Ala gbu ngangu na gbele kangango lege
MBENI bungbi ti azo mingi so ngonzo ahon ndo ti ala agbu na ngangu Gaïus na Aristarque so ayeke akamarade ti bazengele Paul ti lï na yâ da ti théâtre ti Ephèse. Kâ, teti ngbonga use, azo ni so ngonzo agbu ala adekongo: “Diane ti azo ti Ephèse ayeke kota!” (Kusala 19:28, 29, 34). Akamarade ti Paul use so aluti lani ngangu na gbele kengo ndo so? Na ye ni akomanse lani tongana nyen?
Fango tënë ti Paul atambela lani nzoni mingi na gbata ti Ephèse teti ngu ota. Ye ti pekoni ayeke so aEphésien mingi azia lege ti vorongo ayanda (Kusala 19:26; 20:31). Kota yanda ti Ephèse ayeke lani Artémis (Diane), nzapa-wali ti dungo, so pendere temple ti lo ayeke na ndo mbeni hoto ti gbata ni. Azo amû akete kete temple wala da ti yanda so na ala yü ni tongana waraga wala ala zia ni na yâ da ti ala ti tene a bata ala. Biani, aChrétien alingbi lani ti vo ayanda so pëpe.—1 Jean 5:21.
Démétrius, mbeni oko ti awakode so ayeke sala ândö ayanda ti Artémis na argent, abâ so fango tënë ti Paul ayeke kanga lege na kua ti nginza ti ala. Na lege ti mbeni tënë so ayeke tâ tënë kue pëpe na so lo zia ambeni ti sioni dä, lo ga na amba ti lo ti yeda so fade azo ti Asie Mineur kue ayeke zia ti voro Artémis. Na peko ti atënë so, azo ni adekongo ngangu ti gonda na iri ti Artémis, na mbeni kota wusuwusu amû yâ ti Ephèse kue.—Kusala 19:24-29.
Azo saki mingi akungbi ti gue na théâtre ni, so azo 25 000 alingbi duti na yâ ni. Paul aye ti sala tënë na azo mingi so ngonzo agbu lani ala, me ambeni kota zo ti nzobe so ayeke kâ atene na lo ti sala ni pëpe. Na nda ni, secrétaire ti gbata ni awara lege ti kaï dekongo ti azo ni, na Gaïus na Aristarque akpe ahon.—Kusala 19:35-41.
Laso nga, azo ti Nzapa alingbi ti tingbi na azo ti kangango lege na même na asioye ti ngangu na yâ fango tënë ti ala. Fani mingi, ala yeke fa nzo tënë na yâ akodoro so vorongo ayanda, salango aye ti pitan na kpengbango li ti amaseka ahon ndo ni. Me, na mbito pëpe, ala mû tapande ti bazengele Paul, so ‘ake pëpe ti fa nda ti tënë na gbele azo, na lo fa tënë ni na yâ da nde nde’ na Ephèse (Kusala 20:20). Legeoko nga, ala yeke na ngia tongana ala bâ so “tënë ti Seigneur awu mingi, a hon ye kue na ngangu.”—Kusala 19:20.
[Foto na lembeti 30]
Ye so angbâ na peko ti bubango ti théâtre ni na Ephèse