Chapitre 17
A fa ye na Nicodème
NA NGOI so Jésus ayeke na matanga ti Pâque ti ngu 30, lo sala akota fa wala ye ti kpene. Ye ti kpene so lo sala apusu azo mingi ti ma na be na lo. Nicodème, mbeni zo ti Sanhédrin, kota da ti fango ngbanga ti aJuif, tene ti Jésus apika be ti lo mingi na lo ye ti manda ambeni tene da. Tongaso lo gue ti baa Jésus na bi, peut-être mbito asala lo so tongana azo abaa lo ambeni mokonzi ti aJuif ayeke yekia lo mbeni pepee.
Lo tene: “Rabbi, e hinga mo yeke wafango ye so Nzapa ato mo; teti zo alingbi ti sala fa pepee so mo sala tongana Nzapa ayeke na lo pepee.” Ti kiri tene, Jésus atene na Nicodème so ti li na ya Royaume ti Nzapa, a lingbi ti “du zo mbeni”.
Ye oko, a lingbi ti du zo mbeni tongana nyen? “Lo lingbi ti kiri na ya mama ti lo, na mama ti lo akiri adu lo mbeni tongana nyen?” ahunda Nicodème.
Oko pepee, so ayeke pepee ye so dungo zo mbeni aye ti tene. “Tongana adu zo na ngu na yingo pepee, lo lingbi ti li na ya royaume ti Nzapa pepee”, atene Jésus. Tongana Jésus awara batême na yingo ti nzoni-kue azu na ndo lo, adu lo na “ngu na yingo”. Na lege ti tene so alondo na yayu na la ni ka, ‘So ayeke Molenge ti mbi, lo mu ngia na mbi’, Nzapa afa so lo sigigi na mbeni molenge ti yingo so ayeke na beku ti li ande na ya Royaume ti yayu. Na pekoni, na Pentecôte ti ngu 33, ambeni zo so awara batême ayeke wara yingo ti nzoni-kue na tongaso fade adu ala mbeni nga tongana amolenge ti Nzapa na lege ti yingo.
Me kusala ti Molenge ti Nzapa tongana zo ane mingi. Jésus atene na Nicodème: “Lege-oko tongana Moïse akanga ngbo na nduzu na yando giriri, a lingbi ala kanga Molenge ti zo na nduzu tongaso nga, si azo kue so ama na be na lo ayeke na fini ti lakue lakue.” Biani, lege-oko tongana aIsraélite so asioni ngbo ate ala alingbi ti baa ngbo ti ngengere ti tene ala kui pepee, tongaso nga, azo kue alingbi ti sala ye na mabe na Molenge ti Nzapa ti tene azi ala na gbe ti kui.
Ti bi le ti zo na ndo ndoyee so Jéhovah afa na gigi na lege ti tene so, na pekoni Jésus atene na Nicodème: “Teti Nzapa andoyee sese ni mingi, lo mu Molenge ti lo ngengele oko, si azo kue so asala ye na mabe na lo a lingbi ti futi ala pepee, me ala wara fini ti lakue lakue.” Tongaso na Jérusalem, gi nze omene na peko ti so lo tonda ti sala kusala ti lo, Jésus afa mbilimbili so a yeke na lege ti lo si Jéhovah Nzapa ayeke so azo.
Jésus akiri afa mbeni ye na Nicodéme: “Teti Nzapa ato Molenge ti lo na sese so ti fa ngbanga ti sese so pepee”, so ti tene ti fa ngbanga ti sioni na ndoni pepee, wala ti tene pepee so azo alingbi na futingo ni. Nde na so, tongana Jésus atene, ato lo “si azo ti sese so alingbi wara fini na ya lo”.
Teti so mbito asala Nicodème lo ga ti baa Jésus na bi. Tongaso a yeke nzoni ti baa so Jésus akonda ti lisoro ti lo na Nicodème na tene so: “So ayeke ngbanga ni, lumière [so Jésus ayeke biani na ya fini ti lo na fango tene ti lo] aga na sese so, me azo aye bingo ahon lumière, teti kusala ti ala ayeke sioni. Teti zo so asala sioni ake lumière, lo si na lumière pepee, wala fade lumière afa kusala ti lo na gigi. Me zo so asala na lege ti taa tene asi na lumière, tongaso azo alingbi baa kusala so lo sala ayeke na lege ti Nzapa.” Jean 2:23–3:21; Matthieu 3:16, 17; Kusala 2:1-4; Nombre 21:9.
▪ Ye nyen apusu Nicodème ti gue ti baa Jésus? Ngbanga ti nyen lo gue na bi?
▪ Ti “du zo mbeni” aye ti tene nyen?
▪ Tongana nyen si Jésus afa na gigi ye so lo sala ti so e?
▪ Tongana a tene Jésus aga pepee ti fa ngbanga ti sese so, aye ti tene nyen?