“E ye ti tene ande na lo so e sala lani ye ni biani!”

ADE ti ninga pëpe, filiale ti aTémoin ti Jéhovah na Nigéria awara mbeni lettre so na yâ ni a sala atënë so:

Molenge ti e ti koli, Anderson, akui lani na ngoi so lo yeke na ngu 14. Kozoni si lo kui, lo bata lani kondo use. Na lo ye ti kä ala ti tene lo tokua nginza ni na filiale tongana mbeni matabisi so lo mû ti tene a sala na kusala ti fango tënë na ndo lê sese mobimba. Ye oko, lo kui kozoni si a ga ti kä akondo ni.

“Na bango nzara ti bê ti lo ti tokua nginza ti akondo so na filiale, e babâ na mama ti lo e bata akondo ni na peko ti lo na e kä ala. Fadeso e yeke tokua nginza ni na i tongana matabisi ti Anderson. Teti so Jéhovah amû zendo awe, e yeke na beku so na yâ ti ngoi kete fade e yeke kiri ti bâ Anderson. Tongana lo yeke hunda na e wala e tokua lani nginza ni na filiale ni biani, e ye ti tene ande na lo so e sala lani ye ni biani! Tâ tënë, e yeke ku ti bâ gi Anderson lo oko pëpe me nga mbeni ‘kota mbinda ti atémoin’ so ayeke londo ande na popo ti akuâ.”​—aHébreu 12:1, NW; Jean 5:28, 29.

Tongana ti so lettre so ayeke na li ti mbeti so afa tënë ni polele, mabe na yâ londongo ti akuâ ayeke mbeni beku so ayeke mû ngangu na atâ Chrétien. So tâ kota ngia si asewa kutu mingi ayeke wara ande, legeoko tongana sewa ti Anderson, na ngoi so ala yeke yamba azo so ala ndoye ala mingi na so ala girisa ala na lege ti wato ti e kui!​—1 aCorinthien 15:24-26.

Tënë ti Nzapa amû beku ti londongo ti awakinda so adö bê tongana mbeni oko ti gbâ ti apendere ye so ayeke ga ande tâ tënë na yâ ti fini sese so mbilimbili ayeke duti dä na gbe ti Royaume ti Nzapa (2 Pierre 3:13). Na salango tënë na ndo ti ye so Nzapa ayeke sala ande teti azo na ngoi ni kâ, Bible atene: “Fade lo mbô ngule kue na lê ti ala, na kui ayeke mbeni pëpe. Vundu, wala toto, wala sana, ayeke mbeni pëpe teti kozo ye ni ahon awe.”​—Apocalypse 21:4.