Atënë so azo ahunda

Tongana Jésus atene na adisciple ti lo ti “sala bon sân ti zia interêt na ndo ni, na [ti] ku ti wara mbeni ye na pekoni pëpe” (NW ), lo ye ti tene so ala lingbi pëpe ti hunda ti tene a kiri na ala nginza so ala sala bon ni na azo?

E lingbi ti mä yâ ti atënë ti Jésus so a fa pekoni na Luc 6:35 (NW ) nzoni gi tongana e bata na li ye so ayeke na yâ Ndia ti Moïse. Na yâ Ndia so, Nzapa amû yanga na azo ti Israël ti sala bon sân ti zia interêt na ndo ni na amba ti ala so ayeke na kota kpale ti nginza, na tongaso ala yeke tâ na bezoin ti mungo maboko (Exode 22:25; Lévitique 25:35-37; Matthieu 5:42). Mara ti bon tongaso ayeke pëpe ti tene zo ni akä na ye. Me a yeke ti sala si kpale ti ngangu nzinga so zo ni ayeke na yâ ni ayapu kete, teti biani, a yeke tâ sioni mingi ti wara faïda na ndo ti mba ti mo so ayeke tâ na kpale ti nginza. Ye oko, mveni ti nginza ni ayeke na droit ti hunda nginza so a sala bon ni na tïtî lo, nga na ambeni ngoi, lo lingbi ti mû mbeni ye ti zo so asala bon ti lo ti bata ni juska lo futa bon ni si.​—Exode 22:25, 26.

Na ngoi so lo yeke fa nene ti Ndia so, Jésus akiri akono yâ ni ti fa mbeni lege nde so zo alingbi ti sala kusala na ndia ni na tenengo so a lingbi zo so ayeke mû maboko na mbeni zo aku pëpe ti wara “mbeni ye na pekoni”. Legeoko tongana ti azo ti Israël, ngoi na ngoi ambeni ye alingbi ti sala si aChrétien atï na yâ mbeni ngangu kpale ti nzinga. Tongana mbeni ita ayeke na yâ mara ti kpale so, na lo yeke na bezoin ti tene a mû maboko na lo na lege ti mbeni nginza, a yeke duti ande nzoni mingi ti mû maboko na lo. Biani, tâ ndoye ayeke pusu mbeni Chrétien ti mû maboko na mbeni ita so ayeke tâ na kpale ti nginza ndali ti aye nde nde so asi na lo (aProverbe 3:27). A yeke duti nzoni ti mû gi mbeni matabisi na mara ti ita tongaso, atâa so wungo ni ayeke kete ahon ti so mo lingbi ti sala bon ni na lo.​—Psaume 37:21.

Na ngoi ti akozo Chrétien, a tokua bazengele Paul na Barnabas ti gue na amatabisi ti aChrétien ti Asie Mineure na aita ti Judée so kota nzara atï na kodoro ti ala (Kusala 11:28-30). Legeoko nga laso, tongana ye ti ngangu asi, fani mingi aChrétien ayeke tokua amatabisi na aita so ye atia ala. Na salango tongaso, ala yeke mû mbeni nzoni tënë ti témoin na azo (Matthieu 5:16). Biani, a hunda ti bâ bibe nga na dutingo ti zo so ayeke gi mungo maboko ni. Ngbanga ti nyen lo yeke na bezoin ni? A lingbi e hinga atënë ti Paul so: “Tongana mbeni zo aye ti sala kusala pëpe, zia lo te kobe pëpe.”​—2 aThessalonicien 3:10.

Tongana ita so ahunda bon ni ayeke pëpe na yâ ti ngangu bezoin, me lo yeke gi na bezoin ni ti tene a mû maboko na lo si lo kiri lo londo na peko ti mbeni kpale so asi na lo, a yeke duti peut-être nzoni ti sala bon ni na lo na ti zia interêt na ndo ni pëpe. Na yâ mara ti aye tongaso, ti mû bon na zo ni na ti ku ti tene lo kiri na nginza ni kue ague nde pëpe na tënë ti Jésus so ayeke na Luc 6:35 (NW ). A lingbi ala sû mbeti na popo ti ala, na a lingbi zo so amû bon ni asala kue ti futa ni alingbi na tënë so ayeke na yâ ti mbeti ni. Biani, a lingbi ndoye ti aChrétien apusu zo ti mungo bon ni ti futa ni legeoko tongana ti so ndoye so apusu mba ti lo ni ti sala bon na lo.

A lingbi zo so aye ti sala bon (wala ti mû matabisi) na mbeni zo abâ nga dutingo ti sewa ti lo mveni si. Na tapande, kozo ye so Mbeti ti Nzapa ahunda ayeke ti bâ lege ti aye so atia sewa ti lo. Me tongana lo sala bon ni wala lo mû matabisi ni, lo lingbi ande ti bâ lege ti aye so atia sewa ti lo? (2 aCorinthien 8:12; 1 Timothée 5:8). Ye oko, aChrétien ayeke gi alege so azi ti fa ndoye na popo ti ala; fango ndoye so na mbeni lege so ayeke nzoni ague oko na akpengba-ndia ti Bible.​—Jacques 1:27; 1 Jean 3:18; 4:7-11.