‘Gingo mbeni zo so alingbi’

DAMAS ayeke mbeni gbata so amaï mingi na ngoi ti abazengele. Teti so ayaka ti alê ti keke angoro tele ni, na lê ti azo so alondo na akodoro so ayeke na mbage ti tö ti Damas na so ayeke gue na ayongoro tambela, gbata ni ayeke tongana mbeni kete gbako so ngu ayeke dä. Kete na peko ti kuâ ti Jésus Christ, mbeni kongregation abâ gigi lani na Damas. A yeke wara na popo ti azo ti kongregation ni aJuif so aga adisciple ti Jésus, peut-être na ngoi ti Matanga ti Pentecôte ti ngu 33 (Kusala 2:5, 41). Ambeni disciple so alondo na Judée alingbi ti kpe lani na Damas na ngoi so salango ngangu alondo na peko ti kuâ ti Etienne so a bo lo na tênë.​—Kusala 8:1.

Peut-être a yeke na yâ ti ngu 34 si mbeni Chrétien so iri ti lo ayeke Ananias awara lani mbeni kusala so ayeke kota mingi. Seigneur atene na lo: “Mo londo, mo gue na lege ti kodoro so ala di iri ni Mbilimbili, mo hunda na da ti Judas teti zo so iri ti lo ayeke Saul, zo ti kodoro ti Tarse. Bâ lo yeke sambela.”​—Kusala 9:11, 12.

Lege ti kodoro so a hiri ni Mbilimbili ayo ndulu na kilomètre oko na ndambo nga afâ yâ ti gbata ti Damas. Na bango foto ti lege so ayeke na yâ lembeti so, e lingbi ti hinga mbeni ye na ndo lege ti giriri so; lege so a leke ni ahon ngu 1 900 awe. Na bango kode so a leke na lege so, ti wara da ti Judas, a hunda peut-être na Ananias ti mû ngoi ti gi ni. Ye oko, Ananias awara lani da ni. Na ye so aga na peko ti vizite ti lo ayeke so Paul aga lani bazengele, mbeni wafango nzo tënë so ayeke na wâ.​—Kusala 9:12-19.

Jésus ato lani adisciple ti lo na lo tene na ala ‘ti gi azo so alingbi’ na nzo tënë (Matthieu 10:11). Na bango ni, Ananias agi lani biani Paul. Legeoko tongana Ananias, aTémoin ti Jéhovah ayeke na ngia ti gi azo so alingbi na so ayeda na nzo tënë ti Royaume na ngia. Warango azo so alingbi asala si angangu kue so zo amû ni angbâ senge pëpe.

[Foto na lembeti 32]

‘Lege so a di iri ni Mbilimbili’

[Lingu ti foto na lembeti 32]

Foto ti buku La Tierra Santa, Mbage II, 1830