Nzoni kode ti yôro aversê na yâ ti atënë

MBETI ti Nzapa la ayeke na gunda ti ye so a yeke fa na abungbi ti kongregation. Aversê ayeke nga akota ye na yâ ye so e yeke tene na fango tënë. Ye oko, ti tene aversê so asala ngangu mingi na ndo lisoro ti e, ye ni aluti mingi na ndo lege so e yeke yôro ala nzoni na yâ ti atënë ti e.

A hunda ye mingi ahon gi ti fa mbeni versê na ti tisa mbeni zo ti diko ni legeoko na mo. Tongana mo yeke yôro mbeni versê na yâ atënë ti mo, sala kue ti si na aye use: (1) Zingo nzara ti zo ni na (2) gboto lê na ndo nda ni so mo sala kusala na ni. Mo lingbi ti mû alege nde nde ti si na aye so.

Hunda mbeni tënë. Ye so ayeke lë lengo mingi tongana kiringo tënë ni ayeke polele pëpe na lê ti azo so ayeke mä mo. Sala ngangu ti leke hundango tënë ti mo na mbeni lege so asala si azo ni agbu li ti ala. Jésus asala lani ye so. Tongana aFarizien aga ndulu na lo na yâ ti temple nga na lê ti azo ala tara hingango ye ti lo na ndo Mbeti ti Nzapa, Jésus ahunda ala, lo tene: “Bê ti i atene nyen tënë ti Christ? Lo yeke Molenge ti zo nyen?” Ala tene: “Molenge ti David.” Jésus akiri ahunda, lo tene: “Tongaso, na lege ti Yingo, David adi iri ti Lo Seigneur tongana nyen?” Na lo to nda ti fa peko ti atënë ti Psaume 110:1. Yanga ti aFarizien akanga. Me azo mingi mingi so ayeke dä amä Jésus na ngia na bê.​—Mat. 22:41-46.

Na fango tënë mo lingbi ti to nda ti atënë ti mo na hundango atënë tongaso: “Mbi na mo e yeke na iri ti e mveni. Nzapa ayeke na ti lo nga? E lingbi ti wara kiringo tënë ni na Genèse 22:14.” “Mbeni ngorogbia oko ayeke duti ande dä mbeni lâ teti azo kue? Bâ tongana nyen a kiri tënë na hundango tënë so na Daniel 2:44.” “Bible asala biani tënë ti aye so e yeke duti na yâ ni laso? Haka ye so a tene na 2 Timothée 3:1-5 na aye so mo hinga ni nzoni.” “Pasi na kuâ ayeke hunzi ande mbeni lâ? E lingbi ti wara kiringo tënë ti Bible na Apocalypse 21:4, 5.”

Na yâ ti mbeni diskur, salango kusala na kode na ahundango tënë ti yôro aversê na yâ ni alingbi ti pusu azo so ayeke mä ni ti bâ aversê ni na mbeni lê nde, même aversê so ala hinga ni nzoni. Me ala yeke sala ande tongaso? Ye ni aluti mingi na ndo wala atënë so mo yeke hunda agbu bê ti ala biani wala pëpe. Atâa tongana tënë so mo yeke sala lisoro na ndo ni anzere na azo, li ti ala alingbi ti gue na mbeni ndo nde na ngoi so mo yeke diko aversê so ala mä ni fani mingi awe. Ti tene ye tongaso asi pëpe, a lingbi mo gbu li ngangu na ndo tënë so mo yeke hunda ande ti tene a nzere na ala.

Fa mbeni kpale. Mo lingbi ti fa mbeni kpale nga na pekoni mo gboto lê na ndo mbeni versê so amû lege ti wara yorö ni. Sala pëpe si azo ni aku ye mingi ahon ti so ala lingbi ti wara. Mingi ni, mbeni versê ayeke fa gi mbeni mbage ti yorö ni. Ye oko, mo lingbi ti hunda na azo ni ti bâ, na ngoi so mo yeke diko versê ni, wango wa a mû ti sala ye na gbele kpale ni.

Na oko lege tongaso, mo lingbi ti fa mbeni kpengba-ndia ti nzoni tambela, na mo sala kusala na mbeni mbaï ti Bible ti fa ndara ti mungo pekoni. Tongana na yâ ti mbeni versê a wara ambeni mbilimbili tënë use (wala ahon so), so andu ye so a yeke sala tënë na ndo ni, ambeni wamungo diskur ayeke hunda na azo so ayeke mä ala ti gi ni. Tongana mbeni kpale ayeke ngangu mingi na lê ti ambeni zo, mo lingbi ti pusu ala ti gbu li ti ala na fango na ala alege nde nde so a lingbi ti leke na ni. Na pekoni zia si versê nga tënë so mo fa ti sala ye alingbi na ni amû kiringo tënë ni.

Fa Bible tongana ye so ayeke na ndangba tënë. Tongana mo zingo nzara ti azo awe teti tënë ti mo na mo fa mbeni bango ndo ti zo oko wala use na ndo mbeni mbage ti tënë ni, mo lingbi ti yôro mbeni versê na yâ ni na tenengo: “Bâ ye so Tënë ti Nzapa atene na ndo ye so.” Ye so afa ngbanga ti nyen versê so mo ye ti diko ayeke na ndangba tënë ni.

Jéhovah asala kusala na akoli tongana Jean, Luc, Paul na Pierre ti sû ambeni mbage ti Bible. Me ala yeke gi azo so asû ni; Jéhovah si ayeke Mveni ni. Mbilimbili tongana mo yeke sala tënë na azo so ayeke manda Mbeti ti Nzapa pëpe, ti yôro mbeni versê na yâ tënë ti mo na tenengo “Pierre asû na mbeti” wala “Paul atene” alingbi pëpe ti duti na oko ngangu tongana mo tene so versê ni ayeke tënë ti Nzapa. A yeke nzoni ti bâ so na yâ ti ambeni ye, Jéhovah amû yanga na Jérémie ti to nda ti atënë ti lo na tenengo: “Mä tënë ti [Jéhovah, NW ].” (Jér. 7:2; 17:20; 19:3; 22:2). Atâa e sala kusala na iri ti Jéhovah na fango aversê wala pëpe, kozo ti tene e hunzi tënë ti e, a lingbi e sala kue ti fa so ye so ayeke na yâ ti Bible ayeke tënë ti lo.

Bâ aye so angoro versê ni. A lingbi mo hinga ye so angoro versê ni tongana mo yeke bâ tongana nyen ti yôro ni na yâ ti atënë ti mo. Na yâ ti ambeni ye, mo yeke fa ande tâ gi ye so angoro ni; me ye so alingbi ti sala ngangu na ndo ye so mo yeke tene na mbeni lege nde. Na tapande, mo yeke mû gi a-oko tënë ti yôro na atënë ti Job so akpe mbito ti Nzapa gi tongana ti so mo yeke sala teti atënë ti mbeni oko ti awamungo wango ti lo ti wataka? Luc la asala buku ti Kusala. Me lo fa peko ti atënë ti azo mingi, tongana Jacques, Pierre, Paul, Philippe, Etienne na a-ange. Lo fa nga peko ti atënë ti Gamaliel na ambeni Juif nde so ayeke aChrétien pëpe. Mo yeke tene ande zo wa la asala tënë so mo yeke fa pekoni? Na tapande, dabe mo so David gi lo oko si asû apsaume kue pëpe, nga Salomon asû lo oko pëpe buku ti aProverbe. A yeke nga nzoni ti hinga azo wa si zo so asû mbeti ti Bible ni ayeke sala tënë na ala, nga tënë wa lo yeke sala tënë na ndo ni.

Mû asango so afa ye so asi na ngoi ni kâ. Ye so ayeke lë lengo mbilimbili tongana mo lingbi ti fa so aye so asi na ngoi ti ye so Bible asala tënë ni ayeke legeoko na aye so mo yeke sala tënë na ndo ni. Na yâ ti ambeni ye nde, a hunda ti mû asango na ndo aye so asi na ngoi ni kâ ti gbu nda ti mbeni versê. Na tapande, tongana mo ye ti sala kusala na aHébreu 9:12, 24 na yâ ti mbeni devoir na ndo sandaga ti Jésus so azi zo, mo lingbi ti bâ so, kozo ti diko versê so, a lingbi mo fa kete tënë na ndo kubu so ayeke tâ na yâ ti tabernacle. Versê ni atene kubu so aduti fä ti ndo so Jésus alï dä tongana lo gue na yayu. Me yôro na yâ ni pëpe anzene nzene tënë mingi si a kanga ndo ti versê so mo yeke diko.

Ti maï lege so mo yeke yôro na aversê, bâ ye so awamungo diskur ti kode ayeke sala. Bâ akode nde nde so ala yeke sala na kusala. Gi nda ti nzoni ti akode so. Na lekengo adevoir ti mo mveni, gi ti hinga akota versê ni, na gbu li mbilimbili na ndo ye so a lingbi versê oko oko asala. Leke pendere mingi tongana nyen mo yeke yôro ande versê oko oko na yâ tënë ti mo si mo sala kusala na ala nzoni mingi. Na pekoni, sala tongaso na ambeni versê kue so mo yeke sala na kua. Na maïngo kode so ti fango ye ti mo, mo yeke gboto lê ti azo mingi ahon ti kozo na ndo Tënë ti Nzapa.