Ye Ti Manda 7
Mbeni Gbotongo Mê ti Giriri
Jéhovah ayeke zia ande lege pepe na azo ti sioni ti buba Paradis. Gi andeko ti lo si ayeke duti dä. Fade ye nyen ayeke si na azo ti sioni? Ti hinga kiringo tene ni, bi bê na ndo tâ mbaï ti Noé. Noé ayeke giriri na fini a sala ngu saki mingi awe. Lo yeke la ni mbeni zo ti nzoni so atara lakue ngangu ti sala ye so bê ti Jéhovah aye. Ye oko, tanga ti azo na ndo sese na lâ ni kâ asala aye ti sioni. Tongaso, Jéhovah atene na Noé so Lo yeke ga ande na mbeni kota moa ti futi azo ti sioni so kue. Lo tene na Noé ti leke mbeni arche ti tene lo na sewa ti lo akui pepe na ngoi so Kota Moa ni aga.—Genèse 6:9-18.
Noé na sewa ti lo aleke arche. Noé agboto mê ti azo so Kota Moa ayeke ga, me ala mä lo pepe. Ala ngbâ ti sala aye ti sioni. Na peko ti so a hunzi ti leke arche ni, Noé ague na anyama na yâ ti arche, nga lo na sewa ti lo alï na yâ ni. Na pekoni, Jéhovah aga na kota pupu ti ngu. Ngu-nduzu apika teti lâ 40 na bï 40. Ngu amu ndo lê sese kue.—Genèse 7:7-12.
Azo ti sioni aglisa fini ti ala, me a sö Noé na sewa ti lo. Jéhovah asö fini ti ala na Kota Moa ti duti na yâ ti mbeni sese so a lungula asioye kue dä. (Genèse 7:22, 23) Bible akiri atene so ngoi ayeke ga so fade Jéhovah ayeke futi azo so ake ti sala ye so ayeke mbilimbili. Fade a yeke futi pepe azo ti nzoni. Ala yeke duti ande na fini na ndo sese so aga Paradis teti lakue lakue.—2 Pierre 2:5, 6, 9.
Laso azo mingi asala aye ti sioni. Sese asi singo na wusuwusu. Jéhovah atokua aTémoin ti lo fani mingi ti gboto mê ti azo, ye oko, mingi ni aye pepe ti mä atene ti Jéhovah. Ala ye pepe ti gbian alege ti ala. Ala ye pepe ti yeda na ye so Nzapa atene na ndo ti nzoni nga na sioni. Fade ye nyen ayeke si na azo so? Fade mbeni lâ ala yeke gbian? Mingi ti ala ayeke gbian lâ oko pepe. Ngoi ni ayeke ga so fade a yeke futi azo ti sioni na ala yeke kiri na fini lâ oko pepe.—Psaume 92:8 (92:7, NW).
Fade a yeke futi sese ni pepe; a yeke leke ni ti ga mbeni paradis. Azo so aga andeko ti Nzapa ayeke duti ande na yâ ti sese so aga Paradis teti lakue lakue.—Psaume 37:29.