Atënë so azo ahunda

Jésus atene lani na Nicodème: “Zo oko ade ama na yayu pëpe, gi Lo oko so alondo na yayu azu, Lo so ayeke Molenge Ti Zo.” (Jean 3:13). Lo ye ti tene nyen?

Na ngoi so Jésus asara tënë so, lo yeke lani na sese, ade lo ma wala lo kiri na yayu pëpe. Ye oko, ye so e hinga na ndo ti Jésus nga ye so lo na Nicodème ayeke sara lisoro na ndo ni alingbi ti mû maboko na e ti gbu nda ti tënë ti lo so.

Tongana a tene so Jésus “alondo na yayu azu,” a ye ti fa so lo yeke kozoni na yayu na tere ti Babâ ti lo. Me tongana ngoi so Nzapa adiko alingbi awe, Lo tokua fini ti Molenge ti Lo na yâ ti Marie, na Marie adü Jésus (Luc 1:30-35; aGalate 4:4; aHébreu 2:9, 14, 17). Na peko ti kuâ ti Jésus, a yeke zingo lo na tere ti yingo na lo yeke kiri na yayu ti duti na tere ti Jéhovah. Ni la si ngoi kete kozoni si a fâ lo, a yeke na lege ni so Jésus asambela tongaso: “Babâ, mû gloire na Mbi na tere ti Mo mveni, gloire ni so ayeke na Mbi tongana Mbi yeke na Mo giriri kozoni si sese so ayeke.”​—Jean 17:5; aRomain 6:4, 9; aHébreu 9:24; 1 Pierre 3:18.

Na ngoi so Jésus atene tënë so ayeke na Jean 3:13 na Nicodème so lo yeke Farizien nga wafango ye na sese ti Israël, ade Jésus akiri na yayu pëpe. Ti tâ tënë ni, ti si na ngoi ni so, ade mbeni zo so akui ague na yayu pëpe. Jésus mveni atene so Jean-Baptiste ayeke kota ahon aprophète kue ti Nzapa, me “zo so ayeke kete kete na royaume ti yayu ayeke kota ahon lo.” (Matthieu 11:11). Nga, bazengele Pierre afa so même Gbia David so ayeke be-ta-zo na Nzapa, ngbene ye so lo kui si a lu lo, lo ngbâ lakue na yâ ti dukua ti lo; David ague na yayu pëpe (Kusala 2:29, 34). A yeke senge pëpe si David, Jean-Baptiste na awakua ti Nzapa so akui kozoni na Jésus ague na yayu pëpe. Nda ni ayeke so ala kui kozoni si Jésus azi lege ti yayu na azo. Bazengele Paul atene so Jésus ayeke kozo zo so azi “fini lege so amû fini” na so ague na yayu.—aHébreu 6:19, 20; 9:24; 10:19, 20.

Teti so Jésus ade akui pëpe nga ade a zingo lo lani pëpe, lo ye ti tene nyen tongana lo tene na Nicodème: “Zo oko ade ama na yayu pëpe, gi Lo oko so alondo na yayu azu, Lo so ayeke Molenge Ti Zo.” (Jean 3:13). Zia e bâ ye so Jésus na Nicodème ayeke sara lisoro na ndo ni.

Tongana kota zo ti aJuif so ague ti bâ Jésus na bï, Jésus atene na lo: “Biani, biani, Mbi tene na mo, tongana A kiri A dü zo mbeni pëpe, lo lingbi bâ royaume ti Nzapa pëpe.” (Jean 3:3). Nicodème ahunda Jésus, lo tene: ‘A yeke kiri ti dü zo mbeni tongana nyen?’ Lo gbu nda ti tënë ti lingo na yâ Royaume ti Nzapa so pëpe. Mbeni kode ayeke dä ti mû maboko na lo ti gbu nda ni? En, me nde na Jésus, mbeni zo ti sese alingbi ti fa ye na ndo ni na Nicodème pëpe ngbanga ti so mbeni zo so alondo na yayu aga si lo lingbi ti fa ye na mba ti lo na ndo tënë ti lingo na yâ Royaume ni ayeke dä oko pëpe. Tongaso, a yeke Jésus si alingbi ti fa mara ti aye tongaso na Nicodème nga na tanga ti azo ngbanga ti so lo londo na yayu si lo ga.

Tënë so alondo na ndo ti versê so ayeke mbeni tapande so afa nene ti mandango Tënë ti Nzapa. A yeke na lege ni pëpe ti tene li ti e aga kirikiri na ndo mbeni versê gi ngbanga ti so e bâ ti e so a yeke ngangu ti gbu nda ni. Ti gbu nda ti mbeni versê, a hunda ti bâ ye so ambeni versê nde atene, nga a lingbi kamba aduti na popo ti lo versê ni na atanga ni. Na ndo ni, fani mingi ye so asi na ngoi ni so a tene tënë ni nga tënë so a yeke sara lisoro na ndo ni na yâ ti chapitre so versê ni ayeke dä alingbi ti mû maboko na e ti wara tënë so ayeke na lege ni na so e lingbi ti yeda na ni.