Jésus afa tere ti lo na azo

TONGANA Pierre na Jean azia ndo so kuâ ti Jésus ayeke fade dä na ala kiri, Marie angbâ kâ gi lo oko. Lo tï na toto. Na pekoni, lo ba li ti lo ti bâ ndo na yâ ti dû ti kuâ ni, tongana ti so a fa na lê ti foto ti mbaï 102. Lo bâ a-ange use! Ala hunda lo, a tene: ‘Mo toto ngbanga ti nyen?’

Marie atene na ala: ‘A mû kuâ ti Seigneur ti mbi a hon na ni, na mbi hinga ndo so a zia ni dä pëpe.’ Na pekoni, Marie aturne tere ti lo na lo bâ mbeni koli. Koli ni ahunda lo, a tene: ‘Mo yeke gi zo wa?’

Marie abâ ti lo atene koli so ayeke zo ti lekengo ndo ni, na peut-être lo la lo mû kuâ ti Jésus ni. Tongaso lo tene: ‘Tongana mo la mo mû kuâ ni, fa na mbi ndo so mo zia ni dä.’ Andâ, koli so ayeke Jésus. Lo mû mbeni tere so Marie ahinga ni pëpe. Me tongana Jésus airi lo na iri ti lo mveni, Marie ahinga so a yeke Jésus la. Tongaso, lo kpe lo gue lo tene na adisciple ti Jésus, lo tene: ‘Mbi bâ Seigneur!’

Gi na yâ ti oko lango ni so, tongana adisciple ti lo use ayeke tambela na lege ti gue na kodoro ti Emmaüs, mbeni koli ague oko na ala. Adisciple so asara mawa mingi ndali ti so a fâ Jésus. Me na lege, koli so afa nda ti atënë mingi so ayeke na yâ ti Mbeti ti Nzapa, na atënë so adë bê ti ala. Na nda ni, tongana ala luti ti te kobe, ala ga ti bâ so koli so ayeke Jésus. Me Jésus agirisa na lê ti ala, na adisciple use so akiri na Jérusalem na loro ti tene tënë ni na abazengele.

Na yâ ti ngoi ni so, Jésus afa tere ti lo nga na Pierre. Bê ti adisciple adö tongana ala mä tënë ni. Tongana adisciple use so asi na Jérusalem na ala wara abazengele, ala fa na ala tongana nyen Jésus afa tere ti lo na ala na lege. Na ndembe so ala ngbâ ti sara tënë, mbeni ye ti ndima asi. Mo hinga ni?

Bâ foto so. Jésus asi na popo ti adisciple ti lo tâ gi na yâ ti da ni, atâa so yanga ni akanga. Tere ti ala anzere mingi! Biani, aye mingi asi na yâ ti lango ni so. Juska ge, Jésus afa tere ti lo na adisciple ti lo fani oke awe? Mo diko ni fani oku?

Bazengele Thomas ayeke lani na popo ti ala pëpe na ngoi so Jésus asi na ala. Tongaso ala tene na lo: ‘E bâ Seigneur!’ Me Thomas atene so ni yeke yeda na ni gi tongana ni bâ lo tâ na lê ti ni si. Lango miombe na pekoni, adisciple akiri awara tere na yâ ti mbeni da so yanga ni akanga. Ti so ni, Thomas ayeke na popo ti ala. Mo ye ti bâ, Jésus asi na popo ti ala tâ gi na yâ ti da ni, na Thomas ayeda fadeso na ni.