Tâ mungo maboko teti awanzinga
NA NGOI so Jésus Christ, Molenge ti Nzapa, ayeke lani na sese, lo fa na gigi tâ bingo bê na mungo maboko na awanzinga. Mbeni zo so abâ kusala ti Jésus na lê ti lo mveni atene: “Awaziba abâ ndo, awazin atambela, azo ti ngiba aga nzoni, awambongi amä ndo, a yä awakinda, na a fa Tene-nzoni na awanzinga.” (Matthieu 11:5). Ye oko, ye ni ayeke tongana nyen teti awanzinga kutu mingi ti ngoi ti e? Mbeni nzo tënë ayeke dä ndali ti ala? Biani, mbeni tokua ti beku ayeke dä ndali ti ala!
Atâa so fani mingi azo ake ti bi lê na ndo awanzinga na agirisa ala, Mbeti ti Nzapa, Bible amû zendo so: “Azo so ye amanke ala mingi, fade A girisa ala lakue pëpe, wala awanzinga aku gbä lakue pëpe.” (Psaume 9:19). Atënë ti dengo bê so ayeke ga ande tâ tënë na ngoi so Royaume ti Nzapa, mbeni tâ ngorogbia ti yayu, ayeke mû place ti angorogbia ti azo kue (Daniel 2:44). Na yâ kusala ti lo tongana Gbia ti ngorogbia ti yayu so, fade Jésus “[ayeke] sala be-nzoni na wanzinga na zo so ye amanke lo mingi, na Lo sö âme ti ala so ye amanke ala mingi. Fade lo ton âme ti ala na yâ ye ti ngangu na sioye; na mênë ti ala ayeke ye ti ngele ngangu na lê ti Lo.”—Psaume 72:13, 14.
Dutingo ti azo ayeke ande tongana nyen na ngoi so Christ ayeke komande na ndo sese kue? Fade ala so ayeke na gbe ti komandema ti Christ na ndo sese kue ayeke wara ye ti nzoni na peko ti kusala so ala sala. Bible atene na Michée 4:3, 4: “Fade azo oko oko kue aduti na gbe ti vigne ti ala mveni, na gbe ti keke ti figue ti ala mveni; zo oko ti mû mbito na ala ayeke pëpe teti yanga ti L’Eternel Ti Sabaoth asala tënë ni awe.” Fade Royaume ti Nzapa ayeke kaï même akpale ti kobela na kui (Esaïe 25:8). Fade sese ni ayeke duti nde! E lingbi ti mä na bê na azendo ti Bible so teti so a yeke Nzapa mveni si amû yingo ti lo si a sû ni.
Na ndo ti mungo mbeni tokua ti beku, Bible amû maboko na e ti hon ndo ti akpale ti lâ oko oko, na tapande, lege so zo alingbi ti kpe ti bâ tele ti lo so lo ne na lê ti azo pëpe teti so lo yeke na yâ nzinga. Mbeni Chrétien so ye atia lo ayeke hinga, na lege ti mandango Bible ti lo, so lo yeke na kota ngele na lê ti Nzapa legeoko tongana zo so ayeke na mosoro mingi. Buku ti Job so ayeke na yâ ti Bible afa tënë so na ndo Nzapa: “Lo yekia azo ti mosoro ahon awanzinga pëpe, teti ala kue ayeke ye so tïtî Lo asala.” (Job 34:19). Nzapa andoye ala use kue legeoko.—Kusala 10:34, 35.