Aye ti hingango ni ayeke mingi teti e?

Mbeni koli na wali ti lo so ayeke amissionnaire aduti na yanga ti ngu na Do ti Afrika na ala yeke bâ nze so aza mingi na nduzu. Koli ni ahunda: “Ye wa si zo ahinga awe na ndo ti nze, na ye wa angbâ ti tene lo hinga na ndo ni?”

Wali ni akiri tënë na lo: “Tara ti bâ so tongana e lingbi fade ti bâ sese ayeke fono na lê ti nduzu tongana ti so e yeke bâ na nze so, ye wa azo ahinga awe na ndo ti sese nga ye wa angbâ na azo ti tene ala manda na ndo ni? Na bâ tënë so si! Gi sese si ayeke turne na tele ti lâ pëpe, me aye kue so ayeke na tele ti lo na nduzu si ayeke fono. So aye ti tene a yeke duti ande ngangu ti tene e kiri mbeni lâ na tâ place so e yeke dä na ndembe so na yâ dunia. Ti tâ tënë ni, e hinga ndo so e yeke dä na lege ti lâ na atongoro so e yeke bâ. E hinga aye mingi na ndo ambeni ye, me e lingbi ti tene so e hinga ye oko pëpe na ndo place so e yeke dä na ndembe so!”

ATËNË so andu ambeni kota tâ tënë. Na bango aye ni, ye ayeke mingi ti manda. Biani, e kue e yeke manda afini ye lâ na lâ. Ye oko, atâa ye so e manda ayeke mingi, e lingbi pëpe ti manda aye hio tongana ti so fade e ye ti sala.

Tâ tënë, na ndo kode so zo ayeke na ni ti wara na afini sango, ngangu so lo yeke na ni ti bungbi na ndo ti tele aye so lo hinga ague na li ni mingi. Aye kue so sese mobimba ahinga akiri aga mingi na lege ti senda-kode. A-ordinateur ti fadeso akpengba mingi na a lingbi a sigigi na afini tënë ti fa na peko ti aye ni. A lingbi ti zia na yâ ti mbeni ordinateur asango mingi mingi so lo lingbi ti bata ni. Mbeni ye so a pika asango na ndo ni, so a hiri ni DVD, alingbi nga ti bata aye mingi tongaso, na ambeni ti ngangu ni angbâ ti sigigi.

Ti ngoi so e yeke dä, akode so zo ayeke na ni ti tokua na asango e lingbi ti mä yâ ni kue pëpe. Amasini ti petengo ambeti nde nde ayeke kpe na loro mingi. A hunda gi ti pete mbeni bouton oko ti ordinateur na ndo Internet, na asango mingi ayeke sigigi. Ahon aye so kue, lege ti warango asango ayeke gue na li ni mingi ahon ti so zo alingbi ti manda. E lingbi ti haka wungo ti asango so kue na mbeni ngu-ingo so a lingbi e manda ti pika ngu si e hon na yâ ni, me pëpe ti tara ti nyon ngu ni kue. Gbâ ti asango so kue apusu e ti soro yâ ni na hange.

Nda ni so nga a lingbi e soro yâ ti asango nzoni ayeke so asango kue si ayeke lakue nzoni teti zo pëpe. Tâ tënë, ambeni a nzere même oko pëpe ti tene zo ahinga ni. Girisa pëpe so hingango ye ague oko na sango: a lingbi ti duti nzoni wala sioni, a lingbi ti sala nzoni na zo wala pëpe. Sioni ye ni ayeke so ambeni ye so azo abâ ni tongana tâ tënë andâ a yeke tâ gi mvene. Fani oke si a ga ti bâ so atënë ti akpengba wakode wala awandara ayeke wataka, wala tënë ti mvene na pekoni? Bâ, na tapande, mbaï ti ngbele kodoro ti Éphèse, so azo abâ wakuasu ti gbata ni ândö tongana wahingango ye. Lo tene: “Zo nyen ahinga pëpe? so kodoro ti Ephèse ayeke sinziri ti temple ti kota Diane, na ti yanda so alondo na yayu, a tï na sese.” (Kusala 19:35, 36). Atâa so azo mingi alingbi ti tene so a yeke mbeni ye so zo kue ahinga ni, na même kite ayeke na ndo ni pëpe, ye oko, a yeke lani tâ tënë pëpe so yanda ni alondo na yayu atï na sese. A yeke na lege ni si Mbeti ti Nzapa agboto mê ti aChrétien ti sala hange na ye so “zo adi iri ni ndara [“hingango ye”, NW ], me a yeke mvene”.​—1 Timothée 6:20.

Mbeni ngangu nda ti tënë so ahunda ti tene e soro aye so e yeke gi ti manda ayeke so fini ti e ayo mingi pëpe. Atâa ngu ti mo ayeke tongana nyen, kite ayeke pëpe so ye ayeke mingi so mo ye ti manda, me mo bâ so mo lingbi ande oko pëpe ti ngbâ na fini a ninga ti sala aye so kue.

Fade a yeke leke ande kota tënë so? Fade zo amanda mbeni ye so alingbi ti mû na lo fini so aninga, même teti lakue lakue? Mara ti hingango ye so ayeke dä laso? Tongana a yeke tongaso, zo kue alingbi ti wara ni? Mbeni ngoi ayeke ga ande so hingango ye kue ayeke duti gi tâ tënë? Koli na wali missionnaire so e sala tënë ti ala fade na li ni awara lani anzoni kiringo tënë na atënë so, na mo nga mo lingbi ti wara ni. A yeke nzoni mo diko article ti peko, so ayeke mû na mo beku ti wara hingango ye lakue lakue.