Osio ye ni

Soro akamarade ti mo na lege ti ndara

BIBLE ATENE NYEN? “Zo so atambela na awandara, fade lo ga wandara.”​—aProverbe 13:20.

NGBANGA TI NYEN A YEKE KETE YE PËPE? Akamarade ti e alingbi ti sara si e zia bê ti e gi na aye so e yeke na ni wala ala lingbi ti sara si e bâ so aye so e yeke na ni alingbi e pëpe. Sarango ye ti ala wala alisoro ti ala ayeke sara ngangu na ndo ti bango ndo ti e.​—1 aCorinthien 15:33.

Na tapande, bâ ye so Bible atene na ndo ti akoli 12 so akiri, na pekoni so ala londo ti bembe ndo na sese ti Canaan. Mingi ti ala ‘afa tënë ti mû mbeto na gbele amolenge ti Israël tene ti sese ni so ala gi ndani’. Atâa asioni tënë so ala tene, use na popo ti ala atene nzoni tënë na ndo ti kodoro ni, ala iri même ni “sese ti nzoni mingi ahon.” Me sioni bango ndo ti ala bale-oko ni so amû ndo na popo ti amolenge ti Israël. Mbaï ni atene so “bungbi ti azo ni kue ayä yanga ti ala . . . na amolenge ti Israël kue adema tere”.​—Nombre 13:30–14:9.

Laso nga kue, azo mingi “ayeke azo ti dikongo tënë na gbe ti go, so ayeke dema tere na ndo ti gigi ti ala”. (Jude 16). A yeke ngangu ti zia bê ti e gi na ndo ti aye so e yeke na ni tongana e sara kamarade na azo so ye alingbi ala lâ oko pëpe.

MO LINGBI TI SARA NYEN? Gbu li na ndo ti lisoro so mo na akamarade ti mo ayeke sara. Ala yeke pika ka kate na ndo ti aye so ala yeke na ni, wala ala yeke dema tere lakue ndali ti aye so ala yeke na ni pëpe? Akamarade ti mo ni abâ mo tongana nyen? Mo yeke pusu ala ti sara bê ti aye ti mo wala mo yeke wa ala ti zia bê ti ala gi na ndo ti ye so ala yeke na ni?

Bâ tapande ti David so a soro lani lo ti ga gbia nga na Jonathan, molenge ti Gbia Saül. Tongana a gi ti sara sioni na David, lo kpe lo lango na yando. Gbia Saül asara mbeto ti tene David amû place ti lo na lo ye ti fâ David. Atâa so a yeke Jonathan la alingbi fade ti ga gbia na peko ti babâ ti lo, lo ga kota kamarade ti David. Jonathan ahinga so Nzapa la asoro David ti ga gbia na peko ti Saül na lo yeke lani na ngia ti mû maboko na kamarade ti lo.​—1 Samuel 19:1, 2; 20:30-33; 23:14-18.

Mo yeke na bezoin ti mara ti akamarade tongaso, so ayeke gi ti zia bê ti ala gi na aye so ala yeke na ni nga so ayeke gi nzoni ti mo (aProverbe 17:17). Tâ tënë, ti wara mara ti akamarade tongaso, a lingbi mo nga kue mo duti na mara ti asarango ye ni so.​—aPhilippien 2:3, 4.

[Foto na lembeti 7]

Akamarade ti mo asara si mo zia bê ti mo na aye so mo yeke na ni wala ala sara si mo bâ so ye alingbi mo pëpe?