Ye ti Manda 17

Ti Bata Akamarade, Mo Mveni Mo Duti Kamarade

Songo ti dutingo kamarade aluti na ndo ti ndoye. Tongana mo manda ye mingi ahon na ndo ti Jéhovah, ndoye ti mo teti lo ayeke kono mingi ahon. Na ngoi so ndoye ti mo teti Nzapa ayeke kono, nzala ti mo ti sala na lo ayeke kono nga. Fade ye so ayeke pusu mo ti ga mbeni disciple ti Jésus Christ. (Matthieu 28:19) Na bungbingo na sewa ti aTémoin ti Jéhovah so ayeke na ngia, mo lingbi ti lë songo ti dutingo ndeko na Nzapa teti lakue lakue. A lingbi mo sala nyen?

A lingbi mo fa na gigi ndoye ti mo teti Nzapa na batango andia ti lo. “Nda ti ndoye ti Nzapa aye ti tene e bata akomandema ti lo; na akomandema ti lo ayeke ye so ane pepe.”—1 Jean 5:3, NW.

Sala ye alingbi na ye so mo manda. Giriri Jésus amu mbeni toli so aduti tapande ti ye so. Mbeni zo ti ndara aleke da ti lo na ndo ti tênë. Mbeni zo ti buba aleke da ti lo na ndo ti mbutu. Tongana mbeni kota pupu ti ngu aga, da so a leke ni na ndo ti tênë atï pepe, me da so a leke ni na ndo ti mbutu atï na ngangu mingi. Jésus atene azo so amä afango ye ti lo na asala ye alingbi na ni ayeke tongana zo ti ndara so aleke da na ndo ti tênë. Me ala so amä afango ye ti lo na asala ye alingbi na ni pepe ayeke tongana zo ti buba so aleke da na ndo ti mbutu. Na popo ti azo use so, mo ye ti kpa zo wa?—Matthieu 7:24-27.

Mungo tele na Nzapa. Ye so aye ti tene mo gue ndulu na Jéhovah na lege ti sambela na mo tene na lo so mo ye ti sala ye so bê ti lo aye teti lakue lakue. Salango ye so bê ti Nzapa aye afa so mo yeke mbeni disciple ti Jésus Christ.—Matthieu 11:29.

Batême. “Mo kamata batême na sukula asiokpari ti mo na dingo iri ti lo.”—Kusala 22:16, NW.

Mu mbage ti mo kue na yâ salango na Nzapa. “Ye kue so i sala, i sala na âme ti i kue tongana ti so a yeke teti Jéhovah, na pepe teti azo.”—aColossien 3:23, NW.