Sambela

1 Ndali ti nyen e yeke na nzara ni?

SAMBELA. A yeke mbeni tënë ti Bible so azo mingi aye ti hinga tënë na ndo ni. Zia e bâ ahundango ndo mbasambala so azo ayeke hunda ka mingi na ndo ti sambela; nga na pekoni e yeke bâ akiringo tënë so Bible akiri na ni na ndo ti atënë so. A leke a-article so ti mû maboko na mo ti sambela: ti to nda ti sambela wala ti sara si asambela ti mo akiri aga nzoni mingi ahon ti kozo.

NA YÂ ti dunia kue, na yâ ti akodoro nga na yâ ti abungbi ti vorongo Nzapa, azo ayeke sambela. Ala yeke sambela ala oko wala na groupe. Ala yeke sambela na yâ ti a-eglize, atemple, asynagogue, amosqué wala na yâ ti ambeni kete temple. Peut-être ala yeke sara kusala na aye tongana tapis, achapelet, mbeni ye so ayeke ronde ronde so a sû asambela na yâ ni so ala yeke turnê ni. Ambeni ayeke sara kusala na ayanda, abuku ti sambela wala asambela so a sû ni na ndo ti atableau so a zia na tere ti mbeni ye na nduzu.

Sambela ayeke mbeni ye so asara si azo ayeke nde na tanga ti aye kue so ayeke na fini na ndo ti sese. Tâ tënë, ambeni ye ayeke dä so e na anyama kue e yeke sara ni. E na anyama kue e yeke na bezoin ti te kobe, ti wu pupu nga ti nyon ngu. Legeoko na anyama, a dü e, e kono nga e kui (Zo-ti-fa-tene 3:19). Me gi azo la ayeke sambela. Ngbanga ti nyen?

Peut-être tâ kiringo tënë ni ayeke so e yeke na bezoin ti sambela. Na ndo ni, azo abâ sambela tongana mbeni ye so amû lege na ala ti zi bê ti ala na mbeni ye so ala bâ atene ayeke nzoni-kue wala so angbâ lakue lakue. Bible afa so a leke e lekengo na nzara ti mara ti aye tongaso (Zo-ti-fa-tene 3:11). Jésus Christ atene: “Ngia ayeke na ala so ahinga so ala yeke na bezoin ti aye ti yingo.”​—Matthieu 5:3.

“Bezoin ti aye ti yingo” la apusu azo ti leke akota da ti abungbi ti vorongo Nzapa nga na a-image ti voro ni. A yeke nga ni la apusu ala ti mû angbonga mingi mingi ti sambela. Biani, ambeni zo ayeke zia bê ti ala na ndo ti ala wani wala na ndo ti ambeni zo ti kaï nzara ti aye ti yingo so ala yeke na ni. Me, azo ayeke pëpe na ngangu ti kaï nzara ti aye ti yingo, ngbanga ti so e azo e woko, gigi ti e ayo pëpe nga bango ndo ti e ayo pëpe. Gi mbeni zo so ayeke na ndara mingi, so ayeke na ngangu mingi nga so ayeke na fini aninga ahon e la alingbi ti mû na e ye so e yeke na bezoin ni. Aye ti yingo so e yeke na bezoin ni so apusu e ti sambela ndali ni ayeke so wa?

Bâ ye so: A si na mo awe ti gi fango lege, ndara wala akiringo tënë na mbeni hundango tënë so mo bâ so ahon ngangu ti azo? Mo bâ so mo yeke na bezoin ti wara dengo bê na ngoi so mbeni zo so mo ye lo mingi akui? wala mo yeke gi fango lege na ngoi so mo yeke na mbeni kota desizion ti mungo ni? wala mo yeke na bezoin ti tene a pardone mo ndali ti mbeni ye ti sioni so mo sara?

Bible afa so atënë so kue ayeke akota raison so apusu azo ti sambela. Na popo ti ambeti kue so asara tënë na ndo ti sambela, Bible la ayeke mbeti so zo alingbi ti zia bê ti lo kue na ni. Na yâ ni a yeke wara asambela mingi so akoli na awali so ayeke be-ta-zo atene ni. Ala sambela ti wara dengo bê, fango lege nga ti wara kiringo tënë na ahundango tënë so akpengba ahon atanga ni kue.​—Psaume 23:3; 71:21; Daniel 9:4, 5, 19; Habakuk 1:3.

Atâa so asambela so ayeke nde nde, mbeni ye ayeke dä so a yeke wara ni na yâ ni kue. Azo so asambela so ayeke na mbeni kota ye so asara si ala wara ye so ala hunda. Ala hinga zo so a lingbi ala sambela lo. Laso, mingi ti azo ahinga ni pëpe wala ala bâ ni tongana mbeni mbumbuse ye.