YE TI MANDA 37
Ye so Bible atene na ndö ti kua nga na nginza
A si na mo awe ti gi bê ti mo ahon ndö ni na ndö ti kua nga na nginza? A peut ti duti ngangu na e ti bâ lege ti abezoin ti e nga ti voro Jéhovah tongana ti so lo lingbi na ni. Bible amû na e anzoni wango so apeut ti aidé e.
1. Bible atene nyen na ndö ti kua?
Nzapa aye ti tene e bâ nzoni na peko ti kua ti e. Bible atene: ‘Tongana zo . . . abâ nzoni na peko ti angangu kua ti lo, mbeni ye ti nzoni ti hon ni ayeke dä pëpe.’ (Zo-ti-fa-tene 2:24). Jéhovah ayeke sara kua ngangu. Tongana e sara kua ngangu tongana lo, e yeke zia ngia na bê ti lo na e yeke duti na ngia.
Kua ayeke kota ye. Me e doit lâ oko ape ti zia si a ga kota mingi ahon vorongo Jéhovah (Jean 6:27). Lo tene so tongana e zia lo na kozo ndo, lo yeke bâ lege ti abezoin ti e.
2. Nzoni bango ndo na ndö ti nginza ayeke so wa?
Atâa so Bible atene so “nginza ayeke bata zo”, a tene nga so gï nginza apeut ti sara si e duti na ngia ape (Zo-ti-fa-tene 7:12). Tongaso, a wa e ti ndoye nginza ape me ti “zia bê ti [e] gï na ndö ti aye so [e] yeke na ni.” (Diko aHébreu 13:5.) Tongana e ngbâ ti zia bê ti e na ndö ti aye so e yeke na ni, bê ti e ayeke son ape ndali ti so e pensé so ye kue so e wara alingbi na e ape. E yeke sara bon senge senge ape (aProverbe 22:7). E yeke wara nga pëpe akpale ti peko ti sarango ngia ti nginza nga azo so atene e peut ti wara nginza hio sân ti sara effort mingi ayeke handa e ape.
3. Tongana nyen la e peut ti sara kua na nginza gï ndali ti nzoni ti e wani ape?
Jéhovah ayeke Nzapa so amû ye mingi na azo, e yeke sara ye tongana lo tongana ‘maboko ti e awoko, e duti nduru ti kangbi ye na zo’. (1 Timothée 6:18). E peut ti sara kua na nginza ti e gï ndali ti nzoni ti e wani ape tongana e mû maboko na congrégation nga na azo so ayeke na yâ ti bezoin, mbilimbili amba ti e awakua ti Jéhovah. Ye so agbu bê ti Jéhovah mingi ayeke pëpe wungo ti nginza so e mû, me ye so apusu e ti mû ni. Tongana bê ti e apusu e ti mû ye mingi na azo, e yeke duti na ngia nga e yeke zia ngia na bê ti Jéhovah.—Diko Kusala 20:35.
GI TI HINGA AYE MINGI
Bâ anzoni ye so zo ayeke wara tongana lo duti na nzoni bango ndo na ndö ti kua nga lo zia bê ti lo gï na aye so lo yeke na ni.
4. Mû gloire na Jéhovah na lege ti fason so mo yeke sara na kua
Songo ti e ti kamarade na Jéhovah adoit ti sara ngangu na ndö ti bango ndo ti e na ndö ti kua. Zia VIDÉO ni, na pekoni kiri tënë na ahunda so:
Na yâ ti vidéo ni, nyen la apika bê ti mo na ndö ti bango ndo ti Jason nga na sarango ye ti lo na place ti kua?
Nyen la lo sara ti duti na nzoni bango ndo na ndö ti kua?
Diko aColossien 3:23, 24, na pekoni kiri tënë na hunda so:
Ngbanga ti nyen la bango ndo ti e na ndö ti kua ayeke kota ye?
Kua ayeke kota ye. Me e doit lâ oko ape ti zia si a ga kota mingi ahon vorongo Jéhovah
5. Ti zia bê gï na ndö ti aye so e yeke na ni ayeke ga na e anzoni ye
Azo mingi agi ti sara ye kue so ala peut ti sara ti wara nginza mingi. Me Bible awa e ti sara tongaso ape. Diko 1 Timothée 6:6-8, na pekoni kiri tënë na hunda so:
Nyen la Bible awa e ti sara?
Même tongana e yeke na ye gï kete, e lingbi ti duti na ngia. Zia VIDÉO ni, na pekoni kiri tënë na hunda so:
Atâa so asewa so ayeke na nginza mingi ape, nyen la asara si ala duti na ngia?
Me ka tongana e yeke na aye mingi me alingbi na e ape? Na yâ ti mbeni toli, Jésus afa so bango ndo so alingbi ti ga na kpale. Diko Luc 12:15-21, na pekoni kiri tënë na hunda so:
Nyen la toli ti Jésus so afa na mo?—Bâ versê 15.
Diko aProverbe 10:22 nga na 1 Timothée 6:10, na haka atënë ni. Na pekoni kiri tënë na ahunda so:
Ti mo, nyen la ayeke kota ye mingi? Ti duti na nzoni songo ti kamarade na Jéhovah wala ti wara gbâ ti nginza? Ngbanga ti nyen?
Akpale wa la zo apeut ti wara tongana lo gi lakue ti wara gbâ ti nginza?
6. Jéhovah ayeke bâ lege ti abezoin ti e
Akpale ti kua nga na ti nginza alingbi ti zia mabe ti e na yâ ti tara. Zia VIDÉO ni ti bâ ye so e peut ti sara tongana e wara akpale so, na pekoni kiri tënë na hunda so:
Na yâ ti vidéo ni, akpale wa la ita-koli ni awara?
Nyen la lo sara ti hon ndö ti akpale so?
Diko Matthieu 6:25-34, na pekoni kiri tënë na hunda so:
Nyen la Jéhovah amû zendo ti sara ndali ti azo so azia lo na kozo ndo?
AMBENI ZO ATENE: “Mbi doit ti sara kua ngangu ti mû kobe na sewa ti mbi. Mbi peut ti gue na bungbi yenga oko oko kue ape.”
Versê wa la asara si mo hinga so ti zia vorongo Jéhovah kozo ayeke lakue tâ nzoni desizion?
NA NDURU TËNË
A lingbi zo asara kua nga lo wara nginza, me zia e zia lâ oko ape si a kanga lege na e ti voro Jéhovah.
Dango bê
Nyen la apeut ti aidé mo ti ngbâ ti duti na nzoni bango ndo na ndö ti kua?
Tongana mo zia bê ti mo gï na ndö ti aye so mo yeke na ni ayeke ga na mo anzoni ye wa?
Tongana nyen la mo peut ti fa so mo yeke na confiance na zendo so Jéhovah amû ti bâ lege ti azo ti lo?
GI NDA TI YE
Bâ wala Bible atene so nginza ayeke sioni.
“Eskê gunda ti asioni ye kue alondo gï na nginza?” (Article na ndö ti site)
Gi ti hinga tongana nyen la e peut ti sara kua na nginza ti e ti zia ngia na bê ti Nzapa.
“Bible atene nyen na ndö ti mungo ye na zo?” (Article na ndö ti site)
Eskê ngia ti nginza ayeke sara sioni na zo ape?
“Bango ndo ti Bible na ndö ti ngia ti nginza” (Zingo na lango! ti mars 2015)
Bâ ye so apusu mbeni koli ti zia ti sara ngia ti nginza nga ti nzi ye.
“Mbi ye lani jeu ti mandako ti ambarata mingi” (Tour ti Ba Ndo ti lango 1 ti novembre 2011)