Zia si zo ahanda mo pëpe
A LINGBI ti tene so handango zo ato nda ni ngoi kete na peko ti so zo abâ gigi na sese. Oko ti akozo tondo so awara na ya mbaï ti azo, so asû na mbeti, andu mbeni salango ye na handa. A yeke na ngoi so Satan ahanda Ève na yâ yaka ti Éden.—Genèse 3:13; 1 Timothée 2:14.
Ti londo na ngoi ni so, tënë ti handa amû ndo lê sese kue, me a yeke mbilimbili na ngoi ti laso si ye so amaï mingi ahon. Na ndo ngoi ti fadeso, Bible amû giriri gbotongo mê so: “Fade lege ti azo ti sioni na azo ti handa azo aga sioni ahon, ala yeke handa azo, na azo ahanda ala.”—2 Timothée 3:13.
A handa azo teti anda ti tënë nde nde. Asioni zo ti mayele, nga azo so ayeke mû azendo ti wataka ayeke handa azo ti te nginza ti ala. Ambeni zo ti poroso ayeke handa azo ti ala, ti gi lege kue ti bata mbata ti ala na yâ poroso. Azo ayeke handa même tele ti ala mveni. A hon ti bâ tâ ye ni mbilimbili, ala handa tele ti ala so ala yeke wara ye ti sioni oko pëpe tongana ala ngbâ ti sala aye ti sioni tongana nyongo manga, nyongo mbangi, wala salango ye ti pitan.
A yeke wara nga handango ndo na yâ alege ti vorongo. Amokonzi ti lege ti vorongo ti ngoi ti Jésus ahanda azo lani. Jésus atene na ndo azo ti handa so: “Ala yeke awaziba so afa lege na awaziba. Tongana waziba afa lege na waziba, fade ala use kue atï na dü.” (Matthieu 15:14). Na ndo ni, azo ayeke handa tele ti ala mveni na ndo tënë ti vorongo. A-Proverbe 14:12 atene: “Mbeni lege ayeke so ayeke nzoni na lê ti zo, me nda ti lege so ayeke lege ti si na kui.”
Legeoko tongana ti ngoi ti Jésus, a handa azo mingi laso na ndo tënë ti vorongo, na a yeke pëpe ye ti dongo bê! Bazengele Paul atene so Satan “asala si bibe ti ala aga ziba, si ala lingbi bâ lumière pëpe, lumière ti Tene-nzoni ti gloire ti Christ, Lo so ayeke image ti Nzapa.”—2 aCorinthien 4:4.
Tongana mbeni zo ahanda e na ndo tënë ti nginza, e yeke girisa nginza ti e. Tongana mbeni zo ti poroso ahanda e, a lingbi ti lungula mbeni mbage ti liberté ti e. Me tongana Satan ahanda e si e ke tâ tënë na ndo Jésus Christ, e yeke girisa matabisi ti fini ti lakue lakue! Tongaso, zia si zo ahanda mo pëpe. Duti ndulu ti zia atënë so mo manda kozoni yamba na ti bâ oko buku so afa tâ tënë na ndo vorongo, so ti tene Bible. Tongana e sala nde, e lingbi ti girisa aye ti nzoni mingi.—Jean 17:3.