“Kä so Ndeko Asala”

BAZENGELE Paul aba nene ti mu ambeni wango ti sengo ndo teti aChrétien ti kozo siècle so ayeke na Galatie. Peut-être ti kanga lege si mbeni zo abata tene na bê pepe, lo hunda: “Tongaso mbi ga wato ti i teti mbi tene tene-biani [“tâ tene,” NW] na i?”​—aGalate 4:16.

Na ‘tenengo tâ tene,’ Paul aga wato ti ala pepe. Ti tene ni, lo yeke sala la ni ye alingbi na kpengba-ndia ti Bible so: “Kä so ndeko asala na mo afa na gigi lo yeke tâ ndeko.” (aProverbe 27:6) Paul ahinga so a lingbi ti sala kä na yâ bê ti mbeni zo ti baba, so aglisa lege. Ye oko, lo hinga so ti luti na popo ti mbeni wasiokpari na sengo ndo so lo yeke na bezoin ni alingbi ti kanga lege ti tene Jéhovah Nzapa afa ndoye ti lo na mbage ti wasiokpari ni. (aHébreu 12:5-7) Ni la, tongana mbeni ndeko be-ta-zo so atene ti kongregation agbu bê ti lo biani teti ngoi mingi, Paul akiri pepe na peko na ziango lege ti mu wango ti sengo ndo.

Laso, aTémoin ti Jéhovah ayeke sala ye alingbi na tokua ti ala ti “sala si azo na popo ti amara kue aga adisciple, . . . na fango na ala ti bata ye kue so [Jésus Christ] akomande.” Na salango tongaso, atâ Chrétien so ayeke bele pepe atâ tene ti Bible so afa na gigi na ake atene ti mabe ti wataka nga na asalango ye so ayeke ti Chrétien pepe. (Matthieu 15:9; 23:9; 28:19, 20, NW; 1 aCorinthien 6:9, 10) Ahon ti duti awato so azo ake ala, ala yeke fa na gigi bingo bê ti atâ ndeko.

Na lege ti ndara so alondo na Nzapa, wasungo Psaume atene: “Zia zo ti mbilimbili apika mbi, fade a ga ye ti nzoni na mbi; na zia lo zingo na mbi, fade a ga mafuta na ndo li ti mbi; zia li ti mbi ake ye so pepe.”​—Psaume 141:5.