Mbage 1
Nzapa abi be ti lo biani na ndo ti e?
1, 2. Hundango ndo wa azo ayeke hunda na tele ti ala na ndo ti Nzapa, na ngbanga ti nyen?
NA MBENI ngoi na fini ti mo, ye asi so mo hunda tele ti mo na tene so: “Tongana Nzapa ayeke da, na tongana lo bi be ti lo biani na ndo ti e, tongana nyen si lo lingbi ti zia lege na apasi mingi tongaso? ” Sana asi na e kue awe, wala e hinga mbeni zo so ye tongaso asi na lo.
2 Taa tene, na ya Mbaï kue, azo ahinga sana na vundu so aga na lege ti bira, aye ti ngangu, fango zo, nzi, fango ngbanga ti mbilimbili pepee, nzinga, kobela na kui ti azo so ala ndoyee ala mingi. Gi na ya siècle bale use ni ti e so, abira afa azo ahon kutu ngbangbo oko. Na ambeni kutu ngbangbo mingi awara ka, aglisa da ti ala wala akungba ti ala. Ngoi ti e abaa aye ti sioni mingi so aga na azo mingi na vundu, nga na ngule, na bibe so ayeke na beku oko pepee.
3, 4. Bibe wa azo mingi ayeke na ni ngbanga ti so Nzapa azia lege na vundu ti si?
3 Ambeni aduti na suingo be na ala baa so tongana Nzapa ayeke da, lo bi be ti lo biani pepee na ndo ti e. Ambeni ayeke da so abi be ti ala so Nzapa ayeke da pepee. Na tapande, mbeni koli, so kpale asi na lo ngbanga ti tene ti mara na ngoi ti Kozo Bira ti ndo le sese kue so na ya ni lo glisa andeko ti lo na azo ti sewa ti lo, ahunda tele ti lo: “Nzapa ayeke giriri na ndo wa na ngoi so alingbi lo mu maboko na e? ” Be ti mbeni koli, so aso kua na popo ti akua kutu mingi so anazi afa na ngoi ti Use Bira ti mu le sese kue, agi lo mingi ngbanga ti asana so lo baa na tongaso lo tene: “Tongana mo su be ti mbi, suingo ni ayeke fa mo.”
4 Tongaso, azo mingi ahinga pepee tongana nyen mbeni Nzapa so ayeke nzoni alingbi ti zia lege si aye ti sioni asi. Ala yeke hunda tele ti ala tongana lo yeke bi be ti lo biani na ndo ti e wala tongana lo yeke da. Azo mingi abi be ti ala so fade pasi ayeke duti da lakue na ngoi kue so azo ayeke na fini na ndo sese.
Tongana a fa mbeni ye nde pepee, averset ti Mbeti ti Nzapa alondo na Saintes Écritures — Traduction du monde nouveau.
[Foto na alembeti 2, 3]
Fini sese so pasi ayeke da mbeni pepee aga ndulu?