Nzapa asara kozo koli na kozo wali

Jéhovah aleke yaka na yâ ti mbeni ndo so a iri ni Éden. A yeke wara gbâ ti afleur, akeke nga na anyama na yâ ti yaka ni. Na pekoni Nzapa asara kozo koli, Adam, na fuku ti sese nga lo wu pupu na dû ti hôn ti lo. Mo hinga ye so asi na pekoni? Koli ni aga zo so ayeke na fini. Jéhovah azia Adam ti bâ ndo na ndö ti yaka ti Éden, nga lo tene na lo ti zia iri na ndö ti anyama kue.

Jéhovah amû na Adam mbeni kota komandema. Lo tene na Adam: ‘Mo lingbi ti te lê ti akeke kue, me lê ti mbeni keke ni oko mo te ape. Tongana mo te lê ti keke ni so, mo yeke kui.’

Kete na pekoni, Jéhovah atene: ‘Mbi yeke sara mbeni zo ti mû maboko na Adam.’ Nzapa asara si Adam atï na kota lango, na pekoni lo mû bio ti kate ti Adam lo leke na mbeni wali ndali ti Adam. Iri ti wali ni ayeke Ève. Adam na Ève aga kozo sewa. Bango ndo ti Adam ayeke lani tongana nyen na ndö ti wali so a mû na lo fini fini so? Terê ti Adam anzere, tongaso lo tene: ‘Bâ pendere zo so Jéhovah amû bio ti mbi si asara na lo! Lo yeke zo tongana mbi-ein!’

Jéhovah atene na Adam na Ève ti dü amolenge nga ti ga gbani na ndö ti sese. Lo ye si ala duti na ngia ti sara kua legeoko ti sara si sese kue aga paradis wala pendere parc, gï tongana ti yaka ti Éden. Me, aye ni apassé pëpe tongana ti so lo ye. Ngbanga ti nyen? E yeke manda ande aye mingi na ndö ni na yâ ti chapitre ti peko.