A lingbi e zia télé ti fa ye na amolenge ti e?
NGOI na ngoi, peut-être mo bâ so a yeke nzoni ti zia amolenge ti mo ti bâ télé na ngoi so mo yeke sara mbeni kua. Me bango télé ayeke sara mbeni ye na ndo ti amolenge ti mo?
Mbeni mbeti-sango (The New York Times) atene: “Aye so a yeke fa na télé alingbi ti sara ngangu même na ndo ti akete molenge.” Na yâ ti mbeni mandango ye so a sara ni ade ti ninga pëpe, a zia mbeni nduru limon na amolenge ti ngu oko ti bâ. Limon ni afa sarango ye ti mbeni wali tongana lo bâ mbeni ye ti ngia ti amolenge. Mbeti-sango ni atene: “Tongana wali ni asara mbeto ti ye ti ngia ni, amolenge ni ayeke sara ngia na ni pëpe, mbeto ayeke sara ala nga ala yeke toto. Tongana lo sara ngia na ni, amolenge ni nga kue aye ti sara ngia na ni.”
Biani, télé ayeke sara mbeni ye na ndo ti amolenge. Ye oko, a yeke sara nyen gbandä na ndo ti amolenge? Na yâ kua ti lo, Pakara Naoki Kataoka, kota wafango ye na ndo akobela ti amolenge na da-mbeti ti Kawasaki na gbata ti Kurashiki na Japon, abâ amolenge so ala yeke kpô mingi nga so a yeke ngangu ti hinga wala ala yeke na ngia wala na vundu. Ala kue abâ lani télé wala mbeni limon teti anze mingi. A bâ so mbeni molenge ti ngu use alingbi pëpe ti sara lisoro na azo nga lo hinga lê ti atënë mingi pëpe. Na tango so lo yeke lani na ngu oko, lakue lakue a zia lo ti bâ télé a londo na ndapre ti si na lakui juska na ngoi so lo wara ngu use. A yeke gi na peko ti so mama ti molenge ni amä wango ti docteur na lo zia lo ti bâ télé mbeni pëpe nga lo to nda ti sara ngia na lo si molenge so ato nda ti hinga lê ti atënë mingi. Biani, a lingbi ababâ na mama amû ngoi ti sara lisoro na amolenge ti ala.
Jéhovah Nzapa, Zo so aleke sewa, aluti mingi na ndo nene ti tene tâ nzoni lisoro aduti na popo ti azo ti yâ ti sewa ni. Lo tene tënë so ândö na azo ti lo: “Fade mo fa tënë ni [tënë ti Nzapa] na amolenge ti mo biani, na mo sara tënë ti komandema so, tongana mo yeke duti na da ti mo, tongana mo yeke tambela na lege, tongana mo gue ti lango, na tongana mo londo.” (Deutéronome 6:7). Na lege ti tënë ti yanga nga na tapande ti ala, a yeke ababâ na mama si alingbi ti fa nzoni mingi na amolenge “lege so a lingbi [ala] gue dä,” me a yeke télé pëpe.—aProverbe 22:6.