Mo Ye ti Sala Mingi Ahon?
1 Jésus ahaka Royaume na mbeni mosoro so ngele ni ayeke dä pepe. (Mat. 13:44-46) Kusala ti kangbingo nzo tene ti Royaume ayeke nga mbeni mosoro ti ngele ngangu. Kusala so a hunda ti tene e zia ni na kozo ndo na yâ fini ti e, atä tongana mungo mbage na ni kue ahunda ti gbanzi ambeni ye na tele. (Mat. 6:19-21) Mo ye ti sala mingi ahon na yâ kusala ti Royaume?
2 Ba akota ye so ge: A hunda aye mingi ti kono mungo mbage ti e na yâ kusala: (1) ti leke na bê ti zia aye ti Royaume na kozo ndo na yâ fini (Mat. 6:33); (2) ti fa na gigi mabe na ti zia bê kue na Jéhovah (2 aCor. 4:1, 7); (3) ti gi mungo maboko ti Nzapa na lege ti sambela so e sala na bê kue nga lakue (Luc 11:8-10); (4) ti sala biani ye alingbi na asambela ti e.—Jacq. 2:14, 17.
3 Alege ti kono yâ ti kusala ti e: E kue e lingbi ti zia na gbele e kozo ye so ayeke mungo mbage lakue teti ambeni ngoi na yâ kusala nze oko oko. Me mo bi bê ti mo nga ti gbu lege kue so azi ti fa tene, ti tara ti sala si afango ye ti mo aga nzoni ahon, ti sala si afini vizite ti mo akiri alë lengo mingi ahon, na ti sala kue ti mu li ni na yâ amandango Bible so ague na li ni? Peut-être mo lingbi ti mu kusala ti pionnier auxiliaire wala ti permanent wala ti sala na ndo so a hunda ti wara awafango tene dä mingi? Tongana mo yeke mbeni ita-koli so awara batême awe, mo lingbi ti gi ti wara alengo so a hunda ti ga mbeni serviteur ti mungo maboko wala mbeni ancien? (1 Tim. 3:1, 10) Mo lingbi ti kono yâ ti kusala ti mo na salango demande ti lï na Béthel, ti sala Ekole ti Formation Ministérielle, wala lekengo aDa ti Royaume?—Luc 10:2.
4 A wa mbeni ita-koli so asala la ni kua ti nginza ti ngoi kue na so amu ngoi mingi na yâ aye ti wanguru ti ga pionnier permanent. Lo to nda ti sala kusala ti pionnier auxiliaire nga na pekoni lo gbian dutingo ti lo ti lï na yâ kusala ti ngoi kue. Na pekoni lo sala Ekole ti Formation Ministérielle, so amu maboko ti leke lo teti kusala so a mu na lo fadeso tongana surveillant ti circonscription. Lo yeke na ngia mingi so lo yeda na wango so lo wara, nga na bê kue lo hinga so lo yeke na ngia mingi ahon ndali ti so lo yeda ti sala mingi ahon na yâ kusala ti Royaume.
5 Jéhovah adeba nzoni ala so amu tele ti ala ti sala ye. (Es. 6:8) Zia ye oko pepe akanga lege na mo ti kono yâ ti kusala ti mo na ti wara ngia mingi ahon nga dengo bê na pekoni.