Chapitre 11

Jean aleke lege

NGU BALE oko na ndoni mbasambala ahon awe, a londo na ngoi so Jésus so lo de ando na ngu bale oko na ndoni use ayeke hunda tene na awafango ye na ya temple. E yeke fadeso na printemps na ngu 29 ti ngoi ti e. Azo kue asala tene ti Jean, koya ti Jésus, so ayeke fa tene na kodoro kue na mbage ti ngu ti Jourdain.

Biani Jean ayeke koli so ayeke pika be ti zo na lege ti yungo bongo ti lo nga na lege ti tene ti lo. Lo yeke na mbeni bongo so asala ni na kua ti chameau, na lo yo mbeni ceinture ti poro na mbunda ti lo. Lo yeke te gi aki na mafuta ti watoro so lo wara na ya ti ngunda. Tene ti lo ayeke so wa? “I gbian be ti i, teti royaume ti yayu aga ndulu awe.”

Tene so ayeke pika be ti azo so ama ni. Na mingi na popo ti ala ahinga a lingbi ala gbian be ti ala, so ti tene, ala gbian bango ndo ti ala na ala ke ngbele salango ye ti ala tongana ye ti sioni. Ni laa si azo mingi mingi aga na mbage ti Jean. Ala londo na kodoro so ayeke ndulu na Jourdain, na ambeni alondo même na Jérusalem. Jean amu batême na ala na lege so lo yoro ala na gbe ti ngu ti Jourdain. Me ngbanga ti nyen?

Batême ti Jean ayeke fa so azo agbian be ti ala biani na lege ti asiokpari so ala sala na tele ti mbele ti Ndia ti Nzapa. Ni laa, tongana ambeni Farizien na Sadducéen asi nga na Jourdain, Jean afa ngbanga na ndo ala tongaso: “I amolenge ti ngbo. (...) I le lengo so alingbi na sanzengo be; na i bi be ti i pepee ti tene na be ti i: ‘Abraham ayeke baba ti i.’ Teti mbi tene na i, Nzapa alingbi sala si tene so aga amolenge teti Abraham. Même fadeso, do ayeke na gere ti keke; tongaso keke oko oko kue so ale le-keke ti nzoni pepee, fade a fa keke so na abi na wa.”

Salango ye ti Jean asala si azo mingi ayeke ga na lo na tongaso aFarizien atokua na lo aprêtre na aLévite. Ala hunda na lo: “Mo yeke zo wa?”

“Mbi yeke Christ pepee”, Jean atene.

“Tongaso, nyen?” ala hunda. “Mo yeke Elie?”

“Pepee”, lo tene.

“Mo yeke Prophète Ni?”

“Pepee!”

Tongaso ala kiri ahunda na lo: “Mo yeke zo nyen? si e lingbi kiri tene na ala so ato e. Mo tene nyen tene ti mo mveni?”

Jean atene na ala: “Mbi, mbi yeke yanga ti mbeni zo so adekongo na ya yando: ‘I leke lege ti Jéhovah mbilimbili’, tongana ti so prophète Esaïe atene.”

“Tongana mo yeke Christ pepee, na Elie pepee, na Prophète Ni nga pepee, ngbanga ti nyen mo batisé azo?” ala ye ti hinga.

“Mbi batisé na ngu”, lo kiri tene. “Me mbeni zo aluti na popo ti i so i hinga lo pepee, lo yeke ga na peko ti mbi.”

Jean aleke lege tongana lo sala si azo aleke be ti ala nzoni ti yeda na Messie so ayeke ga ande Gbia. Lo sala tene ti Messie so tongaso: “Lo yeke ga na peko ti mbi, na mbi lingbi na lo pepee, même ti lungula kamba ti poro ti gere ti lo.” Jean atene nga: “Na peko ti mbi mbeni zo ayeke ga, lo so ague kozo na mbi, ngbanga ti so lo yeke giriri na fini kozoni na mbi.”

Tongaso, tene ti Jean, “royaume ti yayu aga ndulu awe”, afa polele so fade fade kusala ti Gbia so Jéhovah ato lo, Jésus Christ, ayeke tondani. Jean 1:6-8, 15-28; Matthieu 3:1-12; Luc 3:1-18; Kusala 19:4.

▪ Jean ayeke mara ti zo wa?

▪ Ngbanga ti nyen Jean abatisé azo?

▪ Ngbanga ti nyen Jean atene Royaume aga ndulu awe?