Fini akomanse lani tongana nyen?

‘Nzapa la amû fini na aye kue.’ (Psaume 36:9). Mo yeda na tënë so? Ambeni zo atene so fini abâ gigi gï tongaso, a créé aye crééngo ape. Tongana a yeke tongaso, andâ e bâ gigi gï gbagburu tongaso. Me tongana Jéhovah la acréé fini, biani mbeni raison la apusu lo ti créé ni.a Bâ ye so Bible atene na ndö ti komansema ti fini nga ndani so tënë so Bible atene ayeke na lege ni.

1. Dunia akomanse lani tongana nyen?

Bible atene: “Na tongo nda ni Nzapa asara yayu na sese.” (Genèse 1:1). Mingi ti awandara ayeda so dunia ayeke na mbeni komansema. Nzapa acréé ni tongana nyen? Lo sara kua na “ngangu” ti lo, so ti tene yingo vulu ti lo, ti sara aye kue na yâ ti dunia, so na popo ni mo yeke wara atongoro nga na aplanète.​—Genèse 1:2.

2. Nzapa acréé sese ngbanga ti nyen?

Jéhovah ‘aleke sese ni ti tene angbâ gï senge pëpe, me lo leke ni ti tene azo aduti dä.’ (Ésaïe 45:​18). Lo leke sese ti duti mbeni nzoni ndo ti tene azo aduti dä lakue lakue. (Diko Ésaïe 40:​28; 42:5.) Awandara atene so sese ayeke tâ nde mingi na tanga ti aplanète. Gï sese la ayeke na aye kue so amû lege na azo ti duti na fini dä.

3. Nyen la asara si azo ayeke nde na anyama?

Na peko ti so Jéhovah acréé sese, lo créé fini na ndö ni. Kozoni, lo sara si sese asi singo na akeke, afleur, apere, akugbe ti kasa nga na anyama. Na pekoni, “Nzapa asara zo na image ti lo”. (Diko Genèse 1:​27.) Nyen la asara si azo ayeke nde? So Nzapa asara e na image ti lo, e lingbi ti duti na asarango ye ti lo, na tapande ndoye nga na mbilimbili. Lo sara nga e na ngangu ti manda ayanga ti kodro, ti hinga pendere ti aye so e bâ nga ti ye mozoko. Nga nde na anyama, e lingbi ti voro Lo so asara e.

GI TI HINGA AYE MINGI

Bâ aye so afa so a créé fini crééngo nga so tënë so Bible atene na ndö ti création ayeke na lege ni. Gi ti hinga aye so asarango ye so azo ayeke na ni afa na e na ndö ti Nzapa.

4. A créé fini crééngo

A yeke gonda ka azo so abâ mbeni ye na yâ ti dunia na ala sara mara ni. Me zo wa la a doit ti gonda lo ndali ti aye so ayeke na yâ ti dunia? Zia VIDÉO ni, na pekoni kiri tënë na hunda so:

VIDÉO: Mango na bê na Nzapa (2:43)

• Aye wa la azo ti lekengo aye abâ na yâ ti dunia si ala sara mara ni?

Da oko oko kue, mbeni zo la asara plan ni nga aleke ni. Me zo wa la asara plan ti aye kue so ayeke na yâ ti dunia na aleke ni? Diko aHébreu 3:4, na pekoni kiri tënë na ahunda so:

• Aye wa la na yâ ti dunia apika bê ti mo?

• Eskê a yeke na lege ni ti yeda so a créé dunia nga na aye kue so ayeke na yâ ni crééngo? Ngbanga ti nyen?

Mo hinga?

Ti wara a-article nga na avidéo na ndö ti tënë so, gue na ndö ti site jw.org na molongo ti a-article “Eskê mbeni zo la asara ni?” nga na “Bango ndo ti azo na ndö ti lege so fini abâ gigi.”

“Biani, da oko oko kue, mbeni zo la asara ni, me zo so asara aye kue ayeke Nzapa”

5. A yeke na lege ni ti yeda so a créé aye crééngo, tongana ti so Bible afa

VIDÉO: Eskê a créé dunia crééngo?​—Mbage ni (3:51)

• Eskê Bible afa so a créé sese nga na aye so ayeke na fini na ndö ni na yâ ti lango omene so lango oko aninga ngbonga 24?

• Eskê mo pensé so tënë so Bible atene na ndö ti création ayeke na lege ni? Mo tene tongaso ngbanga ti nyen?

Diko Genèse 1:​1, na pekoni kiri tënë na hunda so:

• Awandara atene so dunia ayeke na komansema. Tongana nyen la atënë so ala tene ague oko na versê so?

Ambeni zo ayeke hunda terê ti ala wala Nzapa acréé fini na lege ti évolution? Diko Genèse 1:​21, 25, 27, na pekoni kiri tënë na ahunda so:

• Eskê Bible afa so Nzapa amû fini na mbeni kete créature na pekoni lo zia si achangé aga susu, aga anyama so ayeke dü molenge nga na pekoni aga azo? Wala lo créé aye kue so ayeke na fini na lege ti “mara” ti ala?b

6. Azo ayeke nde na tanga ti aye kue so Nzapa acréé

E yeke nde na anyama so Jéhovah acréé. Diko Genèse 1:​26, na pekoni kiri tënë na hunda so:

• So Nzapa asara e na image ti lo na e yeke na ngangu ti sara ye na ndoye nga ti bâ mawa ti zo, a fa na e nyen na ndö ti asarango ye ti Nzapa?

NA NDURU TËNË

Jéhovah la acréé dunia nga na aye kue so ayeke na fini.

Dango bê

• Bible afa nyen na ndö ti tongo nda ti dunia?

• Eskê Nzapa amû fini na mbeni kete créature na pekoni la achangé aga mara ti aye nde nde so ayeke na fini wala lo créé aye kue crééngo?

• Nyen la asara si azo ayeke nde?

GI NDA TI YE

Bâ ambeni ye na yâ ti dunia so afa so Lo so acréé aye kue ayeke dä.

“Aye so ayeke na yâ ti dunia afa nyen?” (Zingo na lango!, septembre 2006)

Bâ tongana nyen la mbeni babâ ayeke fa nda ti tënë so Bible atene na ndö ti création na molenge ti lo ti koli.

‘Jéhovah la asara aye kue’ (2:37)

Bâ wala tënë ti évolution ague oko na tënë ti Bible.

“Eskê Nzapa asara kua na évolution ti créé mara ti aye nde nde kue so ayeke na fini?” (Article na ndö ti site)

Bâ wala angbene bio so a wara nga na aye so awandara ahinga afa so a créé fini crééngo wala abâ gigi gï tongaso.

Ahunda oku ti gbu li dä na ndö ti lege so fini abâ gigi (brochure)