“Nzapa Adë Ngbanga Biani na ndo Azo ti Gbi Ala a yâ Enfer?”
“I yeke manda théologie?”
Hundango tene so adö bê ti Joël na Carl. Apendere koli use so, so amu tele ti ala mveni ti sala kusala na kota ndokua ti aTémoin ti Jéhovah na Brooklyn, New York, ayeke ba yâ ti abuku na mbeni ndo ti kango abuku so ayeke ndulu na ala. Na ngoi so Joël ayeke ba molongo ti atene so atokua zo na yâ ti Bible, Carl afa na lo peko ti mbeni lisoro so lo sala na yâ fango tene. Teti so lo mä ambeni mbage ti lisoro ni, mbeni koli so aluti ndulu na ala aga hio na mbage ti ala.
Ye oko, koli ni agi bê ti lo mingi teti mbeni ye so andu lo mveni ahon gi ti hinga wala amaseka koli use so ayeke manda théologie. Lo fa nda ni: “Mbi yeke Juif, na ambeni kamarade ti mbi so ayeke aChrétien atene na mbi so a yeke gbi mbi ande na yâ enfer teti so aJuif ake Jésus. Ye so asala si bê ti mbi agi mbi mingi. Mara ti fango ngbanga tongaso, so alondo na Nzapa ti ndoye, akpa ye so ayeke mbilimbili pepe. Nzapa adë ngbanga biani na ndo azo ti gbi ala na yâ enfer?”
Joël na Carl atene na zo ti be-ti-mbilimbili so ala yeke azo so amanda Bible na bê kue. Ala fa na lo na yâ Mbeti ti Nzapa so akinda ahinga ye oko pepe na so ala lango gi na yâ kuâ na kungo ti tene a zingo ala na popo ti awakinda. Tongaso, ala ba pasi pepe na yâ enfer ti wâ. (Psaume 146:3, 4; Zo-ti-fa-tene 9:5, 10; Daniel 12:13; Jean 11:11-14, 23-26) Na nda ti lisoro ti ala ti apenze-ngbonga 45, koli ni amu adresse ti lo na Joël nga na Carl na lo hunda ti wara asango dä mingi ahon.
Tongana enfer ayeke mbeni ndo ti wâ so asala pasi na azo, fade mbeni lâ mbeni zo alingbi ti hunda ti gue dä? Ye oko, kotara Job, na bibe ti kpe kpale ti lo, ahunda: “Tongana mo honde mbi na yâ a-enfer, tongana mo honde mbi juska ngonzo ti mo ahunzi.” (Job 14:13, TOB) A yeke polele so Job amä na bê pepe so enfer ayeke mbeni ndo ti pasi. Nde na so, lo gi la ni ti bata tele ti lo dä. Kuâ ayeke dutingo so fini ayeke pepe, na enfer so Bible asala tene ni ayeke dukua so azo kue ague dä.
Tongana mo ye ti wara asango mingi na ndo ye so asi na e tongana e kui nga beku wa ayeke na pekoni, e tisa mo na wâ ti yeda na ye so a hunda ge.