Atënë so azo ahunda

Fade a yeke duti lege ti ndara teti mbeni tâ Chrétien ti gue na mbeni matanga ti mariage wala ti lungo kuâ so a sala ni na yâ mbeni église?

Ti e, ti mû mbage na asalango ye kue so andu vorongo ti wataka ayeke sioni na lê ti Jéhovah, na a lingbi e ke ni (2 aCorinthien 6:14-17; Apocalypse 18:4). Ti sala matanga ti lungo kuâ na yâ mbeni église, mingi ni a yeke hunda ti mû mbeni diskur so a maï afango ye so Mbeti ti Nzapa ake. A yeke afango ye tongana tënë ti âme so akui pëpe, nga tënë ti fini na yayu teti azo kue so ayeke nzoni. A lingbi nga ti ndu aye tongana salango signe ti croix, bungbingo oko na prêtre wala na pasteur ni ti sambela. Na ngoi ti mbeni matanga ti mariage so a yeke sala na yâ église wala mbeni ndo nde, a lingbi ti tene asambela nga ti sala ambeni kusala ti vorongo Nzapa me so ague nde na fango ye ti Bible. Tongana mbeni Chrétien aduti na popo ti ambeni zo mingi so amû mbage ti ala na vorongo ti wataka, a lingbi ti duti ngangu teti lo ti ke ti mû mbage na ni. A yeke duti ande lege ti ndara oko pëpe teti mbeni Chrétien ti yôro tele ti lo na yâ mara ti akpale tongaso!

Ye oko, mbeni Chrétien alingbi ti bâ so lege ayeke dä pëpe ti ke ti gue na mbeni matanga ti mariage wala ti lungo kuâ so a yeke sala na yâ mbeni église. Tongana a si tongaso, fade lo sala tongana nyen? Na tapande, mbeni koli so amä na bê pëpe alingbi ti hunda na wali ti lo so ayeke Chrétien ti gue legeoko na lo na ngoi ni so. Fade lege ayeke duti dä teti lo ti gue legeoko na koli ti lo me gi ti bâ ndo senge? Teti so lo yekia aye so koli ti lo ahunda, mbeni wali alingbi peut-être ti mû desizion ti duti na tele ti koli ti lo, me ti leke na bê ti lo ti mû mbage oko pëpe na amatanga kue ti vorongo. Na mbeni mbage nde, lo lingbi peut-être ti ke ti gue, teti lo bâ so ngangu so a yeke sala na ndo ti lo na ngoi ni so alingbi ti hon ngangu ti lo na ti pusu lo ti doro mbeni kpengba-ndia ti Nzapa. A yeke na wali ni ti mû desizion. A yeke ti lo ti leke na bê ti lo ye so lo ye ti sala, na batango nzoni yingo-ti-hinga.​—1 Timothée 1:19.

Atâa a yeke tongana nyen, a yeke teti nzoni ti wali ni ti tene na koli ti lo so yingo-ti-hinga ti lo ayeke mû lege na lo pëpe ti mû mbage na matanga kue ti vorongo so, wala ti he bia ti Nzapa legeoko na azo ni, wala ti ba li ti lo tongana azo ni ayeke sambela. Na mango tënë so, koli ni alingbi peut-être ti bâ so gango ti wali ti lo alingbi ti ga na kpale so ayeke nzere na lo koli ni pëpe. Lo lingbi ti soro ti gue gi lo oko teti so lo ndoye wali ti lo, lo yekia atënë ti mabe ti lo, wala teti so lo ye ti kpe mbeni ye so alingbi ti ga na kamela. Me tongana lo ye gi ti tene wali ni ague legeoko na lo, wali ni alingbi peut-être ti gue me gi ti bâ ndo senge.

E glisa nga pëpe ye so desizion ti e ti gue na mbeni matanga na yâ mbeni église alingbi ti sala na ndo afon e na yâ vorongo. A lingbi ti sala sioni na yingo-ti-hinga ti ambeni zo? A lingbi ti woko ngangu so ala yeke sala ti kpe vorongo yanda? Bazengele Paul atene: “I . . . hinga ye so ayeke nzoni ahon, si i yeke na sioni oko pëpe, na tënë ayeke na li ti i pëpe, juska lâ ti Christ”.​—aPhilippien 1:10.

Tongana matanga ni andu mbeni sewa ti mitele so popo ti fami ni ayo mingi pëpe, akpale so alondo na mbage ti afami alingbi ti duti mingi ahon. Na yâ ye ni kue, a lingbi mbeni Chrétien agbu li nzoni na ndo atënë kue so ayeke ndu ande desizion so lo yeke mû. Na yâ ti ambeni ye so ayeke si, Chrétien ni alingbi ti tene so tongana lo gue na matanga ti mariage wala ti lungo kuâ na yâ église ni, me lo bâ ti lo gi ndo senge, lo lingbi ti wara akpale pëpe. Me, aye ni alingbi ti sala si guengo ti lo kâ aga na kpale na yingo-ti-hinga ti lo wala ti ambeni zo nde; mara ti kpale tongaso alingbi ti hon ndo ti anzoni raison kue so a pusu lo ti gue. Atâa ye ni ayeke tongana nyen, a lingbi Chrétien ni asala kue ti tene desizion so lo mû akanga lege na lo pëpe ti bata nzoni yingo-ti-hinga na gbele Nzapa nga na gbele azo.