Oku ye ni
Gi ti wara aye so mo yeke na bezoin ni na lege ti yingo
BIBLE ATENE NYEN? “Ngia ayeke na ala so ahinga so ala yeke na bezoin ti aye ti yingo.”—Matthieu 5:3.
NGBANGA TI NYEN A YEKE KETE YE PËPE? Abungbi ti vorongo Nzapa ayeke saki na saki. Mingi ti ala ayeke fa na mo tongana nyen ti kaï nzara ti mo na lege ti yingo. Me afango ye ti ala ni ayeke nde nde. Mo yeke sara tongana nyen ti hinga bungbi ti Nzapa so ayeke fa tâ tënë na so anzere na lê ti Nzapa? Ambeni kota zo ti sungo mbeti atene so ti mä na bê na Nzapa nga ti mû tere na lo ayeke mbeni ye so ayeke na lege ni pëpe na ayeke sara même sioni na zo. Mbeni mbeti-sango (Maclean’s) afa na nduru tënë bango ndo ti mbeni zo so atene Nzapa ayeke dä pëpe so azo mingi ahinga lo atene: “Fango ye ti aChrétien so atene so mbeni ye ayeke dä so ayeke kota ye na yâ ti fini ti zo na so ahon gbungo li ti zo na so senda-ye alingbi ti fa ndani pëpe asara si azo abâ fini na nene ni pëpe. Nga asara si azo ayeke nduru ti sara aye ti ngangu.”
MO LINGBI TI SARA NYEN? Gi ti bâ aye so afa so Nzapa ayeke dä (aRomain 1:20; aHébreu 3:4). Zia pëpe si mbeni zo akanga lege na mo ti gi ti wara kiringo tënë na akota hundango tënë so ge: Ngbanga ti nyen e yeke na fini? Zo ayeke ngbâ na fini na peko ti kuâ ti lo? Ngbanga ti nyen pasi ahon ndo ni tongaso? Nyen la Nzapa ahunda na mbi ti sara? Tongana mo wara nzoni kiringo tënë na ahundango tënë so, a yeke mû maboko na mo ti duti na ngia aninga.
Ye oko, a lingbi mo yeda gi tongaso pëpe na ye so azo atene na mo. Bible awa mo ti sara kusala na ‘hingango ndo ti mo’ ti tene mo wani mo hinga ye so ayeke nzoni na lê ti Nzapa (aRomain 12:1, 2). Tongana mo sara ni, mo yeke wara aye ti nzoni na pekoni. Tongana mo mû ngoi ti manda Bible nga ti sara ye alingbi na nzoni wango so ayeke na yâ ni, mo yeke wara akpale mingi pëpe, mo yeke gi bê ti mo ahon ndo ni pëpe na mo yeke duti na ngia mingi na yâ ti fini ti mo. Tënë so ayeke gi senge tënë pëpe. Azo kutu mingi so alondo na ando nde nde nga so dutingo ti ala ayeke nde nde abâ nzoni na lege ti tâ tënë so ala manda na ndo ti Nzapa nga na aye so lo leke ti sara.
Na ngoi so mo yeke bâ nzoni na sarango ye alingbi na anzoni wango so ayeke na yâ ti Bible, mo yeke kiri ti mû tere ti mo mingi na Nzapa. Yeda ti tene aTémoin ti Jéhovah amanda Bible na mo. Tongana mo sara ni, kite ayeke pëpe so mo yeke ye ande dä na tënë ti bazengele Paul so atene: “Gbungo tënë ti Nzapa ngangu so ayeke mbeni lege ti wara kota ye gi tongana zo azia bê ti lo gi na ndo ti ye so lo yeke na ni awe.”—1 Timothée 6:6.
[Foto na lembeti 8]
Gi ti hinga mo wani ye so ayeke nzoni na lê ti Nzapa