Dengo bê teti ala so ahunda mungo maboko

BIBLE ayeke pëpe mbeni mbeti so ayeke bâ tënë ti seni ti li ti zo. Ye oko, lo yeke mû na e dengo bê nga lo yeke mû maboko na e ti bâ fini na nene ni atâa akpale so e yeke wara. Na bango ye na lege ni, Mbeti ti Nzapa atene: “Zo so wali adü lo ayeke na lâ mingi pëpe, na vundu ti lo asi singo.” (Job 14:1). Dutingo mbilimbili-kue pëpe ti e si ayeke na lingu ti ambeni tara ti e. Ye oko, zo wa ayeke kozo zo so ayeke na gunda ti hungo pono ti azo?

Bible afa zo ni so tongana mbeni yingo sioni so a hiri lo Zabolo na Satan. Lo yeke “wahanda ti azo ti sese so kue” na lo yeke na gunda ti gbâ ti akpale so asala pasi na azo. Ye oko, Bible atene nga na e so ngoi ti lo ayeke gue ti hunzi (Apocalypse 12:9, 12). Na yâ ngoi kete, fade aye ti vundu kue so Satan aga na ni na ndo sese ayeke hunzi na lege ti ngangu ti Nzapa. Na lege ti Bible, zendo ti Nzapa ti ziango fini sese ti mbilimbili ayeke hunzi ande bê so anze.​—2 Pierre 3:13.

So tâ ye ti dengo bê ti hinga so pasi ti azo ayeke gi teti kete ngoi! Na gbe ti komandema ti Royaume ti Nzapa ti nduzu so lo zia na tïtî Jésus Christ, fade ye so ayeke mbilimbili pëpe nga bango pasi ayeke hunzi. Na ndo ti Gbia so Nzapa asoro, Mbeti ti Nzapa atene: “Fade Lo sö zo so ye atia lo mingi tongana lo toto na Lo, na Lo sö zo ti vundu so ayeke na zo oko pëpe ti sala na lo. Fade Lo sala be-nzoni na wanzinga na zo so ye amanke lo mingi, na Lo sö âme ti ala so ye amanke ala mingi. Fade lo ton âme ti ala na yâ ye ti ngangu na sioye; na mênë ti ala ayeke ye ti ngele ngangu na lê ti Lo.”​—Psaume 72:12-14.

Ngoi ti tene aprophétie so aga tâ tënë aga ndulu awe. E lingbi ti wara fini ti lakue lakue na ndo sese so ayeke ga ande paradis na so zo alingbi ti wara nzoni dutingo dä (Luc 23:43; Jean 17:3). Dutingo na hingango ye na ndo aversê ti dengo bê so Mbeti ti Nzapa amû zendo ni ayeke mû beku nga dengo bê na ala so ahunda mungo maboko mingi.

[Lingu ti foto na lembeti 32]

Mbeni maseka-wali so bê ti lo anze: Photo ILO/J. Maillard