Ti sara ye tongana ti Jésus, duti...
ZO SO AYEKE BÂ MAWA TI ZO
Teti so lo yeke na siokpari na tere ti lo ape, Jésus ayeke pëpe na oko vundu nga na agingo bê so atanga ti azo kue ayeke na ni. Atâa so kue, lo fa lani so lo yeke bâ mawa ti azo. Lo yeke gi lani ti sara ye kue so lo peut ti sara ndali ti ala, na sarango même aye mingi ahon ti so a hunda. Biani, bibe ti bango mawa ti zo la apusu lo ti mû maboko na azo. Bâ ambeni tapande ni na yâ ti aChapitre 32, 37, 57, 99.
ZO SO AZO APEUT TI GA NDURU NA LO
Azo kue lani, atâa a yeke amaseka wala akangba, abâ so ala peut ti ga nduru na Jésus, ngbanga ti so lê ti Jésus akpa pëpe ti mbeni zo so ayeke na gbâ ti aye ti sarango ni wala ti mbeni zo so abâ tere ti lo kota. Tere ti azo anzere lani ti duti na tere ti Jésus, ndali ti so ala bâ so lo yeke pensé na ala. Tongana mo ye ti hinga ye mingi na ndo ni, bâ aChapitre 25, 27, 95.
ZO SO AYEKE SAMBELA MINGI
Lani, Jésus ayeke sambela lakue Babâ ti lo na bê ti lo kue, atâa lo sara ni lo oko wala lo sara ni legeoko na atâ wakua ti Nzapa. Lo sambela na angoi nde nde, gi na tere ti kobe ape. Lo sambela ti kiri singila na Babâ ti lo, ti mû gonda na lo nga ti hunda fango lege ti lo na ngoi so lo ye ti mû ambeni kota desizion. Bâ aChapitre 24, 34, 91, 122, 123.
ZO SO AYEKE GI GI NZONI TI LO WANI APE
Na ambeni ngoi lani, atâa so a yeke duti fade nzoni mingi na lo ti wu tere kete, Jésus ayeke gi lakue ti pensé na azo kozo. Lo gi pëpe ti pensé gi na lo wani kozo. Na sarango tongaso, lo zia na e mbeni tapande so e peut ti mû tâ gi peko ni. Bâ tongana nyen la lo fa mara ti sarango ye ni so na yâ ti aChapitre 19, 41, 52.
ZO SO AYEKE PARDONNÉ MBA TI LO
Jésus afa gi pëpe na azo so a lingbi ala pardonné amba ti ala, me lo nga lo sara ni na mbage ti adisciple ti lo nga na mbage ti ambeni zo nde. Gbu li na ndo ti atapande so ayeke na yâ ti aChapitre 26, 40, 64, 85, 131.
ZO SO AYEKE SARA YE NA BÊ TI LO KUE
A tene lani kozo awe so mingi ti aJuif ayeke ke ande Messie ni, nga so na pekoni awato ti lo ayeke fâ ande lo. Tongaso, tongana Jésus aye lani, lo peut fade ti sara ye mingi ndali ti azo ape. Nde na so, lo sara kue ti fa tâ lege ti vorongo Nzapa na azo na bê ti lo kue. Lo zia mbeni nzoni tapande na adisciple ti lo kue, so azo ayeke sara sanka ti mä ala wala so ayeke tingbi même na akangango lege. Bâ aChapitre 16, 72, 103.
ZO SO AHINGA TI SARA TERE KETE
Jésus ayeke na ndara nga lo hinga ye ahon azo ti sese kue. So lo yeke na siokpari na tere ti lo ape asara si lo yeke na ngangu nga lo hinga ye ahon azo kue so ayeke lani na ngoi ti lo. Me atâa so kue, lo sara tere ti lo kete na lo sara kua na azo. Mo lingbi ti manda ambeni ye na ndo ti sarango ye ti tere ti Jésus so na yâ ti aChapitre 10, 62, 66, 94, 116.
ZO SO AHINGA TI KANGA BÊ
Jésus ayeke kanga bê lani na mbage ti abazengele ti lo nga na mbage ti ambeni zo na ngoi so ala sara pëpe ye tongana ti lo wala ala sara pëpe ye so lo tene na ala ti sara. Lo fa so lo kanga bê ti lo na lege so lo yeke kiri na ndo ti ambeni fango ye so lo fa lani kozo awe, ti mû lege na azo ni ti ga nduru na Jéhovah. Gbu li na ndo ti tapande ti kangango bê so Jésus afa ni na yâ ti aChapitre 74, 98, 118, 135.