Ye ti Manda 10
Tongana Nyen ti Wara Tâ Lege ti Vorongo
Tongana mo ye ti duti ndeko ti Nzapa, a lingbi mo mu peko ti lege ti vorongo so Nzapa ayeda na ni. Giriri Jésus atene “atâ wavorongo” ayeke voro Nzapa na lege ti “tâ tene.” ( Jean 4:23, 24, NW) Tâ lege ti voro Nzapa ayeke gi oko. (aEphésien 4:4-6) Tâ lege ti vorongo ague na fini ti lakue lakue, na lege ti vorongo ti wataka ague na futingo.—Matthieu 7:13, 14.
Mo lingbi ti hinga tâ lege ti vorongo na bango azo so ayeke mu pekoni. Teti Jéhovah ayeke nzoni, a lingbi azo so ayeke atâ wavorongo lo aduti nga azo ti nzoni. Legeoko tongana mbeni nzoni keke ti orange alë apendere orange, tâ lege ti vorongo alë azo ti nzoni.—Matthieu 7:15-20.
Andeko ti Jéhovah aba Bible na nene ni mingi. Ala hinga so Bible alondo na Nzapa. Ala zia ye so lo tene ti fa lege na fini ti ala, ti leke akpale ti ala, na ti mu maboko na ala ti manda ye na ndo Nzapa. (2 Timothée 3:16) Ala yeke sala ngangu ti mu peko ti ye so ala yeke fa.
Andeko ti Jéhovah afa ndoye na popo ti ala. Jésus afa ndoye teti azo na fango ye na ala na ndo Nzapa nga na savango azo so tele ti ala aso. Azo so ayeke mu peko ti tâ lege ti vorongo ayeke fa nga ndoye na mbage ti azo. Tongana Jésus, ala ke pepe awanzinga wala azo ti mbeni kete mara nde. Jésus atene la ni so fade azo ayeke hinga adisciple ti lo na lege ti ndoye so ala yeke fa na popo ti ala.—Jean 13:35.
Andeko ti Nzapa ayekia iri ti Nzapa, Jéhovah. Tongana mbeni zo ake ti di iri ti mo, lo yeke kamarade ti mo so ayeke ndulu mingi na mo? Oko pepe! Tongana e yeke na mbeni kamarade, e yeke di iri ti lo na e yeke sala anzoni tene na ndo ti kamarade so na ambeni zo. Tongaso, a lingbi azo so aye ti duti andeko ti Nzapa adi iri ti lo na asala tene ti lo na azo. Jéhovah aye si e sala tongaso.—Matthieu 6:9; aRomain 10:13, 14.
Tongana Jésus, andeko ti Nzapa afa na azo ye na ndo ti Royaume ti Nzapa. Royaume ti Nzapa ayeke ngorogbia ti yayu so ayeke sala ande si sese aga mbeni paradis. Andeko ti Nzapa akangbi nzo tene ti Royaume ti Nzapa so na ambeni zo.—Matthieu 24:14.
A-Témoin ti Jéhovah ayeke gi lege ti duti andeko ti Nzapa. Ala yeke ba Bible na nene ni na ala yeke ndoye tele na popo ti ala. Ala yeke di na ayekia nga iri ti Nzapa na ala yeke fa ye na ambeni zo na ndo ti Royaume ti Nzapa. A-Témoin ti Jéhovah ayeke mu peko ti tâ lege ti vorongo na ndo ti sese laso.