Bâ gi nzoni ti bungbi ti Jéhovah

“Fade nzoye ti da ti Mo alingbi na e.”​—PSAUME 65:5.

DAVID ti Israël ti giriri ayeke mbeni oko ti akpengba zo so a sara tënë ti ala na yâ ti mbage ti Mbeti ti Nzapa so a sû ni na Hébreu. Atâa so lo yeke berger, wapikango mozoko, prophète nga gbia, lo zia bê ti lo kue na Jéhovah Nzapa. Kpengba songo so David ayeke na ni na Jéhovah adü na yâ bê ti lo nzara ti leke mbeni da na Nzapa. Da ni so, wala temple, ayeke ga ndo so azo ti Israël kue ayeke gue dä ti voro tâ Nzapa. David ahinga so temple ni nga na kusala so azo ayeke sara na yâ ni ayeke ga ande na ngia nga na adeba nzoni na azo ti Nzapa. Tongaso lo he bia so: “Ngia ayeke na zo so Mo [Jéhovah, Mo] iri lo ti ga nduru na Mo si lo lingbi duti na sedu ti Mo; fade nzoye ti da ti Mo alingbi na e, nzoye ti Temple ti Mo ti nzoni-kue.”​—Psaume 65:5.

² Ye oko, a mû lege pëpe na David ti bâ lege ti kusala ti lekengo da ti Jéhovah ni. Nde na so, a bata lani matabisi ni so na molenge ti lo Salomon. Atâa so lo yeke na kota nzara ti sara da ni, David akasa ndo pëpe ngbanga ti so a mû matabisi ni so na mbeni zo nde. Ti lo, kota ye ni ayeke gi ti tene a leke temple ni awe. Na bê ti lo kue lo mû maboko na kusala ni na lege so lo mû na Salomon tapande ti aye nde nde ti tere ti temple ni, so Jéhovah afa ni na lo. Nga, David abungbi aLévite saki mingi, lo kangbi yâ ti ala ti sara akua nde nde na lo mû gbâ ti lor na argent ti tene a leke na temple ni.​—1 Chronique 17:1, 4, 11, 12; 23:3-6; 28:11, 12; 29:1-5.

³ A-Juif be-ta-zo amû maboko lani na aye so a leke ndali ti vorongo tâ Nzapa na yâ da ti lo. E awakua ti Jéhovah laso, e nga e yeke mû maboko na aye so a leke teti vorongo Jéhovah na yâ bungbi ti lo na sese ge. Na sarango tongaso e fa so e kue e yeke na oko bibe so David ayeke na ni lani. E yeke na bibe ti demango tere pëpe. Nde na so, e yeke bâ gi nzoni ti bungbi ti Jéhovah Nzapa. Mo yeke bi bê ti mo na gbâ ti anzoni ye so e lingbi ti duti biani na bê ti kiri singila ndali ni? Zia e bâ ambeni mbage ti anzoni ye so.

E fa bê ti kiri singila teti azo so amû li ni

⁴ E yeke tâ na anda ti tënë mingi ti kiri singila teti ngbâa be-ta-zo na ti ndara so Jésus Christ azia lo ti bâ lege ti aye ti lo na ndo sese. Bungbi ti ngbâa ni, so aChrétien so a sa yingo na ndo ti ala si ayeke na yâ ni, ayeke mû li ni na yâ kusala ti fango nzo tënë, ayeke leke akapa ti abungbi nga lo yeke sigigi na ambeti ti nzapa na ayanga ti kodoro ahon  400. Azo kutu mingi na ndo sese mobimba ayeke te na ngia kobe ti yingo na “l’heure ni so alingbi.” (Matthieu 24:45-47). Biani, e yeke na nda ti tënë oko pëpe ti kasa ye so.

⁵ Teti ngu mingi, Elfi, mbeni Témoin ti Jéhovah so aga mbakoro awe abâ so lo wara dengo bê nga na mungo maboko na sarango ye alingbi na wango ti Bible so ayeke na yâ ti ambeti so bungbi ti ngbâa ni ayeke sigigi na ni. Tâ bê ti kiri singila apusu lo ti sû tënë so na mbeti: “Tongana bungbi ti Jéhovah ayeke dä pëpe, ka mbi yeke sara nyen?” Pierre na Irmgard asara na Nzapa ngu mingi awe. Irmgard afa bê ti kiri singila teti ambeti kue so “bungbi ti Jéhovah so asara ye na ndoye nga na bingo bê na zo” amû ni. Na popo ti ambeti so, a yeke wara ambeni so abâ azo so ayeke na kpale ti bango ndo na ti mango ndo.

⁶ Wabatango Bungbi ti aTémoin ti Jéhovah so ayeke sara kua na iri ti ngbâa be-ta-zo ayeke mbeni kete bungbi ti a-ancien so a sa yingo na ndo ti ala. Ala yeke sara kusala na kota ndokua ti aTémoin ti Jéhovah na gbata ti Brooklyn, na Amerika. Wabatango Bungbi ni azia na ndo ti afiliale oko oko aita-koli so ayeke na kode mingi ti bâ lege ti akusala ti akongregation na ndo sese kue so wungo ni ahon 98 000. A zia na ndo ti akongregation so a-ancien na aserviteur ti mungo maboko so ayeke aita-koli so alingbi na aye so Bible ahunda na mbage ti azo so aye ti yô kungba (1 Timothée 3:1-9, 12, 13). A-ancien ayeke mû li ni na yâ ti kongregation nga ala yeke bata kundu ti Nzapa na lege ti ndoye. A yeke tâ ye ti nzoni mingi ti duti na yâ ti kundu ni na ti hinga ndoye nga na beoko so ayeke na yâ ti sewa ti “aita” so ayeke na ndo ti sese kue.​—1 Pierre 2:17; 5:2, 3.

⁷ Ahon ti dema tere, lakue ambeni ita ayeke fa na gigi singila ti bê ti ala teti a-ancien so na ndoye ayeke fa lege na ala. Bâ tapande ti mbeni Chrétien so iri ti lo ayeke Brigitte so ngu ti lo ahon 30 nga lo yeke wali ti koli. Na ngoi so lo de maseka, lo to nda ti fono na asioni kamarade na a ngbâ kete lo tï na yâ ti kota siokpari. Me wango ti a-ancien na mungo maboko ti aita asara si lo wara kpale pëpe. Fadeso Brigitte atene nyen? Lo tene: “Mbi kiri singila mingi so mbi ngbâ na yâ ti pendere bungbi ti Jéhovah.” André so lo yeke na ngu 17 atene: “Bungbi ti Jéhovah ayeke tâ nzoni bungbi so ahon atanga ni kue na ndo sese so.” Biani, a lingbi e kiri singila teti nzoni ti bungbi ti Jéhovah.

Ala so amû li ni ayeke na awokongo

⁸ Biani, ala so a zia ala na ndo ti bungbi ni ayeke na awokongo. Ala kue ayeke sara faute, na ambeni ayeke na awokongo so ala yeke tiri ngangu ti hon ndo ni. Ye oko, a lingbi bê ti e aso ndali ni? Ên-ën. Même ambeni zo ti Israël ti giriri so ayô akota kungba atï na yâ ti akota siokpari. Na tapande, na ngoi so David ade maseka, a iri lo ti pika mozoko ti dë bê ti Gbia Saül so kpale ahon ndo ti lo. Na pekoni, Saül agi ti fâ David, na a lingbi David akpe ti bata fini ti lo.​—1 Samuel 16:14-23; 18:10-12; 19:18; 20:32, 33; 22:1-5.

⁹ Ambeni zo ti Israël asara ye lani na handa. Na tapande, Joab, mokonzi ti aturugu ti David afâ Abner so ayeke sewa ti Saül. Absalom agbe lingo ti mû mbata ti gbia na maboko ti babâ ti lo David. Nga, Ahitophel wawango so David azia bê kue na lo akä David (2 Samuel 3:22-30; 15:1-17, 31; 16:15, 21). Ye oko, David adema tere ti lo mingi ngbanga ni pëpe wala lo dö lege ti tâ vorongo lo zia pëpe. Me lo duti gi kpô. Aye ti ngangu so apusu David ti ga nduru mingi na Jéhovah na ti ngbâ ti bata nzoni bango ndo so lo yeke na ni na ngoi so lo yeke kpe Saül ti bata fini ti lo. Na ngoi ni so, David ahe bia so: “Sara be-nzoni na mbi, O Nzapa, sara be-nzoni na mbi, teti âme ti mbi akpe na Mo ti bata tere ti lo; biani, fade mbi kpe na gbede ti kpangbi ti Mo ti bata tere ti mbi, juska ye ti ngangu ahon awe.”​—Psaume 57:2.

¹⁰ Laso, e yeke na nda ti tënë oko pëpe ti dema tere ti e tënë ti sarango ye na handa na yâ ti bungbi ti Jéhovah. Jéhovah, a-ange ti lo nga na aberger na lege ti yingo ayeke kanga lê pëpe na ndo azo ti sioni so asara ye na handa na yâ ti kongregation. Ye oko, e kue e yeke tingbi na awokongo ti e mveni nga na ti ambeni wakua ti Jéhovah.

¹¹ Gertrud ayeke mbeni wakua so asara na Jéhovah teti angu mingi lani. Tongana lo de maseka, a bi tënë ti wataka na li ti lo a tene lo yeke zo so asara ye na handa me lo yeke pëpe tâ wafango tënë ti ngoi kue. Lo sara ye tongana nyen? Lo kasa azo so abi tënë so na li ti lo? Ên-ën. Kete kozoni si lo wara kuâ na ngu 2003 tongana lo yeke na ngu 91, lo dabe ti lo na ye so asi na lo lani, lo tene: “Tënë so nga na ambeni ye so asi na mbi na pekoni afa na mbi so atâa girisango lege ti ambeni zo, Jéhovah ayeke fa lege na kota kusala ti lo, kusala so lo mû na e azo so e yeke na awokongo ti sara ni.” Na ngoi so lo tingbi lani na awokongo ti ambeni wakua ti Jéhovah, Ita Gertrud asambela Jéhovah na bê ti lo kue.

¹² Teti so même aChrétien so ayeke be-ta-zo mingi ayeke na awokongo, tongana mbeni ita so amû li ni agirisa lege, zia e ngbâ lakue ti “sara ye oko pëpe na demango tere”. (aPhilippien 2:14). A yeke tâ ye ti vundu mingi ti mû sioni tapande ti mbeni kete wungo ti akozo Chrétien! Disciple Jude atene so awafango ye ti wataka ti ngoi ti akozo Chrétien ake lani “gere-ti-komande, na ala zonga agloire.” Na ndo ni, azo ti sioni so ayeke lani “azo ti demango tere, ala dema tere tënë ti ye kue so asi na ala”. (Jude 8, 16). Zia e ke ti mû peko ti azo so ayeke kasa ndo nga ayeke dema tere, e bi bê lakue na ndo anzoni ye so ngbâa be-ta-zo ayeke mû na e. Zia e kiri singila teti nzoni ti bungbi ti Jéhovah na e ngbâ lakue ti “sara ye oko pëpe na demango tere”.

“So ayeke kpengba tënë!”

¹³ Na ndembe so ambeni zo so ayeke lani adisciple ti Jésus ayeke kasa azo so a zia ala ti mû li ni, ambeni ayeke kasa ti ala afango ye ti Jésus. Tongana ti so a fa ni na Jean 6:48-69, Jésus atene: “Zo so ate mitele ti Mbi na lo nyon mênë ti Mbi, lo yeke na fini ti lakue lakue.” Tongana “ambeni disciple ti Lo mingi amä tënë so, ala tene, So ayeke kpengba tënë! Zo nyen alingbi mä tënë so?” Me “Jésus ahinga na yâ bê ti Lo adisciple ti Lo ayeke dema tere teti tënë so”. Na “teti tënë so, adisciple ti Lo mingi akiri, na ala tambela na Lo mbeni pëpe.” Ye oko, a yeke adisciple ni kue pëpe si akasa ndo. Bâ ye so asi tongana Jésus ahunda abazengele 12, lo tene: “I nga, i ye ti zia Mbi?” Bazengele Pierre akiri tënë: “Seigneur, fade e gue na zo nyen? Mo yeke na tënë so amû fini ti lakue lakue. E mä na bê awe, na e hinga Mo yeke Lo Ti Nzoni-kue ti Nzapa.”

¹⁴ Laso, na popo ti awakua ti Nzapa, mbeni kete kete wungo ti azo so bê ti ala aso ndali ti ambeni ye so bungbi ti Jéhovah ayeke fa ato nda ti kasa bungbi ni. Ngbanga ti nyen ala yeke kasa ndo? Mingi ni, ala yeke kasa ndo ni ngbanga ti so ala gbu nda ti lege so Nzapa ayeke sara na ye pëpe. Wasarango ye kue ayeke fa tâ tënë na awakua ti lo yeke yeke. Ni la, ngoi na ngoi a yeke si so a hunda ti gbian lege so e gbu nda ti ambeni versê. Mingi ti awakua ti Jéhovah ayeke na ngia teti agbiango ye so. Ye oko, tâ mbeni kete wungo ti awakua abâ tere ti ala “mbilimbili ahon ndo ni” na ala ke ti ala agbiango ye so (Zo-ti-fa-tene 7:16). Ti ambeni, a yeke baba la asara ala; ti ambeni nga a yeke so ala tï na yâ gbanda ti bibe ti dutingo yamba. Atâa nda ti tënë ni ayeke nyen, mara kasango ndo tongaso ayeke ga na kpale teti a lingbi ti gboto e ti gue na ni na yâ sese so na ti sara ye tongana ti azo ni.

¹⁵ Na tapande, Emmanuel, so ayeke mbeni Témoin ti Jéhovah, ato nda ti kasa lani ambeni ye so lo diko na yâ ti ambeti so “ngbâa be-ta-zo na ti ndara” asigigi na ni (Matthieu 24:45, NW ). Lo zia lege ti dikongo ambeti ti e nga na pekoni lo tene na a-ancien ti kongregation ti lo so lo ye ti ngbâ Témoin ti Jéhovah mbeni pëpe. Ye oko, a ninga pëpe na pekoni, Emmanuel aga ti bâ so bungbi ti Jéhovah ayeke fa aye tâ na lege ni. Lo kiri lo bâ a-ancien, lo yeda so lo bâ lani ye na lege ni pëpe na a kiri na lo na bungbi. Na pekoni, lo kiri lo wara ngia ti lo.

¹⁶ Ka tongana bê ti e aye ti pusu e ti kasa ndo ngbanga ti so e yeke na kite na ndo ambeni ye so bungbi ti Jéhovah ayeke fa? Zia e duti na be-nze-pepe. Ngbâa be-ta-zo alingbi ti sigigi na ambeni tënë ande ti zi nda ti tënë ni polele. A yeke na lege ti ndara ti hunda a-ancien ti mû maboko na e (Jude 22, 23). Sambela, mandango Mbeti ti Nzapa zo mveni nga sarango kamarade na aita so akpengba na lege ti yingo alingbi ti mû maboko na e ti zi akite na bê ti e. A lingbi nga ti pusu e ti duti na bê ti kiri singila mingi ndali ti akpengba tâ tënë ti Bible so e yeke wara ni na lege ti bungbi so Jéhovah ayeke sara kusala na ni ti fa ye na e.

Ngbâ ti duti na nzoni bango ndo

¹⁷ Tâ tënë, e azo so e yeke mbilimbili-kue pëpe, e yeke nduru ti sara siokpari, na peut-être ambeni ayeke gi nduru ti dema tere senge senge (Genèse 8:21; aRomain 5:12). Ye oko, tongana e ga azo so aye lakue ti kasa ndo, e yeke zia songo ti e na Jéhovah Nzapa na yâ ti kpale. Tongaso, a lingbi e sara kue ti hon ndo ti bibe ti dutingo nduru ti kasa ndo.

¹⁸ Ahon ti tene e kasa aye so ayeke si na yâ ti kongregation, a yeke nzoni e ngbâ ti duti na nzoni bango ndo nga e bata mbeni programme so ayeke sara si e wu na kusala, e duti na ngia, e bâ ye na nene ni, ye ayengi e pëpe nga e kpengba na mabe (1 aCorinthien 15:58; Tite 2:1-5). Jéhovah si ayeke fa lege na aye kue so ayeke tambela na yâ bungbi ti lo, na Jésus ahinga aye kue so ayeke si na yâ ti kongregation oko oko kue tongana ti ngoi ti akozo Chrétien (Apocalypse 1:10, 11). Na be-nze-pepe, zia e ngbâ ti ku Nzapa nga na Christ so ayeke Beli ti kongregation. Ala lingbi ti sara kusala na aberger so ahinga kua ti ala nzoni ti leke ambeni ye so a hunda ti gbian ni.​—Psaume 43:5; aColossien 1:18; Tite 1:5.

¹⁹ Na yâ ti ngoi kete, aye ti sioni sese ti laso ayeke hunzi na Royaume ti Messie ayeke to nda ti komande sese mobimba. Juska ti si na ngoi ni so, a yeke tâ kota ye ti tene e oko oko kue e ngbâ ti duti na nzoni bango ndo. Ye so ayeke mû ande maboko na e ti bâ anzoni sarango ye ti amba ti e Chrétien ahon ti bâ gi afaute ti ala. Ti ngbâ ti bâ gi anzoni sarango ye ti ala ayeke sara si e duti na ngia. Tongaso, ahon ti tene bê ti e anze ndali ti so e yeke kasa ndo, e yeke wara ngangu na e yeke kpengba na lege ti yingo.

²⁰ Ti duti na nzoni bango ndo ayeke mû nga maboko na e ti dabe ti e na gbâ ti adeba nzoni so e yeke na ni ndali ti so e yeke na yâ ti bungbi ti Jéhovah. A yeke gi oko bungbi so si na ndo sese ayeke be-ta-zo na Kota Gbia ti dunia. So mo yeke na yâ bungbi ti Jéhovah nga mo yeke na matabisi ti voro tâ Nzapa, Jéhovah, mo bâ ni tongana nyen? Zia bango ndo ti mo aduti tongana ti David so ahe bia so: “O Mo so Mo mä sambela, fade mi kue aga na Mo. Ngia ayeke na zo so Mo iri lo ti ga nduru na Mo si lo lingbi duti na sedu ti Mo; fade nzoye ti da ti Mo alingbi na e.”​—Psaume 65:3, 5.

Mo dabe mo na ni?

• Ngbanga ti nyen a lingbi e kiri singila teti ala so ayeke mû li ni na yâ ti kongregation?

• Tongana mbeni ita so ayô kungba asara faute, a lingbi e sara nyen?

• Tongana lege so e gbu nda ti ambeni versê ti Bible agbian, a lingbi e bâ ni tongana nyen?

• Nyen la alingbi ti mû maboko na mbeni Chrétien ti hon ndo ti kite?

[Ahundango tënë ti manda na ye]

1, 2. (a) Temple ni nga na akusala so ayeke sara na yâ ni ayeke sara ande nyen na ndo ti azo ti Nzapa? (b) Maboko wa David amû teti lekengo temple ni?

3. Bibe wa awakua ti Jéhovah ayeke na ni na ndo aye so a leke teti vorongo lo?

4, 5. (a) Tongana nyen ngbâa be-ta-zo na ti ndara ayeke sara kua so a mû na lo? (b) Ambeni Témoin ti Jéhovah atene nyen na ndo akobe ti yingo so ala yeke wara?

6, 7. (a) Tongana nyen a yeke bâ lege ti akusala ti akongregation ti ndo sese kue? (b) Ambeni zo atene nyen na ndo bungbi ti Jéhovah?

8, 9. Ambeni zo ti ngoi ti David asara ye tongana nyen? David asara ti lo nyen?

10, 11. Ye wa asi na Ita Gertrud na ngoi so lo de maseka? Lo tene nyen na ndo awokongo ti amba ti lo Chrétien?

12. (a) Sioni tapande wa ambeni kozo Chrétien azia? (b) A lingbi e bi bê ti e lakue na ndo ti nyen?

13. Ambeni disciple asara ye tongana nyen na mango ambeni fango ye ti Jésus Christ?

14, 15. (a) Ngbanga ti nyen bê ti mbeni kete kete wungo ti aChrétien aso ndali ti ambeni ye so bungbi ti Jéhovah ayeke fa? (b) E lingbi ti manda nyen na ndo tapande ti Emmanuel?

16. Aye wa alingbi ti mû maboko na e ti hon ndo ti kite so e yeke na ni na ndo ambeni ye so bungbi ti Jéhovah ayeke fa?

17, 18. Ahon ti kasa ndo, a lingbi e duti na bango ndo wa? Ngbanga ti nyen?

19. Juska ti si na ngoi so Royaume ti Nzapa ayeke komande sese mobimba, a yeke nzoni e ngbâ ti bâ gi nyen?

20. Dutingo na nzoni bango ndo ayeke mû lege na e ti wara adeba nzoni wa?

[Foto na lembeti 20]

David amû na Salomon tapande ti temple ni nga na bê ti lo kue lo mû maboko na vorongo tâ Nzapa

[Foto na lembeti 23]

Na ngia a-ancien ayeke mû maboko na aita na lege ti yingo