Atënë so azo ahunda
Ngbanga ti nyen Paul atene tënë so na ndo mbeni wali Chrétien: “Fade a sö wali ni na lege ti dungo molenge”?—1 Timothée 2:15.
Atënë so angoro versê ni afa nyen na ndo nda ti tënë ti Paul? Yingo vulu apusu lo ti mû wango na ndo kusala ti wali Chrétien na yâ ti kongregation. Lo sû na mbeti: ‘Mbi ye nga si awali ayü bongo so ayeke na lege ni: bongo so afa nengo tele ti ala, bongo ti salango na baba pëpe; ala leke kuä ti li ti ala na kode ahon ndo ni pëpe; ala yü aye ti lor wala alenge pëpe; ala yü abongo ti kota nginza pëpe. Me ayeke nzoni awali afa so ala yeke pendere na lege ti salango anzoni ye; ye so awali so akpe mbito ti Nzapa alingbi ti sala la.’ (1 Timothée 2:9, 10, Fini Mbuki, 2001). Paul ayeke wa lani aita ti lo wamabe ti wali ti sala ye ahon ndo ni pëpe na ndo tënë ti sorongo aye ti salango na baba nga ti duti azo so ayeke “pendere” na lege ti salango anzoni ye.
Na pekoni, Paul afa lege so a yeke mû li ni na yâ ti kongregation. Lo tene: “Mbi ye wali afa nda ti tënë wala akomande koli pëpe, me lo duti kpô.” (1 Timothée 2:12; 1 aCorinthien 11:3). Lo fa ye so ayeke na gunda ti lekengo ye so na tenengo so a yeke pëpe Adam si Satan ahanda lo, me Eve la “amä handa na lo tï na lege ti kengo-ndia.” Tongana nyen si a lingbi ti bata mbeni wali Chrétien nde na mara ti siokpari ti Eve? Paul akiri tënë: “Me fade a sö wali ni na lege ti dungo molenge, tongana lo duti na yâ mabe, na ndoye, na lo bata tele ti lo nde teti Nzapa, na lege ti ndara ti bata tele ti lo.” (1 Timothée 2:14, 15). Paul aye ti tene nyen?
Ambeni wakiringo na peko ti Bible atara ti fa atene songo fini ti mbeni wali aluti na ndo ti dungo molenge. Na tapande, Fini Mbuki, 1995 atene: ‘Nzapa ayeke sö [wali] ande na kuâ ndali ti so lo dü molenge.’ Ye oko, kiringo peko ti tënë ti Paul ni tongaso ayeke na lege ni oko pëpe. Aversê mingi afa so ti tene a sö mbeni zo, a lingbi lo hinga ye na ndo ti Jéhovah, lo mä na bê na Jésus na lo fa mabe ni na gigi na lege ti akusala (Jean 17:3; Kusala 16:30, 31; aRomain 10:10; Jacques 2:26). Nga, Paul aye pëpe ti tene so ti awali wamabe, fade ala yeke dü gi nzoni sân ti tene mbeni kpale asi na ala. Aye so asi afa so ambeni wali adü nzoni atâa ala yeke awamabe wala pëpe. Na ye ti mawa ayeke so ambeni wali akui na ngoi ti dungo ni atâa so ala yeke awamabe wala pëpe.—Genèse 35:16-18.
Wango so Paul akiri amû na ndo ti awali na yâ ti oko mbeti so amû maboko na e ti mä yâ ti atënë ti lo ni nzoni. Lo gboto mê ti awali womua so ade maseka na so ‘ayeke duti gi senge senge tongaso si ala mû gi kua ti fonongo na yâ ti ada oko oko; na ndo ni ala kiri ayeke diko atënë mingi mingi si ala yeke yôro yanga ti ala na yâ ti tënë ti azo; ala yeke tene atënë ti kirikiri mingi.’ Ye nyen Paul awa ala ti sala? Lo ngbâ ti tene: ‘Ni la, mbi ye awali-mua so angbâ maseka akiri amû koli, ala dü amolenge, ala fa lege na azo ti da ti ala; ala sala tongaso si awato ti e awara lege ti tene sioni tënë na tele ti e pëpe.’—1 Timothée 5:13, 14, FM 01.
Paul agboto lê na ndo anzoni kusala so awali alingbi ti sala na yâ ti sewa. Ti sala aye tongana ‘dungo molenge nga na fango lege na azo ti da ti lo’, ngbango ti ‘duti na yâ mabe, na ndoye, na ti bata tele ti lo nde teti Nzapa, na lege ti ndara’, atambela so akpengba zo pëpe alingbi pëpe ti gboto mbeni wali. Nde na so, lo yeke bata dutingo ti lo na lege ti yingo (1 Timothée 2:15). Salango tongaso ayeke mû maboko na amaseka-wali mingi ti kpe agbanda ti Satan.
Atënë so Paul atene na Timothée adabe ti e kue, koli na wali, ti duti na akusala so ayeke sala nzoni na e. Tënë ti Nzapa amû wango so na aChrétien kue: “I bata nzoni si i tambela na lege ni, i tambela tongana awabuba pëpe, me tongana awandara.”—aEphésien 5:15.