Ala kiri na “berger nga zo ti bango ndo na ndo ti âme ti ala”

HINGA na bê ti mo kue so Jéhovah ayeke mû maboko na mo tongana mo kiri na lo. Lo yeke mû maboko na mo ti hon ndo ti agingo bê, lo yeke sara si bê ti mo adë nga mo yeke wara siriri ti bê so zo ayeke wara tongana bê ti lo afâ ngbanga na ndo ti lo ape. Na pekoni bê ti mo ayeke pusu mo ti kiri ti voro Jéhovah legeoko na awakua ti lo. Mo yeke ga tongana ambeni kozo Chrétien so bazengele Pierre atene na ala, lo tene: “Ala yeke tongana angasangbaga so agirisa lege awe; me fadeso ala kiri na mbage ti lo so ayeke berger nga zo ti bango ndo na ndo ti âme ti ala.”—1 Pierre 2:25.

Ti kiri na Jéhovah ayeke tâ nzoni ye so mo lingbi ti sara. Ngbanga ti nyen? Mo yeke zia ngia na bê ti Jéhovah (aProverbe 27:11). Tongana ti so mo hinga, lo yeke na bê, asarango ye ti e alingbi ti zia ngia wala vundu na bê ti lo. Biani, Jéhovah aforcé e ti ye lo wala ti voro lo ape (Deutéronome 30:19, 20). Mbeni wandara ti Bible atene: “Bê ti zo ayeke pëpe tongana mbeni yanga-da so maboko ni ayeke na gigi. Me a yeke mbeni ye so a lingbi a zi ni gi na mbage ti yâ ni.” Tongana ndoye la apusu e ti voro Jéhovah, a yeke mo bâ mo tene e zi yanga-da ni la. Tongana e sara tongaso, e yeke zia ngia mingi na bê ti lo. Biani, tongana e voro Jéhovah tongana ti so lo ye, mbeni ye so alingbi ti mû na e ngia ahon ni ayeke dä ape.—Kusala 20:35; Apocalypse 4:11.

Na ndo ni, tongana mo kiri mo komanse ti voro Jéhovah, mo yeke wara aye so mo yeke na bezoin ni na lege ti yingo (Matthieu 5:3). Tongana nyen? Azo na yâ ti dunia ayeke hunda tere ti ala, a tene: ‘Ngbanga ti nyen e yeke na ndo ti sese?’ Ala ye mingi ti hinga ngbanga ti nyen la e yeke na fini. Azo ayeke na bezoin ti hinga ni senge ape, a yeke Jéhovah la acréé ala na bezoin ni so. Lo créé e ti tene e wara ngia na vorongo lo. Tongana ndoye la apusu e ti voro Jéhovah, mbeni ye ti mû ngia na e ahon ni ayeke dä ape.—Psaume 63:2-6.

Hinga so Jéhovah aye ti tene mo kiri na lo. Nyen la afa ni? Gbu li ti mo kete: Aita so asara brochure so asambela mingi kozo ti sara ni. Peut-être mbeni ancien wala mbeni mba ti mo Chrétien la asara tënë ti brochure ni na mo. Na pekoni, mo diko ni nga mo sara ye alingbi na atënë ti yâ ni. Aye so kue afa so Jéhovah agirisa mo ape. Me, na nzoni bê lo yeke kiri na mo na mbage ti lo.—Jean 6:44.

Tongana e hinga so Jéhovah ayeke girisa lâ oko ape awakua ti lo so ahon yongoro na lo, a yeke kpengba e. A yeke ye so asi na mbeni ita-wali so iri ti lo ayeke Donna. Lo tene: “Yeke yeke mbi hon yongoro na tâ tënë, me fani mingi mbi yeke gbu li na ndo ti Psaume 139:23, 24, so atene: ‘O Nzapa, tara mbi ti hinga bê ti mbi! Tara mbi ti hinga bibe ti mbi! Bâ tongana sioye ayeke na yâ mbi, na Mo fa lege ti lakue lakue na mbi.’ Mbi hinga lani so place ti mbi ayeke na yâ ti dunia so ape, sarango ye ti azo ni ayeke nde mingi, me mbi hinga so place ti mbi ayeke na yâ ti bungbi ti Jéhovah. Mbi ga ti bâ so Jéhovah azia mbi lâ oko ape, mbi yeke lani gi na bezoin ti kiri na mbage ti lo. Tere ti mbi anzere mingi so mbi kiri na mbage ti lo so.”

E sambela na bê ti e kue ti tene mo kue mo kiri mo wara “ngia ti [Jéhovah]”. (Néhémie 8:10). Tongana mo kiri na Jéhovah, mo yeke regretté lâ oko ape.