Ye ti Manda 18
Duti Ndeko ti Nzapa Teti Lakue Lakue!
Salango kamarade na mbeni zo ahunda ti sala ngangu; batango mbeni kamarade ahunda ti sala ngangu. Fade a yeke hiri adeba nzoni mingi na ndo ti angangu so mo sala ti ga na ti ngbâ ndeko ti Nzapa. Jésus atene na azo so amä na bê na lo: “Fade tâ tene azi i.” (Jean 8:32, NW) A ye ti tene nyen?
Mo lingbi ti wara liberté fadeso. Mo lingbi ti zi tele ti mo biani na gbe ti afango ye ti wataka nga na atene ti mvene so Satan akangbi na ndo kue. Mo lingbi ti zi tele ti mo na gbe ti suingo bê so asi yâ ti fini ti azo kutu mingi so ahinga Jéhovah pepe. (aRomain 8:22) A zi andeko ti Nzapa même na gbe ti “mbito ti kui.”—aHébreu 2:14, 15.
Mo lingbi ti wara liberté na yâ ti fini sese ti Nzapa. So tâ pendere liberté si mo lingbi ti wara na yâ ngoi so ayeke ga! Na yâ sese so aga Paradis, fade bira, kobela na kengo ndia ayeke duti dä pepe. Fade nzinga na nzala ayeke duti dä pepe. Fade mbakoro na kui ayeke duti dä pepe. Fade mbito, sioni komandema na ye ti kirikiri ayeke duti dä pepe. Bible atene na ndo ti Nzapa: “Mo lungula maboko ti mo na mo kaï nzala ti ye kue so ayeke na fini.”—Psaume 145:16, NW.
Fade andeko ti Nzapa ayeke duti na fini teti lakue lakue. Fini ti lakue lakue ayeke matabisi ti ngele ngangu so Nzapa ayeke mu ande na azo kue so agi ti lë songo ti dutingo ndeko na lo. (aRomain 6:23) Bi bê ti mo kete na ye so fini so ayeke na nda ni pepe aye ti tene teti mo!
Mo yeke wara ande ngoi ti sala aye mingi. Peut-être mo ye ti manda lege ti pika mbeni gbakuru ti mozoko. Wala peut-être mo ye ti manda ti sala a-dessin wala ti duti wakpakango keke. Peut-être mo ye ti manda ye na ndo ti anyama wala akeke nde nde. Wala peut-être mo ye ti tambela ti ba akodoro na azo nde nde. Fade dutingo na fini ti lakue lakue ayeke zi lege na mo ti sala aye so kue!
Mo yeke wara ande ngoi ti sala kamarade na azo mingi. Dutingo na fini teti lakue lakue ayeke mu lege na mo ti hinga azo mingi so aga awe andeko ti Nzapa. Fade mo yeke hinga akode nga na apendere lengo ti ala, na ala yeke duti ande akamarade ti mo nga. Fade mo yeke ndoye ala, na ala yeke ndoye mo nga. (1 aCorinthien 13:8) Dutingo na fini so nda ni ayeke dä pepe ayeke mu ande ngoi na mo ti sala kamarade na zo oko oko kue na ndo ti sese! Ye ti nzoni ahon, songo ti mo ti dutingo ndeko na Jéhovah ayeke ga ngangu mingi ahon tongana asiècle ayeke hon. Zia si mo duti ndeko ti Nzapa teti lakue lakue!