“Mo yeke wali so alingbi”

A tene tënë so na mbeni maseka-wali ti Moab. Lo yeke lani mbeni womua. Iri ti lo ayeke Ruth, kogara ti Naomi so ayeke mbeni wali ti Israël. Ruth aduti na fini na ngoi so awafango ngbanga afa lege na Israël, a sala angu 3 000 awe. Na a yeke na ndembe ni so si lo wara nzo iri so (Ruth 3:11). Lo wara ni tongana nyen? Zo wa alingbi ti manda ye na lege ti lo?

Ruth ayeke zo so ate “kobe na lege ti kusala ti goigoi” pëpe. Lo sala lani kua ngangu nga teti l’heure mingi ti ro tanga ti alê ti kobe so angbâ na yâ ayaka. Na bango ngangu kua so lo sala, azo agonda lo mingi. Même tongana a ye ti yapu yâ ti kua ti lo ni, lo ngbâ ti sala ni ngangu ahon ti so a ku na mbage ti lo. Biani, lo kpa zo so Bible asala tënë ti lo, wali so alingbi na gonda, so alingbi kue nga so asala kua ngangu.​—aProverbe 31:10-31; Ruth 2:7, 15-17.

Ruth ayeke lani na alengo ti yingo, alengo tongana be-ti-molenge, bibe ti gbanzi ye na tele nga na ndoye so ayeke be-biani. Alengo so asala si lo wara nzo iri so na gbele azo. Lo zia lani sewa ti lo nga na kodoro so a dü lo dä ti ngbâ na tele ti Naomi, atâa so lo yeke na beku mingi pëpe ti wara mbeni nzoni dutingo so mungo koli alingbi ti ga na ni. Na oko ngoi ni, Ruth afa so lo ye ti sala na Jéhovah, Nzapa ti kogara ti lo. Na gbotongo lê na ndo anzoni lengo ti Ruth, Bible atene so lo “sala nzoni na [Naomi] ahon amolenge-koli mbasambala”.​—Ruth 1:16, 17; 2:11, 12; 4:15.

Nzo iri so Ruth awara na popo ti amba ti lo ayeke lani ye ti gonda mingi. Me kota ye ni ayeke so Nzapa abâ alengo ti lo na nzoni lê na lo sala si lo wara matabisi ti ga mbeni kotara ti Jésus Christ (Matthieu 1:5; 1 Pierre 3:4). So tâ pendere tapande si Ruth azia, pëpe gi teti awali Chrétien, me teti azo kue so atene ala voro Jéhovah!