A lingbi mo soro église wa?

‘A-ÉGLISE nde nde ayeke gi alege nde nde so ague na ndo oko, teti biani Nzapa ayeke gi oko, ni la pëpe?’ A yeke bibe so azo mingi ayeke kangbi ni, na ala bâ ti ala so, atâa so a yeke kota ye ti ga membre ti mbeni église wala lege ti vorongo, église so zo asoro ti gue dä ayeke kota ye pëpe.

Na kozo bango ni, tënë so alingbi ti duti tâ tënë. Ngbanga ti so Nzapa ayeke gi oko, Lo ti Ngangu Ahon Kue (Esaïe 44:6; Jean 17:3; 1 aCorinthien 8:5, 6). Ye oko, e lingbi ti kanga lê pëpe na ndo ti akangbi so zo abâ polele, même na ndo ti atënë so ague nde nde na popo ti a-église mingi so atene ala yeke sala na tâ Nzapa. Salango ye ti ala, aye so ala mä na bê dä, afango ye nga na andia ti ala ayeke nde mingi na ti ambeni. Akangbi so ayeke kota mingi asala si azo so ayeke membre ti mbeni église wala ti mbeni kete bungbi ti vorongo abâ so a yeke ngangu ti yeda wala ti gbu nda ti atënë so ambeni zo ayeke fa wala amä na bê na ni.

Na mbage, Jésus atene: “Nzapa ayeke Yingo, na ala so asambela Lo, a yeke ngbanga ti ala ti sambela Lo na yingo na tene-biani [“tâ tënë”, NW ].” (Jean 4:24). Ti voro Nzapa na tâ tënë azi lege ti wara gbâ ti abibe so ague nde nde na ndo lo so ayeke biani Nzapa? A zi nga lege na abibe nde nde na ndo aye so lo leke na bê ti lo ti sala wala lege so lo ye azo avoro lo? A yeke na lege ni ti mä na bê so lege so e yeke voro lo ayeke kota ye pëpe na lê ti Nzapa ti Ngangu Ahon Kue?

Atâ Chrétien giriri nga laso

Ngoi na ngoi, aChrétien ti kozo siècle ayeke na abibe nde nde na ndo ti ambeni tënë. Na tapande, na salango tënë na ndo ti ala so ayeke na Corinthe, bazengele Paul atene lani: “Azo ti Chloé afa na mbi tënë ti i, aita ti mbi, ala tene papa ayeke na popo ti i. Ye so mbi ye ti tene ayeke so: mbeni ti i atene, Mbi yeke ti Paul; mbeni atene, Mbi yeke ti Apollos; mbeni atene, Mbi yeke ti Céphas; na mbeni atene, Mbi yeke ti Christ.”​—1 aCorinthien 1:11, 12.

Paul abâ lani akangbi so tongana mbeni kete ye? Zo oko oko amû lani gi peko ti ye so bê ti lo mveni aye ti wara na salut? Oko pëpe! Paul amû lani gbotongo mê so: “Aita, mbi hunda i mingi, na iri ti Seigneur ti e Jésus Christ, si tënë ti yanga ti i kue aga oko, na i zia tënë ti kangbi aga na popo ti i pëpe, me i duti na bibe oko na tënë oko.”​—1 aCorinthien 1:10.

Biani, ti tene a sala si atënë ti mabe kue aduti oko, a lingbi pëpe ti sala ni na ngangu. A lingbi ti sala ni gi tongana zo oko oko agi nda ti ye ni nzoni na asi na a-oko nda ti tënë so ala kue ayeda na ni. Tongaso, mandango Tënë ti Nzapa zo mveni nga na tâ nzara ti salango ye alingbi na ye so zo ni amanda, a yeke akota kapa ti dutingo na mara ti beoko so Paul asala lani tënë ni. A lingbi ti wara mara ti dutingo beoko so? Tongana ti so e bâ ni na yâ ti article so ahon awe, a ninga awe so Nzapa ayeke sala ye na azo ti lo tongana mbeni bungbi. Ti laso, a lingbi ti hinga bungbi ni so?

Ye ti nzoni so aga na lege ti dutingo ndulu na bungbi so Nzapa ayeda na ni

Wasungo psaume David ahunda tënë so mbeni lâ: “O L’Eternel, fade zo nyen aduti na Tabernacle ti Mo? Fade zo nyen aduti na Hoto ti Mo ti nzoni-kue?” Biani, so ayeke mbeni hundango tënë so apusu zo ti gbu li. David amû kiringo tënë ni: “Lo so atambela mbilimbili, na lo sala kusala ti mbilimbili, na lo tene tene-biani na bê ti lo.” (Psaume 15:1, 2). Tâ gbungo nda ti Bible ayeke mû lege ande na zo ti hinga na bungbi so asala ye alingbi na aye so Nzapa ahunda. Na dutingo ndulu na bungbi so, fade zo ni ayeke duti na ngia ti sala songo na ambeni zo so alingbi ti kpengba lo na so ayeke voro Nzapa beoko na “yingo na tene-biani” nga.

A-Témoin ti Jéhovah afa polele awe so a lingbi même ti wara mbeni dutingo beoko na yâ mabe nga na salango ye na yâ sese so akangbi kirikiri laso. Na popo ti ala, a yeke wara azo so kozo ayeke na yâ ti a-église nga akete mara mingi. Ambeni Témoin ayeke lani azo so ahinga mbilimbili pëpe so Nzapa ayeke dä wala azo so atene Nzapa ayeke pëpe. Ambeni nde abi bê mbilimbili lâ oko pëpe na ndo lege ti vorongo. Ambeni zo so asigigi awe na yâ ti a-église, angobo ti salango ye nga na atënë ti senda-ndara nde nde so ayeke wara ngia na yâ mbeni dutingo beoko na lege ti vorongo so a yeke bâ mara ni na mbeni ndo oko pëpe na yâ sese ti laso.

Gere ti mara ti dutingo beoko tongaso aluti na ndo ti Tënë ti Nzapa, Bible. Tâ tënë, aTémoin ti Jéhovah ahinga so ala lingbi ti gbu azo na ngangu pëpe ti sala ye tongana ti ala. Me ala yekia matabisi so ala wara ti wa azo ti manda ye na ndo Bible, tongaso si sorongo ye ti ala na ndo vorongo aluti na ndo kpengba ye so ala manda dä. Na lege so, azo mingi ahon ti kozo alingbi ti kangbi ye ti nzoni so aga na lege ti vorongo Nzapa “na yingo nga na tene-biani.”

Laso, kpale ti bango pasi na lege ti asioni salango ngangu nga na ahanda ayeke kota mingi. Ti soro mbeni bungbi so ayeke na lege ni ayeke kota ye mingi. Bible atene so “zo so atambela na awandara, fade lo ga wandara,” na “zo ti nzoni so atambela na azo ti sioni afuti lege ti lo.” (aProverbe 13:20; 1 aCorinthien 15:33). Ti bungbi legeoko na atâ wavorongo Nzapa ayeke mbeni ye ti batango tele. Ni la, Bible adabe ti e: “A lingbi e bi bê ti e na ambeni zo na popo ti e ti wa ala si ala ndoye azo, na ala sala kusala nzoni; a lingbi e zia ti bungbi pëpe, legeoko tongana ambeni zo asala, me e wa tele ti e na ambeni zo, na a lingbi i wa tele ti i mingi ahon teti i bâ so lâ ni aga ndulu.” (aHébreu 10:24, 25). So ayeke biani tâ mbeni deba nzoni tongana atâ ndeko, aita-koli na aita-wali na lege ti yingo, ayeke mû maboko na mba na ndoye na salango ye alingbi na kungba so ala yeke na ni na gbele Nzapa!

Ottmar ayeda na bango ndo so. Lo kono na yâ ti mbeni sewa ti aCatholique na kodoro ti Zamani, na lo zia lege ti gue na Église. Lo tene: “Lakue so mbi yeke gue na Église, mbi yeke sigigi na ye oko pëpe na li ti mbi.” Ye oko, lo ngbâ ti bata mabe ti lo na Nzapa. Na pekoni, lo tingbi na aTémoin ti Jéhovah na lo ga ti hinga biani so ala yeke atâ wakua ti Nzapa. Lo bâ so a yeke kota ye ti tene lo bungbi legeoko na ala. Fadeso lo tene: “Ti sala kusala na yâ mbeni bungbi so amû ndo lê sese kue, a sala si mbi yeke na siriri ti bê na ti bibe. Yeke yeke a mû maboko na mbi ti wara tâ hingango ye ti Bible. So ayeke mbeni ye so ayeke na kota ngele mingi na lê ti mbi.”

Mbeni tisango ndo na ala so angbâ ti gi

Azo so amä tele na so asala kusala ndulu na tele ti mba tongana mbeni bungbi alingbi ti sala mbeni kusala nzoni mingi ahon azo so aye ti sala kusala gi ala oko, sân ti wara mungo maboko ti amba ti ala. Bâ tapande ti wango so Jésus amû ni lani na adisciple ti lo kozoni si lo gue na yayu: “Tongaso i gue, i fa tënë na amara kue si ala ga adisciple, i batize ala na iri ti Babâ, na ti Molenge, na ti Yingo Vulu; i fa na ala ti bata ye kue so Mbi komande i.” (Matthieu 28:19, 20). A lingbi biani ti sala kota kusala so nzoni tongana nyen tongana mbeni fango lege wala mbeni bungbi ti fa lege na ni ayeke dä pëpe? Na tongana nyen mbeni zo alingbi ti sala ye alingbi na komandema ti Mbeti ti Nzapa so, tongana lo tara ti sala na Nzapa gi lo oko?

Na yâ ngu so ahon, aTémoin ti Jéhovah na ndo lê sese mobimba akangbi ambeti na abrochure 91 933 280 so aluti na ndo Bible, nga apériodique ahon 697 603 247. Na salango tongaso, ala wara lege ti ndu azo kutu ngbangbo mingi na tokua ti Tënë ti Nzapa na yâ ti akodoro 235. Ye so ayeke biani kota fä so mbeni bungbi so aduti beoko na so a leke ni nzoni alingbi ti sala kusala mingi ahon zo so ayeke gi lo oko!

Na ndo ti kangbingo ambeti so aluti na ndo Bible, aTémoin ti Jéhovah ayeke mû li ni na yâ ti mandango Bible senge senge na azo ti mû maboko na ala ti wara kota hingango ye na ndo aye so Nzapa ahunda na ala. Na yâ ngu so ahon, yenga oko oko, wungo ti amandango Bible asi 5 726 509, mandango ye so a sala ni na azo nde nde wala na mbeni kete bungbi ti azo. Afango ye so aluti na ndo ti Bible amû maboko na azo kutu mingi ti wara mbeni nzoni gere ti sorongo ye so andu vorongo. A tisa mo ti manda aye so Nzapa ahunda tongana ti so ayeke na yâ Bible. Na pekoni, mo lingbi ti soro ti mo mveni.​—aEphésien 4:13; aPhilippien 1:9; 1 Timothée 6:20; 2 Pierre 3:18.

Tongana mo ye ti nzere na lê ti Nzapa, ti ga membre ti mbeni lege ti vorongo ayeke biani kota ye; me mo soro gi mbeni lege ti vorongo tongaso pëpe. A lingbi mo zia sorongo ye ti mo ni aluti na ndo ti mbeni tâ hingango ye ti Bible, pëpe na ndo mbeni kota tënë ti mabe ti mbeni église so a fa ni polele pëpe wala so mo mä gi ni mango (aProverbe 16:25). Manda aye so a hunda teti mbeni tâ lege ti vorongo, na mo haka ni na aye so mo mä na bê dä mo mveni. Na pekoni mo soro ye so alingbi biani na ni.​—Deutéronome 30:19.

[Afoto na lembeti 7]

A-Témoin ti Jéhovah ayeke na ngia ti duti beoko na yâ mbeni sese so akangbi kirikiri