Mara So Aduti na Ngia Mingi Ahon na ndo Sese
1 “Ngia ayeke na azo so L’Eternel [“Jéhovah,” NW] ayeke Nzapa ti ala.” (Ps. 144:15) Atënë so afa aTémoin ti Jéhovah tongana mara so aduti na ngia mingi ahon na ndo sese. Mbeni kota ngia ahon pëpe ngia so alondo na salango na Jéhovah, so ayeke tâ Nzapa oko so ayeke na fini. Teti so lo yeke “Nzapa so ayeke na ngia,” ala so avoro lo afa na gigi mara ti kota ngia ti lo. (1 Tim. 1:11, NW) Ambage wa ti vorongo ti e ayeke sala si e duti na kota ngia tongaso?
2 Anda ti Tënë ti Duti na Ngia: Jésus amû na e zendo so ngia aga tongana e ‘hinga ye ti yingo atia [e].’ (Mat. 5:3) Mandango lakue Bible na guengo na abungbi kue ti e ti Chrétien ayeke kaï nzala so. Mandango tâ tënë ti Tënë ti Nzapa ayeke zi e na gbe ti amvene nga na aglisango lege na yâ vorongo. (Jean 8:32) Mbeti ti Nzapa afa na e nga lege ti wara fini ti nzoni ahon. (Es. 48:17) Teti aye so, e wara ngia na lege ti nzoni songo ti aChrétien na yâ sewa ti aita ti e so ayeke na ngia.—1 aThes. 2:19, 20; 1 Pi. 2:17.
3 E yeke wara bê so ayeke na ngia mingi na batango alege ti nzoni salango ye so ayeke na nduzu mingi ti Nzapa, na hingango so a yeke bata e nzoni, na a zia ngia na bê ti Jéhovah. (aProv. 27:11) Mbeni wasungo mbeti-sango atene: “Atâa so akpengba-ndia ti ala ayeke ngangu mingi, aTémoin ti Jéhovah afa pëpe so ala yeke na vundu. Ye ni ayeke nde mingi na so. Apendere, nga ala so aga biazo awe [na popo ti ala] ayeke mbeni tapande, so a yeke ngangu ti wara ni, ti azo so ayeke na ngia, na so azia aye kue na place ni.” Tongana nyen e lingbi ti mû maboko na ambeni zo ti wara nga ngia so lege ti fini so amû na e?
4 Mû Maboko na Ambeni Zo ti Wara Ngia: Sese asi singo na aye ti vundu, nga fani mingi, azo ayeke na sioni bango ndo na ndo kekereke. Ye oko, e yeke na mbeni bango ndo so ayeke nzoni, na hingango so mbeni lâ, vundu ayeke duti ande ngbele ye. (Apoc. 21:3, 4) Ni la, e yeke mû mbage ti e na yâ kusala ti fango tënë na wâ, na gingo azo so ayeke na bê ti mbilimbili so e lingbi ti kangbi na ala beku so e yeke na ni, nga atënë ti mabe ti e na ndo Jéhovah.—Ezéch. 9:4.
5 Mbeni ita-wali so ayeke pionnier atene: “A lingbi ti haka ni na ye oko pëpe, angia so e yeke wara tongana e mû maboko na azo ti hinga Jéhovah nga na tâ tënë ti lo.” Zia e sala ye kue so e lingbi ti sala ti wa azo mingi ahon ti yeda na amandango Bible na da. Salango na Jéhovah na mungo tele ti e ti mû maboko na ambeni zo ti sala na lo ayeke lë ngia mingi ahon.—Kus. 20:35.