Dutingo kpô na yâ salango tënë

TI TENE mbeni wamungo diskur agi bê ti lo na ngoi so lo to nda ti sala tënë, mbilimbili tongana lo yeke mû diskur fani mingi pëpe, a yeke ye so ayeke si ka lakue. Mbeni wafango tënë alingbi ti gi bê ti lo kete tongana lo yeke sala akozo vizite ti lo ti lango ni na fango tënë. Tongana a tokua lo ti duti mbeni prophète, Jérémie atene: “Bâ, mbi hinga lege ti sala tënë pëpe, teti mbi de molenge.” (Jér. 1:5, 6). Jéhovah amû maboko ândö na Jérémie; lo yeke mû ande maboko na mo nga. Tongana ngoi ayeke hon, mo lingbi ti manda ti duti kpô na yâ salango tënë ti mo.

Wamungo diskur so aduti kpô na yâ salango tënë ti lo ayeke lo so afa lege na tele ti lo. Ye so ayeke sigigi polele na yâ ti salango ye ti tele ti lo. Lutingo ti lo ayeke tongana ti lâ oko oko na alingbi na ngoi ni. Lo yeke yengi amaboko ti lo na lege ni. Go ti lo atoto nzoni na lo fa lege na ni.

Atâa so mo lingbi ti bâ so mo sala ye pëpe tongana ti so a fa na yâ ti aparagraphe so ahon, mo lingbi ti sala ye nzoni ahon ti kozo. Tongana nyen? Zia e bâ ngbanga ti nyen mbeni wamungo diskur ayeke gi bê ti lo na aduti kpô pëpe na yâ salango tënë ti lo. Ye ni alingbi ti londo na yâ ti tele ti lo.

Tongana mbeni kpale ayeke na gbele mo so a lingbi mo hon ndo ni na mo ye ti sala ye nzoni, me mo hinga pëpe wala mo yeke sala ni ande nzoni, mo yeke gi bê ti mo. Tongaso, li ti mo atene na tele ti mo ti tokua gbâ ti mbeni yorö so asala si mênë ti mo atambela na loro. Ye so asala si bê ti mo ayeke pika na loro, mo yeke hu na loro, gbiki ayeke sigigi na mo ngangu wala maboko ti mo, gere ti mo na go ti mo ayeke dö dongo. Tele ti mo ayeke sala kue ti mû na mo ngangu ahon ti kozo ti luti na gbele ye so. Me, kpale ni ayeke ti hinga ti fa lege na ngangu so mo kiri mo wara ni ti tene mo gbu li ti mo nzoni na mo sala tënë na wâ.

Lege ti dë gingo bê. Dabe mo so a yeke na lege ni ti gi bê kete. Ye oko, ti ngbâ lakue ti duti kpô na yâ salango tënë ti mo, a lingbi mo wara lege ti dë gingo bê ti mo na ti sala ye kpô nga na nengo tele. Mo lingbi ti sala ye so tongana nyen?

Leke tele nzoni. Mû ngoi mingi ti leke diskur wala devoir ti mo. Gi ti bâ so mo gbu nda ti tënë ni nzoni. Tongana a yeke mo la mo yeke soro atënë ti tene na yâ devoir ti mo, bâ ye so azo ni ahinga awe na ndo tënë ni nga ye wa mo ye ti sala. Ye so ayeke mû ande maboko na mo ti soro aye so alingbi na ni ahon atanga ni. Tongana na tongo nda ni mo bâ so a yeke ngangu mingi ti sala ye so, sala lisoro na ndo ni na mbeni wamungo diskur ti kode. Lo lingbi ti mû maboko na mo ti gi ti hinga nzoni mingi ye so mo yeke mû ti leke na devoir ti mo nga azo so ayeke mä mo ande. Tongana mo hinga na bê kue so mo yeke na mbeni ye so ayeke ga ande na ye ti nzoni na azo ni, na a yeke polele na yâ ti li ti mo, nzara ti mo ti fa ni na azo ayeke to nda ni ande ti kanga ndo ti gingo bê so mo yeke na ni na ndo salango tënë ni.

Bi lê mbilimbili na ndo akozo tënë ti mo. Hinga tongana nyen mo yeke to nda ni ande. Tongana diskur ti mo ato nda ni awe, gingo bê ti mo alingbi ti hon ande.

A-oko kapa so alingbi na lekengo tele teti fango tënë. Bâ pëpe gi kota li ti tënë so mo ye ti sala tënë na ndo ni, me nga mara ti azo wa mo yeke fa tënë na ala ande. Leke akozo tënë ti mo nzoni. Wara ye ti nzoni na mbage ti akpengba wafango tënë so ayeke na kode.

Mo lingbi ti tene peut-être so, tongana mo yeke sala tënë na gbele mbeni bungbi ti azo, mo yeke duti ande kpô mingi na yâ salango tënë ti mo tongana mo sû atënë oko oko kue na mbeti. Ti tâ tënë ni, ye so alingbi ti kono ande gingo bê ti mo na ngoi kue so mo yeke mû mbeni diskur. A yeke tâ tënë so ambeni wamungo diskur ayeke sû atënë na mbeti mingi ahon ambeni nde. Me ye so ayeke sala si mo gi bê ti mo mingi pëpe ayeke pëpe atënë so ayeke na lê ti mbeti, me ayeke so mo hinga na bê ti mo kue so ye so mo leke teti azo so ayeke mä mo ande alingbi biani.

Tara peko ti salango tënë ni na kota go. Mara tarango peko ti tele tongaso ayeke sala ande si mo hinga na bê kue so mo lingbi ti fa atënë so ayeke na yâ ti li ti mo na lege ti atënë ti yanga ti mo. Na salango tongaso, li ti mo ayeke bata atënë so mo lingbi ti dabe ti mo hio na ni na ngoi so mo yeke mû diskur ti mo. Sala ni mo bâ mo tene tâ diskur wala devoir la mo yeke sala. Bâ azo ni na yâ ti li ti mo. Duti na tele ti mbeni table wala luti, gi tongana ti so mo yeke sala ande na devoir ti mo.

Sambela Jéhovah ti mû na mo maboko. Lo yeke kiri ande tënë na mara ti sambela tongaso? “E zia bê ti e na Lo tënë ti ye so: tongana e hunda ye na lege ti ye so Lo ye, Lo mä e.” (1 Jean 5:14). Tongana mo ye ti gonda Nzapa nga ti mû maboko na azo ti wara ye ti nzoni na yâ Tënë ti lo, lo yeke kiri ande biani tënë na sambela ti mo. Mara hingango ye na bê tongaso alingbi ti sala ye mingi ti kpengba mo ti sala devoir ti mo. Na ndo ni, na ngoi so mo yeke gi ti wara aye so yingo apusu mo ti wara (ndoye, ngia, siriri, salango ye na ngangu pëpe nga na ngangu ti kanga nzara ti tele), mo yeke wara ande bibe so a hunda ti hon ndo ti aye na dutingo kpô na yâ salango tënë ti mo.​—aGal. 5:22, 23.

Gi ti wara kode. Tongana mo yeke fa tënë mingi, mo yeke gi bê ti mo ande mingi pëpe. Tongana mo yeke kiri tënë mingi na abungbi ti kongregation, a yeke duti ande ngangu mingi pëpe na mo ti sala tënë na lê ti azo. Na ngoi so wungo ti adevoir ti mo na yâ ti kongregation ayeke gue na li ni, gingo bê ti mo kozo ti mû diskur oko oko ayeke kiri ande peut-être na peko. Mo ye ti wara alege mingi ti sala tënë? Tongaso, mû tele ti mo ti sala devoir na ekole na place ti azo so alingbi ti sala devoir ti ala pëpe.

Na pekoni so mo sala aye so kue a fa na yâ aparagraphe so ahon, mo yeke bâ ande so a yeke nzoni ti bâ aye so afa biani so mo fa lege na tele ti mo. Bâ aye so nzoni. Tongana mo manda tongana nyen ti hon ndo ni, ye so ayeke mû ande maboko na mo ti sala tënë na dutingo kpô. Ambeni mbage ti tele ti mo wala totongo ti go ti mo alingbi ti fa ni.

Aye so ambage ti tele ti mo afa ni. Tele ti mo nga na lege so mo yeke sala kusala na amaboko ti mo ayeke fa so mo duti kpô na yâ salango tënë ti mo wala pëpe. Zia e bâ kozoni kue amaboko. Aye kue so afa atene zo ayeke duti kpô pëpe na yâ salango tënë ti lo ayeke so: zo ni azia amaboko ti lo na peko ti lo, lo zia ni ngangu na tele ti lo wala lo gbu pupitre ngangu na ni; lo yôro lakue amaboko ti lo na yâ bozo ti bongo ti lo na lo sigigi na ni, lo kanga bouton ti kazaka ti lo na lo zi ni, lo ndu ngbangba ti lo, hôn ti lo na lunette ti lo senge senge; lo yeke sala ngia na montre, na crayon, na bague wala na ambeti so lo sû ye dä; lo to nda ti sala maboko me lo hunzi kue pëpe.

A yeke hinga zo so ayeke na kite na ndo lo mveni na lege ti aye so nga: lo yeke kpaka lakue gere ti lo na sese, lo luti na ndo ti mbeni mbage ti gere ti lo na lo gue hio na mbeni nde, yâ ti lutingo ti lo awoko pëpe wala ahon ndo ni, lo yeke su yanga ti lo lakue, lo yeke mene ngu ti yanga ti lo fani mingi na lo yeke hu na loro mingi.

Tongana zo asala ngangu biani, lo lingbi ti hon ndo ti aye so. Sala kusala na ndo ye oko oko. Gi ti hinga kpale ni, na bâ kozoni ye so a lingbi mo sala ti kanga lege na ni. Tongana mo sala ngangu tongaso, tele ti mo ayeke fa ande so mo yeke duti kpô na yâ salango tënë ti mo.

Aye so totongo ti go afa. Go so atoto na nduzu mingi, na lege ni pëpe wala ayeke dö dongo ayeke fa polele so zo ayeke gi bê ti lo. Peut-être zo ni ayeke sala go ti lo fani mingi wala lo yeke sala tënë na loro mingi. Tongana zo asala ngangu biani, lo lingbi ti hon ndo ti akpale nga na asioni kode so ti fa lege na totongo ti go ti lo.

Tongana bê ti mo ayeke gi mo, luti kete ti hu pupu ngangu kozo ti gue na ndo ti estrade. Sala ngangu ti yapu yâ ti tele ti mo kue. Ahon ti zia li ti mo kue na ndo bê ti mo so ayeke gi mo gingo, zia ni na ndo ngbanga ti nyen mo ye ti fa na azo so ayeke mä mo aye so mo leke awe. Kozo ti to nda ti sala tënë, mû ngoi kete ti bâ azo ni, bâ mbeni zo so ayeke bâ mo na nzoni lê na he ngia kete. Sala tënë yeke na tongo nda ni, nga na pekoni bi tele ti mo na yâ diskur ti mo.

Ye so a lingbi mo ku. Ku pëpe ti tene bê ti mo ahunzi ti fâ biaku. Bê ti mingi ti awamungo diskur so aninga na mungo diskur ayeke fâ kozoni si ala luti na gbele azo. Ye oko, ala manda awe ti hon ndo ni. Mbeni oko atene: “Mbito angbâ lakue na yâ ti mbi, me fadeso mbi hinga ti pete ndo ni.”

Tongana mo sala ngangu na bê ti mo kue ti tomba aye so afa na gigi so bê ti mo ayeke fâ, azo ni ayeke bâ mo ande tongana mbeni wamungo diskur so ayeke duti kpô na yâ salango tënë ti lo. Bê ti mo alingbi ti ngbâ ti gi mo lakue, me ala yeke hinga ni pëpe.

Dabe mo so yorö na yâ ti tele ti e so asala si mênë ti e ayeke tambela na loro mingi ayeke ga nga na gbâ ti ngangu. Mû ni ti sala tënë na bê ti mo kue.

A hunda na mo pëpe ti ku juska mo gue na ndo ti estrade si mo tara peko ti aye so. Manda ti duti kpô na yâ ti salango tënë ti mo na ti sala tënë alingbi na atënë ti bê ti mo na yâ gigi ti mo ti lâ oko oko. Ye so ayeke gue ande na mo biani ti sala mbito pëpe na ndo estrade nga na fango tënë, ndo so ye so ayeke kota dä mingi.