Ti ke gi ti sala sioni wala ti gi nga ti sala nzoni?
YE SO i ye pëpe si azo asala na i, i sala ni na ala pëpe.” A tene so a yeke Confucius, mbeni wafango ye na wandara ti Chine so azo ahinga lo mingi, si amû kpengba-ndia so na ndo salango ye ti zo. Laso, angu 2 500 tongaso na pekoni, azo mingi angbâ ti mä na bê so tâ ye ti nzoni so mbeni zo alingbi ti sala ayeke gi ti ke ti sala mbeni ye ti sioni na amba ti lo.
Biani, e ke pëpe so tënë ti Confucius so ayeke sala nzoni na zo tongana a bata ni. Ye oko, Bible afa ti lo mbeni ye nde so ayeke na yâ salango ye ti zo nga na dutingo ti lo na mbage ti amba ti lo. Na yâ Bible, a sala tënë gi pëpe na ndo siokpari so zo alingbi ti sala na mbage ti amba ti lo, me nga siokpari so zo alingbi ti sala tongana, na lege ti mbana wala na bê kue pëpe, lo ke ti sala mbeni ye so a ku na mbage ti lo fade. Disciple Jacques so ayeke Chrétien atene: “Zo so ahinga lege ti sala nzoni na lo sala pëpe, zo so asala siokpari.” (Jacques 4:17). Ahon ti tene gi na aChrétien ti ke gi ti sala sioni na amba ti ala, Jésus Christ amû wango so: “Ye kue so i ye azo asala na i, i sala na ala tongaso nga.”—Matthieu 7:12.
Nzapa aleke giriri ti tene azo kue asala ye na amba ti ala tongana ti so ala ye amba ti ala asala na ala. Na ndo lege ti bingo bê na ndo nzoni duti ti azo, lo zia lani pendere tapande so ahon atanga ni kue na yâ lege so lo leke na azo. Bible atene: “Nzapa acréé zo na image ti Lo mveni, na image ti Nzapa Lo créé lo; Lo créé ala koli na wali.” (Genèse 1:27). So aye ti tene so na yâ ndoye ti lo, Nzapa amû na azo mbeni yingo-ti-hinga so, tongana a leke ni nzoni, ayeke pusu ala ti sala ye na mbage ti amba ti ala tongana ti so ala mveni aye a sala na ala.
Azo mingi laso ayeke bâ pasi na maboko ti azo so ayeke bâ mawa ti amba ti ala pëpe na so abi bê gi na ala mveni, na ye so asala si azo so abâ pëpe mbeni beku teti ala nga lege ti wara mungo maboko ti mbeni zo. A yeke polele so ye so a ku na mbage ti zo ayeke gi pëpe ti tene lo ke ti sala ye ti sioni na amba ti lo, me ahon so, ti sala ye so ayeke nzoni na so amû maboko na ala. Ndali ti ye so, aTémoin ti Jéhovah ayeda na bê ti ala mveni ti sala ye so ayeke nzoni, so ti tene ti mû maboko na azo ti manda ye na ndo pendere beku so a wara na yâ Mbeti ti Nzapa. Tongana ala yeke ga na mbage ti amba ti ala ti fa nzo tënë ti Bible, ala yeke sala ni na bibe ti ndoye, na salango na azo ye so ala ye si a sala na ala nga.