Mo hinga nda ti ndoye ti Nzapa?

MBENI LÂ, Job afa dutingo ti azo so ayeke mbilimbili-kue pëpe tongaso: “Zo so wali adü lo ayeke na lâ mingi pëpe, na vundu ti lo asi singo. Lo sigigi tongana fleur, na a fâ lo na sese; lo kpe tongana gbede, na lo ngbâ pëpe.” (Job 14:1, 2). Fini, tongana ti so Job ahinga ni na ngoi ni kâ, asi singo na vundu. Mo kue mo bâ ni tongaso awe?

Me, atâa akpale kue so e lingbi ti wara, e yeke na mbeni kpengba beku so aluti na ndo nzobe nga na ndoye ti Nzapa. Kozoni kue, Babâ ti e ti nzobe amû sandaga ti kota ngele ti zi azo na gbe ti siokpari ti ala. Na Jean 3:16, 17, Jésus Christ atene: “Nzapa andoye sese [ti azo] so tongaso, Lo mû Molenge ti Lo ngengele oko, si zo so amä na bê na Lo alingbi kui pëpe, me lo yeke na fini ti lakue lakue. Teti Nzapa ato Molenge ti Lo [Jésus] na sese so ti fâ ngbanga ti sese so pëpe, me Lo to Lo si azo ti sese so alingbi wara salut na yâ Lo.”

Bâ nga nzobe so Nzapa afa na mbage ti e azo ti siokpari. Bazengele Paul atene: “Lo sala amara kue na lege ti zo oko si ala duti na lê ti sese kue, na Lo leke ngoi ti ala kozoni, na Lo leke yanga ti sese ti ala nde nde so fade ala duti dä, tongaso ala lingbi gi Nzapa, si peut-être ala lingbi tatara ndo teti Lo na ala wara Lo, me Lo yeke yongoro pëpe na e oko oko kue”. (Kusala 17:26, 27). Pensé kete na ni si! Atâa so e yeke mbilimbili-kue pëpe, e lingbi ti lë lakue songo na Jéhovah mveni, Wasalango e so ayeke na ndoye.

Tongaso, e lingbi ti bâ kekereke na nzoni lê, teti e hinga so Nzapa ayeke bata e nga na ndoye lo yeke sala si e duti nzoni teti lakue lakue (1 Pierre 5:7; 2 Pierre 3:13). Biani, akpengba tënë ayeke dä so apusu e ti manda ye mingi ahon na ndo Nzapa ti e so ayeke na ndoye na lege ti Tënë ti lo, Bible.