Fa tâ tënë na ndo Jésus
1 A-Chrétien so a sa yingo na ndo ti ala na afon ala ambeni ngasangbaga ‘ayeke na kusala ti sala tënë ti témoin ti Jésus.’ (Apoc. 12:17). Ye so ayeke mbeni kota kungba, teti so zo alingbi ti wara salut gi na lege ti lo.—Jean 17:3; Kus. 4:12.
2 ‘Lege, tâ tënë, na fini’: Jésus atene lani: ‘Mbi yeke Lege ni, na Tâ tënë na Fini. Mbeni zo aga na Babâ pëpe, gi na lege ti Mbi.’ (Jean 14:6). E lingbi ti hon gi na Jésus oko, “Lege ni”, si e ga ndulu na Nzapa na yâ sambela na ti leke nzoni songo so Lo yeda na ni (Jean 15:16). Jésus ayeke ‘Tâ tënë’ na lege so aprophétie nga na agbede so awara ni na yâ Mbeti ti Nzapa so a sû na yanga ti Hébreu aga tâ tënë na lege ti lo (Jean 1:17; aCol. 2:16, 17). Biani, kozo nda ti tâ prophétie ayeke ti fa polele kpengba kusala ti lo na yâ tambelango ti ye so Nzapa aleke ti sala (Apoc. 19:10). Na ndo ni, Jésus ayeke “Fini”. Ti wara matabisi ti fini ti lakue lakue, a lingbi e kue e fa na gigi mabe na yâ sandaga ti kota ngele so lo mû.—Jean 3:16, 36; aHéb. 2:9.
3 Mokonzi nga Gbia so ayeke komande: A lingbi azo nga ahinga kota ngangu ti komande so Jéhovah amû na Molenge ti lo. A zia Jésus tongana Gbia ti Royaume ti Nzapa, na “fade azo amä yanga ti lo.” (Gen. 49:10). Na ndo ni, Jéhovah asoro lo tongana Mokonzi ti kongregation (aEph. 1:22, 23). A lingbi e mû maboko na azo so e yeke manda Bible na ala ti hinga tongana nyen Jésus ayeke fa lege na kongregation, na lo yeke sala kusala na ‘ngbâa be-ta-zo na ti ndara’ ti mû ‘kobe ti yingo na l’heure ni so alingbi.’—Mat. 24:45-47.
4 Kota Prêtre ti be-nzoni: Teti lo wara atara na lo bâ pasi na yâ mitele ti zo, Jésus ‘alingbi ti mû maboko na azo so ayeke na gbe ti tara.’ (aHéb. 2:17, 18). So tâ ye ti mungo wâ na bê teti azo so ayeke mbilimbili-kue pëpe ti hinga so Jésus ayeke bâ awokongo ti ala na be-nzoni, nga lo yeke gbu koko ti ala na lege ti nzobe! (aRom. 8:34). Na lege ti sandaga ti Jésus nga na akusala ti lo tongana Kota Prêtre, e lingbi ti ga ndulu na Jéhovah “na mbito pëpe” ti wara ‘mungo maboko na lâ ni so ye amanke e.’—aHéb. 4:15, 16.
5 Zia si angangu kue so e sala ti fa na ambeni zo tâ tënë na ndo Jésus apusu ala ti mä yanga na ti sala na lo legeoko na e.—Jean 14:15, 21.