Sala ye na ndara lâ oko oko

“FA NA e lege ti diko lâ ti e, si e lingbi wara bê so ayeke na ndara.” (Psaume 90:12). A yeke sambela so Moïse, mbeni oko ti azo so asû Bible, asala ni na tâ be-ti-molenge. Mbilimbili ye so lo hunda ayeke nyen? E nga e lingbi ti hunda ye legeoko tongana ti lo?

Na versê 10, Moïse adema tele teti so fini ti zo ayeke ninga mingi pëpe. Na mbeni ngoi nde, lo sû na mbeti atënë ti Job so: “Zo so wali adü lo ayeke na lâ mingi pëpe, na vundu ti lo asi singo.” (Job 14:1). A yeke polele so Moïse ayeke tâ na kota vundu ti bâ so zo so lo yeke mbilimbili-kue pëpe, fini ti lo aninga mingi pëpe. Ni la, lo bâ lani lango oko oko ti fini ti zo tongana mbeni ye so ayeke na ngele mingi. Na fango dema ti lo so na Nzapa, Moïse ayeke fa lani nzara ti bê ti lo ti sala kusala na tanga ti alango ti lo na lege ti ndara, na mbeni lege so ayeke nzere na Wasalango lo. A lingbi e nga e gi pëpe ti sala kusala na alango ti fini ti e na mbeni lege so ayeke nzoni? Tongana e ye si Nzapa ayeda na e fadeso, e yeke sala ande ngangu ti sala kusala nzoni na alango ti fini ti e.

Mbeni ye ayeke dä so apusu lani Moïse nga na Job ti sala ye; ye ni so alingbi nga ti pusu e ti sala ye. Akoli use so ayeke awakua ti Nzapa ayeke ku lani kungo mbeni futa so ayeke ga: fini na ndo sese na yâ ti nzoni dutingo (Job 14:14, 15; aHébreu 11:26). Na ngoi ni kâ, fade kuâ ayeke zia pëpe katikati na anzoni kusala ti mbeni zo. Wasalango e aleke ti tene abe-ta-zo aduti na fini teti lakue lakue na yâ paradis na ndo sese (Esaïe 65:21-24; Apocalypse 21:3, 4). So alingbi ti duti beku ti mo nga tongana mo ‘diko alango ti mo na mbeni lege so mo lingbi ti wara bê so ayeke na ndara.’