Mo yeke sala kua na brochure Ahunda ti komanse amandango Bible?

¹ Tongana mo sala lisoro lakue na ndo Bible na mbeni zo so asala nzala ti tâ tënë, na mo sala tënë, atâa gi ndulu, na ndo ambeti so e yeke sala na kusala, mo hinga so mo yeke mû li ni na mbeni mandango Bible? Biani, a yeke tâ tënë, même tongana ala luti na yanga-da wala na lege ti singa. Ngbanga ti nyen ti sala pëpe ngangu na nze ti mai na juin ti komanse mara ti mandango Bible tongaso na salango kusala na brochure Ahunda?

² Leke tele ti sala ni nzoni: Tongana mo yeke zia brochure Ahunda na azo, hinga mbilimbili ye so mo ye ti sala lisoro na ndo ni. Tongana a yeke mbeni fini vizite, bi bê na ndo lisoro so mo na lo asala awe na tingbingo tele ti ala. Hunda tele ti mo: ‘Mbi lingbi ti gboto lê na ndo aparagraphe wa ti brochure ni dä mingi ahon ti kono yâ ti lisoro ni na ti komanse mandango Bible?’ Tongana mo yeke fa tënë da na da, gi ti wara atënë wa mo bâ a lingbi na apendere, akangba, mbeni koli wala mbeni wali. Kiri mo bâ ali ti tënë oko oko na yâ ti brochure ni na soro mbeni nzoni ye ti manda. Tongana mo wara nzoni lege ti salango ni awe, tara tele ti mo fani mingi. So a yeke mbeni oko ti akelele ti salango kusala nzoni.

³ Supplément ti Kusala ti Royaume ti janvier 2002 afa awango miombe na gbe ti tënë “Awango ti Fa na Brochure Ahunda.” Li ti tënë “Hundango Ye Polele” afa na e lege ti sala kua na brochure ni ti komanse amandango Bible. Mo lingbi ti leke kozo wango-tene ni tongaso:

◼ “Mo hinga so gi na yâ penze-ngbonga kete mo lingbi ti wara kiringo tënë na mbeni kpengba hundango tënë ti Bible? Na tapande, ngbanga ti nyen alege ti vorongo so atene ala yeke aChrétien ayeke mingi? Mo hunda tele ti mo tongaso awe?” Tongana zo ni akiri tënë awe, gue na ye ti manda 13 na sala tënë na ndo akozo use paragraphe ni. Tongana ngoi ayeke dä, diko na sala lisoro na ndo versê oko wala use. Na pekoni, diko ndangba hundango tënë so ayeke na li ti lembeti ni, na tene: “Tanga ti ye ti manda so afa aye oku so amû lege ti hinga tâ lege ti vorongo. Mbi yeke na ngia ti kiri ti bâ atënë so na mo.”

⁴ Ngbâ lakue ti sala ni: Sala kusala na alege kue so azi ti fa tongana nyen ti manda Bible na yâ brochure Ahunda. Hunda Jéhovah ti deba nzoni na ndo mo (Mat. 21:22). Na salango ngangu lakue, mo lingbi ti wara ngia na lege ti mungo maboko na mbeni zo ti yeda na nzo tënë!