Nzapa ayeke bi bê na ndo e?

MO BÂ so akpale so mo wara na lege ti sewa, kobela, kusala ti mo wala ambeni nengo kungba azia kota vundu na bê ti mo? A yeke si na azo mingi. Zo wa laso si salango ye ti kirikiri ti azo, kengo-ndia na salango ngangu andu lo pëpe? Biani, a yeke tâ gi tongana ti so Bible atene: “Ye kue ti création abima na gua ate ala juska fadeso.” (aRomain 8:22). A yeke na lege ni ti tene azo mingi ahunda tënë: ‘Nzapa ayeke bi bê ti lo na ndo azo? Lo yeke mû ande maboko na e?’

Salomon, Gbia ti ndara atene na Nzapa na yâ sambela: “Teti Mo, gi Mo oko, Mo hinga bê ti amolenge ti azo.” Salomon ayeke na beku so Nzapa ahinga e na lo yeke bi bê na ndo e oko oko kue. Lo lingbi lani ti hunda na Nzapa ti “mä tënë so na yayu”, na ti kiri tënë na sambela ti zo oko oko so akpe mbito ti Nzapa, so ayeke fa na Lo “kobela ti ala na vundu ti ala mveni”.​—2 Chronique 6:29, 30.

Laso, Jéhovah Nzapa angbâ lakue ti bi bê na ndo e na lo tisa e ti toto na lo na yâ sambela (Psaume 50:15). Lo mû zendo ti kiri tënë na asambela so a sala na bê kue, so ague oko na ye so bê ti lo aye (Psaume 55:17, 23; Luc 11:5-13; 2 aCorinthien 4:7). Biani, Jéhovah ayeke mä ‘sambela wala ahunda ti mbeni zo wala ti azo ti lo kue’. Tongaso, tongana e zia bê ti e kue na Nzapa, e sambela ti wara mungo maboko ti lo, na e ga ndulu na lo, fade e yeke wara bingo bê ti lo nga na fango lege ti lo ti ndoye (aProverbe 3:5, 6). Jacques, wasungo Bible, amû zendo na e: “I ga ndulu na Nzapa, na fade Lo ga ndulu na i.”​—Jacques 4:8.