere ti lo si lo ye ti dë na zo so ayeke nduru na lo. Zembe ni ahon tâ gi nduru na tere ti li ti zo ni si afâ mê ti lo ti mbage ti koli. Me Jésus andu mê ti zo ni na a kiri na place ni.

Jésus atene na Pierre: ‘Kiri na yongoro zembe ti mo na place ni. Mo bâ mo tene mbi lingbi ti hunda Babâ ti mbi ti tokua a-ange saki mingi ti zi mbi na lê ni pëpe?’ Lo lingbi ti sara tongaso. Me Jésus ahunda na Babâ ti lo ti tokua a-ange pëpe, ngbanga ti so lo hinga so l’heure ni asi awe ti tï na maboko ti awato ti lo. Tongaso, lo zia ala ti gue na lo. Zia e bâ ye so asi na Jésus fadeso.